ߝߎߕߊ߫-ߖߊ߬ߟߏ߲߫ ߝߌߟߊ ߟߎ߬
ߝߌߟߊ ߟߎ߬ ߘߏ߲߭ ߘߊߡߌ߬ߣߊ߬ ߘߊ߫ ߖߌ߬ߣߍ߫ ߝߊ߯ߘߐߞߍ߫ ߁߇߲ ߠߋ߬ ߟߊ߫߸ ߊ߬ߟߎ߬ ߥߊ߫ ߘߴߊ߬ ߕߘߍ߬ ߖߊ߬ߟߏ߲߬ߞߊ ߟߎ߬ ߣߌ߫ ߖߊ߲߬ߞߊ߲߬ߞߊ ߟߎ߬ ߣߌ߫ ߞߏ߲ߦߌ߲ߞߊ ߟߎ߬ ߣߌ߫ ߛߏ߬ߣߌ߲߬ߞߋ ߟߎ߬ ߟߋ߬ ߦߋ߫ ߖߊ߬ߟߏ߲߬ ߘߎ߯ߞߟߏ ߞߊ߲߬.
ߊ߬ߟߎ߫ ߣߊ߬ ߘߊ߫ ߛߌ߰ߦߌߟߊ ߢߌߣߌ߲߫ ߊ߬ߟߎ߫ ߟߊ߫ ߛߌ߰ߢߐ߲߰ ߓߘߍ߬ߦߊ ߟߊ߫߸ ߊ߬ߟߎ߬ ߛߌߦߊߦߊ ߘߊߡߌ߬ߣߊ߬ߣߍ߲߸ ߊ߬ߟߎ߫ ߥߙߊ߬ ߘߴߊ߬ߟߎ߫ ߡߊ߬ ߞߊ߬ ߖߡߊ߬ߣߊ ߡߙߊ߬ߞߏ ߡߙߌߦߊ ߕߊ߭ ߘߊߡߌ߬ߣߊ߫߸ ߒ߬ߓߊ߬ ߏ߬ ߟߋ߬ ߞߍ߫ ߘߊ߫ ߟߊ߲߬ߔߊ߯ߛߌ ߏ߬ ߟߎ߫ ߖߍ߲ߛߍ߲ ߘߌ߫ ߞߵߊ߬ߟߎ ߕߏ߫ ߦߋ߲߬ ߛߊ߫߸ ߊ߬ߟߎ߫ ߞߊ߬ ߝߎ߯ߕߊ߫ ߕߊ߬ ߞߊ߬ ߖߊ߬ߟߏ߲߬ ߟߴߊ߬ ߞߊ߲߬ ߞߏ߫ (ߝߎ߯ߕߊ߫-ߖߊ߬ߟߏ߲߫).
ߖߊ߬ߟߏ߲߫ ߟߊ߲߬ߔߊ߯ߛߌ ߟߎ߬
ߖߊ߬ߟߏ߲߬ ߖߡߊߣߊ ߕߘߍ߬ ߦߋ߫ ߡߊ߲߬ߘߋ߲߫ ߝߊ߰ߡߊ߬ߟߊ ߞߊ߬ߝߏ ߘߏ߫ ߟߋ߬ ߘߌ߫ ߡߍ߲ ߠߎ߬ ߕߘߍ߬ ߘߊ߫ ߡߊ߲߬ߘߋ߲߫ ߞߟߍ ߟߎ߬ ߘߐ߫߸ ߞߍߙߍ߲ߞߍߙߍ߲ߣߌ߲ߦߟߊ߫ ߞߙߌߣߊ߬ ߞߟߊߓߍ߲ ߣߌ߫ ߘߏ߫ ߜߘߍ߫ ߟߎ߫. ߞߍ߬ߟߍ ߞߐ ߘߐ߫߸ ߡߊ߲߬ߘߋ߲߫ ߕߘߍ߬ ߦߋ߫ ߞߎ߲߬ߠߊ߬ߛߌ߰ߟߊ ߟߥߊ߫ ߟߊ߫ ߦߋ߲߬ ߛߐ߲߬ ߞߘߊߎ߫ ߡߍ߲ ߠߎ߬ ߕߘߍ߬ ߞߍ߫ ߟߊ߫ ߖߊ߲߰ߞߊ ߟߎ߬ ߣߌ߫ ߞߏߦߌ߲ߞߊ ߟߎ߬ ߘߌ߫ ߞߍ߬ߣߍ߲߸ ߤߊ߲߯ ߏ߬ ߥߊ߫ ߘߊ߫ ߟߊߓߊ߲߫ ߏ߬ ߟߎ߬ ߟߊ߫ ߛߌ߰ߟߌ ߡߊ߬ ߦߋ߲߬ ߠߎ߬ ߘߐ߫.
