Campo Alegre: Bordèl den aire liber na Kòrsou

E artíkulo aki ta skirbí na papiamentu. Lo ta apresiá si por mantené e artíkulo aki na estilo di papiamentu.

E kompleho ta establese riba un tereno ku tabata un kampamentu militar, situá na altura di Seru Fortunaweg serka di Aeropuerto Hato. El a kuminsa den añanan 40 di siglo 20 i tabata den operashon te ku 2020, momentu ku e virus di corona a brota i e negoshi a bai fayit. E tabata e kas di prostitushon legal di mas grandi den hemisferio oksidental.

Campo Alegre

Fecha di fundashon òf kreashon	30 mei 1949
Pais	Kòrsou
Koordinato geográfiko

Den añanan binti di siglo 20 refineria Isla ta habri na Kòrsou. Muhénan tabata migra pa e isla pa duna servisio na e trahadó petrolero i navegantenan riba e tankeronan. Den sentro di siudat tabatin muhénan prosedente di Venezuela, Colombia i Santo Domingo ku tabata operá durante añanan trinta i kuarenta di siglo 20. Den dekada kuarenta a konsekuensia di Guera Mundial II militarnan di marina hulandes i merikano a kuminsa yega e isla, oumentando e demanda pa prostituta. Aunke ku outoridatnan a impone un prohibishon riba prostitushon den sentro di Willemstad, e situashon tabata difisil pa por kontrola.

Pa solushona e problema gobernador ta instalá un komishon pa kombati prostitushon i malesa venériko na 1942, kual tabata inkluí representantenan di departamentu di salubridat publiko i klero. Sinembargo ta yega na e konklushon ku e mihor alternativa tabata pa konsentra prostitushon den un lugá leu for di sentro di siudat Willemstad. E plan tabata enserá ku e prostituta lo traha independientemente. Banda di esei ta pone regulashon estrikto na e permiso pa negoshi di prostitushon. E kompleho a habri 30 di mei 1949 bou di e nòmber Campo Alegre.

 

Inisialmente e muhénan di bida a wòrdu reklutá na Cuba i Venezuela. Nan tabata risibi un permiso pa traha pa 3 luna den e bordèl. Entre e final di dékada 1940 pa meimei di 1990, mitar di e prostitutanan tabata regresa pa traha otro 3 luna. Ta estimá ku 25.000 muhénan di bida a wòrdu emplea pa e establesimentu entre 1949 i 1990.

E kompleho, ku un superfisie di 72.000 m² na Cunucu Hatu i Seroe Fortuna, ta konsistí di diferente edifisio, entre otro un hotel ku aproksimadamente 156 kamber, tienda, restaurant, varios bar, un gimnasio, un pisina, ofisina i 45 lugá di parker. Ademas e tereno por stashona te 600 vehíkulo. E kompleho tabata propiedat di e kompania establesé na British Virgin Islands yama Wilshire Advisors Ltd. Na september 2023 gabinete Pisas a kumpra e kompleho na findishi pa 8 mion florin.

Riba enkargo di Ministerio Públiko Kòrsou (OM) e kompleho tabata desde 2022 den un proseso di benta na findishi, permitiendo un posibel kontinuashon di e negoshi di prostitushon bou di reglanan mas estrikto. Esaki tabata debi ku OM a pone beslag pa e sentensia na 2013, kaminda Wilshire Advisors Ltd. a keda kondená pa labamentu di plaka i mester paga 14 mion florin na hustisia. Na findishi dia 26 di september 2023 pais Kòrsou ta kumpra e propiedat pa 8 mion; esaki a okashoná un avalancha di kritika den media.

Mira tambe e kategoria Campo Alegre (Curaçao) di Wiki Commons pa mas dato mediatiko tokante di e tema aki.