Oscar Siegfried Henriquez (☆ 25 di september 1926 na Saba - † 11 di juli 2018 na Aruba) tabata un politico, gobernante, comerciante y empresario Arubano.
E tabata un di e fundadonan y icono di e desaroyo turistico di Aruba.
Pais di nashonalidat | Reino Hulandes |
---|---|
Nòmber di dilanti | Oscar |
Fam | Henriquez |
Fecha di nasementu | 25 sèptèmber 1926 |
Fecha di fayesimentu | 11 yüli 2018 |
Okupashon | politiko |
Oscar Henriquez tabata yu di P.I. Henriquez, na bida medico y hefe di e servicio di salubridad publico di Antias Hulandes, y J.D. Henriquez-van Dantzig. E tabata alumno di H. J. A. Schroedercollege na Emmastad na Corsou. Na 1939, ora su tata a retira, e famia a muda pa Aruba, unda el a bay Julianaschool y a gradua pa MULO. Despues na 1942 el a regresa Corsou, caminda el a obtene su HBS-B diploma na Peter Stuyvesant College. Na 1945 el a drenta servicio militar na Aruba.
Henriquez a cuminsa su carera den gobierno dia 1 di mart 1947 den e departamento di Finansa na e bestuurskantoor na Oranjestad. Banda di su trabou den e departamento aki, el a traha for di 1947 te ku 1950 como secretario di e Conseho di Polis (Raad van Politie) na Aruba, e precursor di e Conseho Insular. Na 1950 el a bai Merca pa un aña cu un beca di Nacionnan Uni, caminda el a sigui cursonan den finansa publico, administracion y administracion di personal. Na mei 1953 el a wordo nombra hefe interino di e departamento di Finansa. Durante e periodo aki el tabata activo pa hopi aña den diferente organisacion deportivo. E tabata, entre otro, miembro di directiva di Aruba Baseball Association, Aruba Boxing Commission y S.V. Caribe y durante cinco aña presidente di Arubaanse Sport Unie (ASU). E mes tabata practica deporte: tenis, futbol y schermen. Na 28 di januari 1956 el a casa cu Vera Croes, naci na Aruba. For di e matrimonio aki a nace tres yu muhe. Henriquez a fayece dia 11 di juli 2018 na edad di 91 aña.
Na 1949, Henriquez, hunto cu Juancho Irausquin, tabata fundado di e partido politico PPA. E tabata number 7 riba e lista di candidato pa eleccion 1955 y a keda elegi como miembro di conseho insular. Seguidamente e conseho insular a nombra Henriquez como diputado encarga cu asuntonan di finansa, asuntonan economico, salud publico y e empresa di awa y energia. Tambe Henriquez a bira e prome persona den historia di Aruba cu a keda encarga cu turismo como su cartera.
Como diputado den e Colegio Ehecutivo Henriquez tabata promotor di ampliacion di e base economico di Aruba. Un cantidad di proyecto grandi a wordo ehecuta, entre otro e Aruba Caribbean Hotel (awendia conoci como Hilton Aruba Caribbean Resort & Casino) y e construccion di un terminal nobo pa Aeropuerto prinsesa Beatrix. Tambe a traha riba extende y construi un pista di aterisahe nobo, haci e haf di Oranjestad adecua pa barco grandi di turista, amplia e produccion di awa y elektricidad WEB pa establecimiento di proyektonan industrial, dedica tereno na Barcadera pa establecimiento industrial y construi un haf industrial.
For di 1 di juli 1958 te cu 1 di maart 1960 el a ocupa e posicion di gezaghebber interino di Aruba. Durante su carera oficial e tabatin diferente funcion secundario, manera comisario di e Fondo General di Penshon di Antias Hulandes y director di Hotelmaatschappij N.V. Aruba. Na 1960, el a participa na e discusionnan preliminar na Den Haag, na nomber di Antias Hulandes, tocante e asociacion di Antias Hulandes cu E.E.G.. Na 1961 el a participa na e discusionnan di e Conferencia di Mesa Rondo (RTC) como asesor di Conseho di Minister di Antias.
Ora Irausquin a fayece inesperadamente na juni 1962, Henriquez a remplas'é como Minister di Finansa y Bienestar den e di tres gabinete Jonckheer (1962-1966). Ademas, hunto cu Ernesto Petronia, el a lidera PPA pa un tempo. El a retira como minister ora el a keda nombra gezaghebber di teritorio insular di Aruba. Henriquez a ocupa e funcion di 26 di april 1963 te cu 31 di desèmber 1972. Despues cu Aruba su status aparte a drenta na vigor dia 1 di januari 1986, el a sirbi como e presidente-comisario y prome comisario di gobierno den e conseho di comisario di Banco Central di Aruba.
Despues di a retira como gezaghebber Henriquez a pasa pa sector priva. Desde 1 di januari 1973 e tabata director adhunto di S.E.L. Maduro & Sons Aruba, perteneciente na e conglomerado Antiano di empresanan den industria di servisio marino, biahe y turismo. Despues el a bira director, un funcion cu el a mantene te 1988. Den e periodo di 1975 te 1984 e tabata tambe director di Maduro Holding, na Corsou. Henriquez tabata miembro di directiva di Camara di Comercio Aruba di 1974 te 1975. Despues di a bandona S.E.L. Maduro & Sons el a funda un compania di turismo y deporte acuatico bou nomber di Pelican Tours & Watersports. E negoshi di famia aki ta den operacion te dia di awe.
Fuente, nota i/òf referensia |
This article uses material from the Wikipedia Papiamentu article Oscar Henriquez, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). E kontenido ta disponé bou di CC BY-SA 4.0, a menos ku ta unique ta alkontrario. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Papiamentu (DUHOCTRUNGQUOC.VN) is an independent company and has no affiliation with Wiki Foundation.