ߛߎߡߊߥߙߏ߫ ߞߊ߲ߕߍ߫ ߘߊ߬ߘߌ߬ߣߍ߲ ߞߙߌߣߊ߬ ߞߟߊߓߍ߲ ߘߐ߫ ߁߂߃߆ ߟߊ߫߸ ߏ߬ ߞߍ߫ ߘߊ߫ ߞߎ߲߬ߠߊ߬ߖߌ߮ ߘߌ߫ ߛߏ߬ߛߏ߫ ߡߙߊ߬ߓߊ߮ ߟߎ߬ ߣߌ߫ ߞߎߓߋߘߊ ߛߌ߰ߓߊ߮ ߟߎ߬ ߞߊ߲߬߸ ߞߊ߬ ߝߎ߲ߘߌ߫ ߞߊ߬ ߥߊ߫ ߖߊ߬ߟߏ߲߫ ߖߡߊߣߊ ߘߐ߫. ߏ߬ ߟߎ߬ ߥߊ߫ ߘߊ߫ ߢߊߛߎߡߊ߫ ߦߋ߲߬ ߥߊ߯ߕߌߖߊ߲ ߞߘߐ߫߸ ߏ߬ ߟߎ߫ ߕߎ߲߬ ߓߘߊ߫ ߝߟߐ߫ ߡߊ߬ߣߌ߲߬ߞߊ߬ߞߊ߲ ߓߌ߬ߟߊ߬ ߟߊ߫ ߞߊ߬ ߖߊ߬ߟߏ߲߬ߞߊ߬ߞߊ߲ ߕߊ߬.
ߝߌߟߊ ߟߎ߬ ߞߎ߲߬ߓߐ
ߝߌߟߊ ߟߎ߬ ߟߊ߫ ߘߏ߲߬ߠߌ߲ ߘߐ߬ߝߐ ߟߐ߲ߣߍ߲߫ ߕߍ߫ ߒߠߋ ߖߍ߬ߘߍ ߓߟߏ߫ ߡߎߣߎ߲߬߸ ߊ߬ ߞߏ߬ߣߌ߲ ߟߐ߲ߣߍ߲߫ ߦߋ߫ ߞߏ߫ ߝߌߟߊ߫ ߛߏ߫ ߝߟߐ ߡߍ߲ ߟߐ߬ ߘߊ߫ ߝߎߕߊ߫ ߖߊ߬ߟߏ߲߫߸ ߞߴߏ߬ ߟߋ ߦߋ߫ ߕߌ߲߬ߓߏ߲߫ ߘߌ߫.
ߝߌߟߊ ߟߎ߬ ߣߴߊ߬ߟߎ߫ ߟߊ߫ ߣߛߌ߬ ߞߙߎ ߟߎ߬ ߟߋ߬ ߣߊ߬ ߘߊ߫ ߖߊ߬ߟߏ߲߫߸ ߊ߬ ߣߴߊ߬ߟߎ߫ ߘߋ߲ߡߛߏ߫ ߗߋ߲߰ߓߊ ߟߎ߫߸ ߞߏ߫ ߝߌ߬ߟߊ ߏ߬ ߟߎ߫ ߟߋ߬ ߞߊ߬ ߝߊ߲߬ߞߊ߬ ߘߌ߫ ߝߌߟߊ ߟߎ߬ ߡߊ߬ ߖߊ߬ߟߏ߲߬ ߛߌ߮ ߘߐ߫ ߞߏߛߓߍ߫߸ ߓߊ ߏ߬ ߞߵߊ߬ ߕߘߍ߬ ߣߛߌ߬ ߞߏ ߘߐߓߎ߰ߣߍ߲߫ ߕߍ߫ ߡߊ߲߬ߘߋ߲߫ ߘߎ߯ߞߟߏ ߞߊ߲߬ ߓߊߞߍ߫.
