ߥߣߊ߬ߝߊߙߊ߲߫ ߞߡߊ߬ߙߊ߫߸ (ߕߊߓߏ߲߫ ߥߣߊ߬ߝߊߙߊ߲߫ ߞߡߊ߬ߙߊ߫߸ ߥߟߊ߫ ߕߊߓߏ߲߫ ߥߊ߬ߣߊ߸ ߤߊߡߊ߲ߕߍ߫ ߥߊ߬ߣߊ ߒ ߕߋߟߋ߲ߡߊ߬)߸ ߕߘߍ߬ ߦߋ߫ ߕߊߓߏ߲߫ ߡߊ߲߬ߛߊ ߟߋ߬ ߘߴߊ߬ ߝߊ߬ ߟߊ߫ ߛߊ߬ߦߊ ߞߐ ߘߐ߫ ߞߊ߬ ߛߏ߰ߟߏ߲߬ߖߘߊ߫ ߕߏ߫ ߢߊߣߌ߲ߡߊߓߏߙߌ ߘߐ߫.
ߊ߬ ߞߍ߫ ߘߊ߫ ߡߊ߲߬ߘߋ߲߫ ߣߊ߲߬ߞߌ߲ ߘߌ߫ ߡߊ߲߬ߘߋ߲߫ ߞߍ߬ߟߍ ߟߎ߬ ߝߍ߬߸ ߣߊߟߌ߬ߡߎ߲߫ ߣߍ߰ߓߏ߬ߙߌ߬ߦߊ߫ ߞߟߊߓߍ߲ ߣߌ߫ ߞߊ߲ߞߌߢߍ߫ ߕߊ ߟߎ߬ ߣߌ߫ ߞߙߌߣߊ߬ ߞߟߊߓߍ߲߫ ߥߎ߬ߣߊ߲߬ߞߏߙߏ߲ ߟߎ߬ ߘߌ߫. ߊ߬ߟߋ ߟߋ߬ ߞߍ߫ ߘߴߊ߬ ߝߊ߬ ߕߎߙߋ߲ߓߋ߲߫ ߣߘߐ߬ߓߌߟߊߟߌ ߘߌ߫߸ ߛߏ߰ߟߏ߲߬ ߣߴߊ߬ ߘߋ߲ ߠߎ߬ ߥߊ߫ ߘߴߊ߬ߟߎ߫ ߞߎ߲߭ߞߊ߬ߙߌ߬ߝߊ߫ ߏ߬ ߡߍ߲ ߠߊ߫ ߕߊߓߏ߲߫.
ߥߣߊ߬ߝߊߙߊ߲߫ ߞߡߊ߬ߙߊ߬ ߞߵߊ߬ ߟߊ߫ ߘߋߣߍ߲ߦߊ ߞߍ߫ ߢߊ߬ߣߌ߲߬ߓߊ߫ ߟߋ߬ ߦߏ߫ ߡߊ߲߬ߘߋ߲߫ ߡߊ߲߬ߛߊ߬ߘߎ߯ߟߊ ߕߐ߭ ߟߎ߬ ߘߋ߲ ߠߎ߬ ߝߣߊ߫ ߕߘߍ߬ ߦߋ߫ ߡߍ߲ ߢߐ߲߰ ߞߍ߫ ߟߊ߫. ߊ߬ߟߋ ߞߊ߬ ߥߊ߯ߕߌ ߡߍ߲ ߞߍ߫ ߦߋ߲߬߸ ߊ߬ ߣߌ߫ ߡߊ߲߰ߖߘߊ߫ ߟߋ߬ ߞߍ߫ ߘߊ߫ ߛߋ߲߬ߘߏ߲߬ߢߐ߲߮ ߣߴߊ߬ ߕߋߙߌ ߘߌ߫ ߟߊߢߐ߲߯ߠߊ ߘߝߊߣߍ߲ ߘߐ߫. ߣߊߙߋ߲ߡߊ߲߰ ߛߊ߬ ߘߊ߫ ߞߵߊ߬ ߕߏ߫ ߟߊ߬ߡߐ ߏ߬ ߟߋ ߘߐ߫ ߦߋ߲߬߸ ߒ߬ߓߊ߬ ߘߊ߲߬ߞߊ߬ߙߊ߲߬ ߕߎߡߊ߫ ߛߌ߱ ߡߍ߲ ߞߍ߫ ߘߴߏ߬ ߣߐ߭ ߘߐ߫ ߛߊ߫߸ ߏ߬ ߟߋ ߞߵߊ߬ߟߎ ߓߍ߯ ߟߊߝߋߝߋ߫ ߦߴߊ߬ ߞߵߊ߬ ߖߍ߬ߘߍ ߓߊߘߋ߲ ߠߎ߬ ߕߊ ߞߍ߫ ߢߊ ߡߍ߲ ߡߊ߬.
