پُھٹ (Snap Melon) یا (Cucumis Momordica) یا Kukomus Melo، برصغیر پاک و ہند تے خصوصن پنجاب وچ پایا جاݨ آݪا کدو ٹبر دا عام تے سستا پھݪ اے، جیہنوں چھوٹے وڈے شوق ناݪ کھاندے نيں۔ پُھٹ دا مطلب ’’پُھٹݨا‘‘ (ٹُٹݨا) تے ’’تیڑاں‘‘ (کریکس) اے، اس پھݪ دے اُتے ٹُٹݨ پُھٹݨ دے نشان یا تیڑاں دیکھیاں جاسکدیاں نيں۔ اصل وچ ایہ ایہدے پکݨ دی نشانی ہُندی اے، ایہ پَک کے پُھٹ جاندا اے۔ پنجابی وچ ایہنوں کِھڑ جاݨا کہندے نيں۔ ایہ بنیادی طور تے وٹامن سی ، فولاد تے کیلشیئم دے حصول دا ذریعا سمجھی جاندی اے۔ پُھٹاں، ویلاں اُتے لَگدیاں نیں جو 1.5 میٹر (5 توں 6 فٹ) تک لمبیاں ہُندیاں نیں۔ ایہنوں جون توں ستمبر تک پھݪ لَگدا اے تے اگست، ستمبر وچ پک جاندا اے۔ ایہ ویل، بی ناݪ گھر وچ وی گملیاں یا زمین وچ سوکھی لائی جا سکدی اے، ایہدے واسطے ریتلی تے نرم مٹی موزوں ہُندی اے۔ ایہنوں ودھݨ پُھلݨ لئی دُھپ دی بہت لوڑ ہُندی اے کیونکہ ایہ ویل چھاں وچ نئيں وَدھ سکدی۔ حکیم لوک ایہدے بی، چِھلکا تے ہور اجزاء وکھ وکھ دواواں وچ استعمال کردے نيں۔ پِنڈاں وچ دوپہر دے کھاݨے دے ناݪ ایہدی چٹݨی بݨا کے وی کھائی جاندی اے تے ایہنوں لوݨ مرچ لا کے بطور سلاد وی ورتیا جاندا اے۔
This article uses material from the Wikipedia شاہ مکھی پنجابی (Shāhmukhī Pañjābī) article پُھٹ, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). لکھت CC BY-SA 4.0 لسنس تھلے ہیگا اے۔ Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki شاہ مکھی پنجابی (Shāhmukhī Pañjābī) (DUHOCTRUNGQUOC.VN) is an independent company and has no affiliation with Wiki Foundation.