ߝߌߟߊ ߟߎ߬ ߞߵߊ߬ߟߎ߫ ߘߋ߲ߡߛߏ߫ ߛߎ߲ߞߎߘߎ߲߫ ߗߋ߲߱ ߠߎ߬ ߘߌ߫ ߖߊ߬ߟߏ߲߬ߞߊ߫ ߞߊ߯ߝߙߌ ߟߎ߬ ߡߊ߬ ߝߘߎ ߟߊ߫߸ ߏ߬ ߞߍ ߏ߬ ߟߎ߫ ߞߵߊ߬ߟߎ ߟߊߝߌ߬ߛߊ߬ߦߊ ߘߊߡߌ߬ߣߊ߬ ߒ߬ ߓߊߘߋ߲ ߛߏ߬ߛߏ ߟߎ߬ ߘߌ߫߸ ߞߊ߬ ߕߴߏ߬ ߟߎ߫ ߟߊߥߟߌ߬ ߟߊ߫ ߛߣߍ߬ߞߍ߬ ߘߎ߰ ߓߘߍߓߘߍ ߟߎ߬ ߞߊ߲߬ ߞߵߏ߬ ߟߎ߬ ߘߌ߫ ߝߌߟߊ ߟߎ߬ ߡߊ߬߸ ߝߌߟߊ ߟߎ߬ ߕߊ߬ߡߌ߲߬ ߘߊ߫ ߘߐߝߎߙߋ߲߫ ߠߊ߫ ߞߊ߬ ߛߏ߬ߛߏ ߟߎ߬ ߘߐߜߙߐ߬߸ ߞߵߏ߬ ߟߎ߬ ߓߐ߫ ߡߐ߰ߘߐ߬ߜߍ߬ߦߊ ߟߊ߫ ߞߵߊ߬ߟߎ߫ ߞߍ߫ ߡߐ߰ ߡߊߖߌ߰ߣߍ߲ ߠߎ߬ ߘߌ߫; ߛߏ߬ߛߏ ߟߎ߬ ߞߵߊ߬ߟߎ߫ ߢߊ ߡߊߖߌ߰ ߏ߬ ߟߋ ߝߍ߬ ߞߊ߬ ߥߟߌ߬ ߖߊ߬ߟߏ߲߫ ߞߊ߬ ߦߌ߬ߙߌ߲߬ߘߌ߫ ߞߐ߰ߖߌ߬ߘߊ ߟߊ߫ ߞߊ߬ ߥߴߊ߬ߟߎ߫ ߡߊߖߌ߰ ߓߜ߭ߊ ߟߎ߬ ߝߍ߬ ߦߋ߲߬߸ ߏ߬ ߟߋ ߞߵߏ߬ ߟߎ߬ ߟߊߛߋ߫ ߞߐ߰ߖߌ߬ߘߊ ߟߊ߫ ߦߋ߲߬߸ ߡߍ߲ ߞߍߣߍ߲߫ ߘߌ߫ ߞߍ߫ ߝߊ߯ߘߐߞߍ߫ ߁߇߲ ߣߌ߫ ߁߈߲ ߠߎ߬ ߘߏ߫ ߘߐ߫ ߞߋߟߋ߲߫ ߠߊ߫.
ߓߍ߯ ߘߏ߲߬ ߞߵߊ߬ ߟߐ߲߫ ߞߏ߫ ߝߐߢߐ߲߯ߞߐ ߟߋ߬ ߦߋ߫ ߛߣߍ߬ߞߍ߬ߟߊ ߣߌ߫ ߓߌߦߊ߲ߕߌ߮ ߟߎ߬ ߕߍ߫ ߛߐ߲߬ ߞߘߊߎ߫. ߒ߬ߓߊ߬ ߜߐ߬ߛߐ߲߬ߞߐ ߏ߬ ߟߎ߫ ߥߟߌ߬ߣߍ߲ ߝߌߟߊ ߟߎ߬ ߣߌ߫ ߟߊ߲߬ߔߊ߯ߛߌ ߟߎ߬ ߕߍ߫߸ ߝߌߟߊ ߟߎ߬ ߕߘߍ߬ ߦߋ߫ ߣߌ߬ߛߌ ߟߋ߬ ߘߌ߫ ߟߊ߫ ߞߎ߲߬ߠߊ߬ߛߌ߰ߟߊ ߟߎ߬ ߡߊ߬ ߛߐ߲߬ ߛߴߏ߬ ߟߎ߬ ߘߌ߫ ߞߕߌ ߘߌߦߴߊ߬ߟߎ߫ ߟߊ߫߸ ߞߵߊ߬ ߕߘߍ߬ ߟߌ ߟߋ߬ ߕߘߍ߬ ߦߋ߫ ߞߍ߫ ߟߴߏ߬ ߟߎ߫ ߟߊߘߌߦߊ߫ ߝߋ߲ ߘߌ߫ ߞߘߐ߬ߡߊ߲߫߸ ߏ߬ ߟߎ߬ ߘߌ߫ ߖߏ ߘߌ߫ ߕߎߙߊߣߍ߲߫ ߕߌ߮ ߡߊ߬: ߏ߬ ߟߋ ߛߌߦߊߦߊ߫ ߘߊ߫ ߝߎߚߎ߫ ߝߏ߫ ߖߊ߬ߡߊ ߖߍ߲ߛߍ߲߫ ߘߊ߫ ߞߊ߬ ߕߊ߬ߡߌ߲߬ ߞߣߍ ߘߐߞߊ߬ ߟߊ߫ ߝߌߟߊ ߟߎ߬ ߢߍ߫߸ ߡߍ߲ ߠߎ߬ ߓߊ߯ ߘߐߜߍ߬ߘߍ߲߬ ߥߟߊ߫ ߞߊ߬ ߡߊߝߋ߬ߙߋ߲߬ߝߋߙߋ߲߫߸ ߏ߬ ߟߎ߬ ߘߌ߫ ߥߊ߫, ߝߴߊ߬ ߣߊ߬ ߘߊ߫ ߟߊߓߊ߲߫ ߛߊ߲߬ߘߊ ߡߊ߬ ߞߏ߫ (ߕߎߙߊߣߍ߲ ߓߘߊ߫ ߟߌߘߊ߮ ߘߐߕߋ߬).