ߛߏ߰ߟߏ߲߬ ߣߴߊ߬ ߘߋ߲ ߠߎ߬ ߛߋ ߕߊߓߏ߲߫ ߊ߬ߟߎ߬ ߟߊ߫ ߢߊߣߌ߲ߡߊߓߏߙߌ ߝߍ߬߸ ߊ߬ߟߎ߫ ߞߵߊ߬ ߕߘߍ߬ ߕߊ߲ߓߏ߲߫ ߥߣߊ߬ߝߊߙߊ߲߫ ߓߘߊ߫ ߞߐ߲߬ ߊ߬ߟߎ߬ ߢߍ߫ ߦߋ߲߬߸ ߊ߬ ߞߵߊ߬ ߛߙߊ߬ ߡߊ߲߰ߖߘߊ߬ ߟߊ߫ ߞߴߊ߬ ߞߐߛߊߦߌ ߦߋ߫ ߓߌ߬ߟߊ߬ ߊ߬ ߝߍ߬ ߦߋ߲߬߸ ߊ߬ ߦߴߊ߬ ߘߍ߬ߡߍ߲߬ ߝߊ߬ߛߏ ߘߍ߲ߖߘߍߟߊ߫ ߞߟߍ ߡߊ߬.
ߡߊ߰ߙߌ߫ ߖߊ߬ߘߊ߫ ߞߐߛߊߦߌ ߥߌ߬ߟߌ ߞߎ߲ߓߌ߫߸ ߊ߬ ߞߊ߬ ߗߋߘߋ߲ ߠߊߓߏ߬ߙߌ߫ ߞߊ߬ ߥߴߊ߬ ߣߊ߬ߞߏ ߝߐ߫ ߥߊ߬ߣߊ ߢߍ߫߸ ߏ߬ ߝߣߊ߫ ߞߊ߬ ߗߍ߬ߟߊ߬ߘߍ ߘߊߡߌ߬ߣߊ߬ ߊ߬ߟߎ߫ ߞߎ߲߬ߓߍ߲߬ ߞߊ߲ ߡߊ߬ ߦߊ߬ߣߌ߲߫ ߛߎߡߊߥߙߏ߫ ߘߏ߲߬ ߕߐ߫ ߊ߬ߟߎ߫ ߕߍ߫߸ ߞߏ߬ߣߌ߲߬ ߌ߬ߦߏ߯ ߞߟߋ߫߹ ߖߊ߱ ߏ߬ ߓߘߊ߫ ߓߊ߲߫ ߞߍ߫ ߟߊ߫. ߒ߬ߓߊ߬ ߕߊߓߏ߲߫ ߞߟߊߓߍ߲ ߟߊ߬ߥߛߊ ߛߐ߬ߘߐ߲ ߞߐ ߘߐ߫ ߛߏ߰ߟߏ߲߬ ߘߋ߲ ߓߟߏ߫߸ ߊ߬ߟߎ߫ ߥߊ߫ ߘߊ߫ ߕߏ߲ ߖߌ߰ ߕߊߓߏ߲߫߸ ߛߎߡߊߥߙߏ߫ ߞߊ߬ ߞߍ߬ߟߍ ߡߍ߲ ߠߊߥߟߌ߬ ߊ߬ߟߎ߫ ߞߟߍ߬ ߞߊ߲ ߡߊ߬ ߕߊߓߏ߲߫ ߦߋ߲߬ ߣߴߊ߬ߟߎ߫ ߓߍ߲߬ ߘߊ߫ ߣߍ߰ߓߏ߬ߙߌ߬ߦߊ߫߸ ߏ߬ ߟߋ ߞߍ߫ ߘߊ߫ ߥߊ߬ߣߊ ߟߊ߫ ߞߟߍ߬ ߝߟߐ ߘߌ߫ ߛߏ߰ߟߏ߲߬ ߘߋ߲ ߝߍ߬.
ߛߏ߬ߛߏ߫ ߓߊ߬ߟߊ߫ ߘߊ߬ߘߌ ߞߐ ߘߐ߫ ߕߊߓߏ߲߫߸ ߛߎߡߊߥߙߏ߫ ߖߍ߬ߘߍ ߞߊ߬ ߞߟߍ߬ߖߡߊ߬ߓߊ ߘߏ߫ ߘߐߓߍ߲߬ ߞߴߊ߬ ߥߊߕߐ߫ ߊ߬ߟߎ߫ ߕߘߍ߬ ߟߊ߫ ߕߊߓߏ߲߫ ߦߋ߲߬߸ ߞߏ߬ߣߌ߲߬ ߊ߬ ߓߐ߫ ߘߴߊ߬ ߞߊ߬ߟߊߡߊ߬ ߞߴߊ߬ߟߎ߫ ߓߘߊ߫ ߥߌ߬ߟߌ߫ ߦߋ߲߬߸ ߊ߬ ߞߊ߬ ߛߌߟߊ ߝߐ߬ߟߐ߲߫ ߦߋ߲߬ ߠߋ߬ ߞߊ߬ ߥߴߊ߬ߟߎ߫ ߘߊ߲߬ߕߍ߰; ߊ߬ߟߎ߬ ߥߊ߫ ߘߴߊ߬ ߟߊ߫ ߢߐ߲߯ ߕߍ߫ ߞߙߎ߬ ߝߌ߬ߟߊ߬ ߕߍ߯ߟߊ ߘߏ߫ ߘߐ߫߸ ߛߏ߰ߟߏ߲߬ ߘߋ߲ ߞߊ߬ ߞߍ߬ߟߍ ߟߊߓߙߊ߬ ߦߙߐ ߏ߬ ߡߎ߰ߡߍ ߘߐ߫ ߝߏ߫ ߞߊ߬ ߛߎߡߊߥߙߏ߫ ߓߊ߬ߟߌ߫ ߖߡߊ߬ߙߌ ߘߌ߫ ߟߴߊ߬ ߟߊ߫ ߛߏ߬ߝߊ ߟߎ߬ ߡߊ߬. ߞߍ߬ߟߍ ߏ߬ ߟߋ ߛߏ߲ߛߙߏߡߊ߫ ߘߴߊ߬ ߘߐ߫ ߥߏߎ߫߹ ߞߊ߬ ߜߊ߲߬ߜߊ߲ ߘߙߎ߬߸ ߜߊ߲߬ߜߊ߲ ߏ߬ ߦߋ߫ ߢߡߊߟߐ߬ ߟߊ߫ ߕߎ߬ߡߊ ߡߍ߲ ߠߊ߫߸ ߘߌ߯ ߓߘߊ߫ ߞߍ߫ ߛߏ߬ߛߏ߫ ߞߟߍ߬ߘߋ߲ ߠߎ߬ ߟߊ߫ ߘߏ߯ߣߍ߲߫ ߛߎߡߊߥߙߏ߫ ߕߎ߲߬ ߓߍ߫ ߢߌߣߌ߲߫ ߞߊ߬ ߕߏ߫ ߞߍ߬ߟߍ ߘߐ߫ ߝߴߊ߬ ߘߊ߬ߓߊߙߌ ߟߎ߬ ߟߋ߬ ߞߵߊ߬ ߟߊߕߟߊ߫ ߦߋ߲߬.
ߞߟߍ߬ ߝߟߐ ߏ߬ ߡߊ߲߬ߞߊ߲ ߕߋ߬ ߘߊ߫ ߝߊ߲߭ ߓߍ߯ ߟߊ߫߸ ߏ߬ ߞߍ ߞߟߍ߬ߘߋ߲ ߠߎ߬ ߦߋ߫ ߓߐ߫ ߟߊ߫ ߡߊ߲߬ߘߋ߲߫ ߝߊ߲߭ ߓߍ߯ ߘߐ߫ ߞߵߊ߬ߟߎ߫ ߞߎ߲߬ߓߍ߲߫. ߛߎߡߊߥߙߏ߫ ߕߎ߲߬ ߞߊ߬ ߞߟߍ߬ߓߏߟߏ߲ ߘߏ߫ ߕߏ߫ ߊ߬ ߘߐ߯ߞߍ߫ ߣߎ߲߬ߞߍ߬ߓߊ߫ ߞߊ߲ߕߍ߫ ߓߟߏ߫ ߛߏ߫߸ ߊ߬ ߞߐߛߊߦߌ ߞߵߏ߬ ߟߋ ߗߋ߫ ߛߏ߲߬ߖߘߊ߬ ߞߐ߫. ߒ߬ߓߊ߬ ߏ߬ ߟߎ߫ ߟߋ߬ ߥߊ߫ ߘߊ߫ ߓߙߊ߬ ߛߏ߲߬ߖߘߊ߬ ߘߐ߫ ߞߊ߲ߞߌߢߍ߫߸ ߏ߬ ߟߋ ߝߋ߲ ߠߊߝߟߌ߬ߣߍ߲ ߓߍ߯ ߡߊ߫ ߓߊ߲߫ ߦߋ߫ ߟߊ߫. ߣߎ߲߬ߞߍ߬ߓߊ߫ ߥߊ߫ ߘߴߊ߬ ߕߘߍ߬ ߛߏ߲߬ߖߘߊ߬ ߟߎ߫ ߡߊߞߍߣߍ߲߫ ߦߋ߫ ߞߊ߲ߞߌߢߍ߫ ߛߏ ߘߊߝߍ߬ ߦߙߐ ߘߏ߫ ߘߐ߫߸ ߞߊ߬ ߥߴߊ߬ߟߎ߫ ߘߊ߬ߘߌ߬ ߊ߬ߟߎ߫ ߞߊ߲߬ ߕߍ߮ ߏ߬ ߡߎ߰ߡߍ ߘߐ߫ ߛߎ ߘߓߌ߬ ߞߎߘߎ߲ ߘߐ߫; ߣߌ߫ ߡߍ߭ߡߊ߬ ߛߏ߬ߟߊ ߟߎ߬ ߕߎ߲߬ ߕߍ߫߸ ߣߌ߫ ߥߊ߱ߘߎ߬ ߞߟߍ߬ߓߏߟߏ߲ ߠߎ߬ ߕߎ߲߬ ߕߍ߫߸ ߖߊ߬ߘߊ ߓߏ߬ߙߌ߬ ߓߊߟߌ ߕߘߍ߬ ߘߌ߫ ߡߌ߬ߘߊ߬, ߞߏ߬ߣߴߊ߬ ߜߊ߬ ߘߊ߫ ߛߏ߬ߛߏ߬ߞߊ ߟߎ߫ ߡߊ߬ ߝߎߚߎ߫ ߝߴߊ߬ߟߎ߫ ߖߌ߰ߕߍ߰ߓߊ߰ߕߐ ߓߏ߬ߙߌ߬ ߘߊ߫ ߞߊ߬ ߛߏ߫ ߡߊߜߍ߲߫.
ߛߎߡߊߥߙߏ߫ ߛߌߟߊ߲߫ ߘߊ߫ ߞߊ߬ ߗߍ߬ ߟߊ߬ߘߍ߮ ߘߊߡߌ߬ߣߊ߬ ߛߴߊ߬ ߘߌ߫ ߘߊ߮ ߟߎ߬ ߛߌ߰ ߡߊ߲߬ߘߋ߲߫ ߓߐߕߏ߲ ߠߎ߬ ߝߍ߬߸ ߏ߬ ߘߊ߯ ߝߟߐ ߛߌ߰ ߘߊ߫ ߛߏ ߡߍ߲ ߠߊ߫ ߏ߬ ߟߋ ߞߍ߫ ߘߊ߫ ߓߊ߲ߕߊ߲߫ ߘߌ߫. ߛߏ߲߬ߖߘߊ߬ ߣߴߊ߬ ߢߌ߲߭ ߠߎ߬ ߓߐ߫ ߘߴߏ߬ ߟߋ ߞߊ߬ߟߊߡߊ߬߸ ߞߊ߬ ߛߏ߬ߙߌ߬ ߘߏ߲߬ ߠߴߊ߬ߟߎ߫ ߞߎߣߎ߲ߓߊߟߌ ߞߊ߲߫ ߞߊ߬ ߥߴߊ߬ߟߎ߫ ߓߐ߲߬ ߊ߬ߟߎ߫ ߞߎ߲߬ߠߊ߫߸ ߒ߬ߓߊ߬ ߛߎߡߊߥߙߏ߫ ߡߌ߬ߘߊ߬ ߕߐ߫ ߕߘߍ߬ ߦߴߏ߬ ߟߏ߲ ߠߋ߬ ߡߊ߬.
This article uses material from the Wikipedia ߒߞߏ article ߥߣߊ߬ߝߊߙߊ߲߫ ߞߡߊ߬ߙߊ߫, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). ߞߣߐߘߐ ߦߋ߫ CC BY-SA 4.0 ߟߊ߫ ߓߌ߬ߟߊ ߟߋ߬ ߘߐ߫߸ ߝߴߊ߬ ߛߌ߬ߣߊ߬ߦߊ߫ ߢߊߝߐߟߌ ߘߋ߬. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki ߒߞߏ (DUHOCTRUNGQUOC.VN) is an independent company and has no affiliation with Wiki Foundation.