ߖߊ߬ߟߏ߲߬ߞߊ ߟߎ߬ ߟߊߝߋߝߋ
ߝߌߟߊ ߟߎ߬ ߛߌߦߊߦߊߣߍ߲ ߖߊ߬ߟߏ߲߬ߞߊ ߟߎ߬ ߡߊ߬߸ ߏ߬ ߞߵߊ߬ ߕߘߍ߬ ߒ߬ ߓߘߊ߫ ߡߊ߲߬ߘߋ߲߬ ߛߌߦߊ ߝߊ߲߬ߓߊ ߓߍ߯ ߓߘߊ߫ ߦߋ߲߬ ߘߐߞߊ߬ ߞߵߊ߬ ߕߴߊ߬ ߝߊ߬ߙߊ߲߬ߝߊ߬ߙߊ߲߬ߠߊ ߟߎ߬ ߣߌ߫ ߖߊ߬ߟߏ߲߬ߞߊ ߟߎ߬ ߡߊ߬߸ ߝߌߟߊ ߟߎ߬ ߥߙߊ߬ ߘߊ߫ ߖߊ߬ߟߏ߲߬ߞߊ ߟߎ߬ ߡߊ߬ ߤߊ߲߯ ߞߵߊ߬ ߟߊߓߊ߲߫ ߊ߬ߟߎ߬ ߟߊߝߋߝߋ ߡߊ߬߸ ߡߍ߲ ߠߎ߬ ߛߐ߲߬ ߘߊ߫ ߝߌߟߦߊ ߣߌ߫ ߝߌߟߊ߫ ߡߙߊ ߟߎ߬ ߡߊ߬߸ ߏ߬ ߟߎ߫ ߓߊ߬ߛߊ߲߬ ߘߊ߫ ߝߌߟߊ ߟߎ߬ ߟߊ߫; ߡߍ߲ ߠߎ߬ ߡߊ߫ ߛߐ߲߬ ߝߌߟߊ߫ ߡߙߊ ߡߊ߬߸ ߟߎ߫ ߘߏ߲߬ ߘߊ߫ ߡߊ߲߬ߘߋ߲߫ ߞߙߎ߫ ߝߌ߬ߟߊ߬ ߟߎ߫ ߘߌ߫: ߞߙߎ ߞߋߟߋ߲ ߥߊ߫ ߘߊ߫ ߛߌ߯ߙߌ߲߫ ߞߎ߲߬ߕߋߟߋ߲ ߘߐ߫ ߞߊ߬ ߥߴߊ߬ߟߎ߫ ߛߌ߰ ߞߙߎ߬ߞߊ߲߬ ߖߡߊߣߊ ߘߐ߫߸ ߊ߬ ߦߋ߫ ߝߐ߫ ߟߴߏ߬ ߟߎ߫ ߡߊ߬ ߦߋ߲߬ ߝߛߊߦߌ߫ ߞߏ߫ ߖߊ߬ߟߏ߲߬ߞߊ ߟߎ߫߸ ߞߵߊ߬ ߕߘߍ߬ ߊ߬ߟߎ߬ ߕߍ߫ ߖߊ߬ߟߏ߲߬ߞߊ߬ߞߊ߲ ߡߍ߲ ߠߊ߫ ߞߎߡߊ߫ ߕߍ߫ ߞߴߊ߬ߟߎ߫ ߘߴߊ߬ ߝߐ߫; ߞߙߎ߫ ߝߌߟߊߣߊ߲ ߠߎ߬ ߥߊ߫ ߘߴߊ߬ߟߎ߫ ߛߌ߰ ߛߊ߲ߞߊߙߊ߲ߞߊ ߟߎ߬ ߝߍ߬ ߛߊ߲ߞߊߙߊ߲߫ ߥߎߟߊ ߞߣߐ߫߸ ߒ߬ߓߊ߬ ߏ߬ ߟߎ߫ ߟߋ߬ ߦߋ߫ ߘߊߓߏߟߊ߫ ߣߌ߫ ߝߙߊߣߊ߫ ߟߎ߫ ߣߌ߫ ߛߙߊ߬ߟߏ߲߫ ߞߐ߬ߘߎ߮ ߘߐ߫߸ ߒ߬ߓߊ߬ ߏ߬ ߟߎ߫ ߟߋ߬ ߦߋ߫ ߖߊ߬ߟߏ߲߬ߞߊ߬ߞߊ߲ ߝߐ߫ ߟߊ߫, ߒ߬ߞߵߊ߬ߟߎ߫ ߣߌ߫ ߛߏ߬ߛߏ ߟߎ߬ ߟߊ߫ ߞߊ߲߫ ߞߋߟߋ߲߫ ߝߐ ߣߴߊ߬ ߕߊ߫߸ ߊ߬ߟߎ߫ ߣߌ߫ ߡߊ߬ߣߌ߲߬ߞߊ ߟߎ߬ ߟߋ߬ ߦߋ߫ ߞߏ߫ ߡߊ߬.
ߖߊ߲ߞߌߥߊ߯ߟߌ߫ ߞߟߍ ߓߊ߲ߣߍ߲ ߝߌߟߊ ߟߎ߬ ߣߌ߫ ߞߏߦߌ߲ߞߊ ߟߎ߬ ߓߟߏ߫߸ ߝߌߟߊ ߟߎ߬ ߕߊ߬ߡߌ߲߬ ߘߊ߫ ߣߌ߬ߣߌ߬ ߟߊ߫ ߓߘߍߞߍ߭ ߞߊ߬ ߞߏ ߓߍ߯ ߝߌߟߊ߫ ߞߍ߫ ߞߵߊ߬ ߝߌߟߊ߫ ߝߐ߫߸ ߞߏߦߌ߲ߞߊ ߟߎ߬ ߝߣߊ߫ ߞߵߏ߬ ߦߋ߫ ߘߌ߬ߢߍ߬ߒ߬ߡߊ߬ߓߊߟߌ ߘߌ߫ ߞߊ߬ ߦߋ߲߬ ߘߐߞߊ߬ ߞߊ߬ ߖߌ߰ ߞߐ߰ߖߌ߬ߘߊ ߟߊ߫߸ ߏ߬ ߟߎ߫ ߟߋ߬ ߦߋ߫ ߞߟߌ߫ ߟߊ߫ ߛߏ߬ߛߏ߬ߞߊ߲ ߘߐ߫ ߞߏ߫ ߡߜ߭ߌ߬ߝߏߙߋ (ߡߐ߰ ߝߌ߲ ߠߎ߬) ߟߎ߫.
ߒ߬ߓߊ߬ ߝߌߟߊ ߟߎ߬ ߘߛߍ߫ ߘߊ߫ ߟߊ߲߬ߔߊ߰ߛߌ ߡߍ߲ ߠߎ߬ ߟߊ߫ ߞߟߍߞߕߍ߫߸ ߏ߬ ߟߋ ߦߋ߫ ߖߊ߲߰ߞߊ ߟߎ߬ ߣߌ߫ ߛߏ߬ߣߌ߲߬ߞߋ ߟߎ߬ ߣߌ߫ ߞߎ߯ߙߎ߫ ߡߊߣߌ߲ߞߊ ߟߎ߬ ߣߌ߫ ߎߙߋߞߓߊ߫ ߡߊߣߌ߲ߞߊ ߟߎ߬ ߘߌ߫. ߓߊߏ߬ ߊ߬ߟߎ߬ ߣߌ߫ ߡߙߊ߬ߞߊ ߟߎ߬ ߣߌ߫ ߖߊ߲߰ߞߊ ߟߎ߬ ߓߍ߯ ߕߘߍ߬ ߦߋ߫ ߘߌ߯ߣߊ߫ ߞߋߟߋ߲ (ߛߌ߬ߟߊ߬ߡߊ) ߠߋ߬ ߘߐ߫ ߊ߬ ߣߴߊ߬ߟߎ߫ ߓߟߏߡߟߊߣߍ߲߫ ߕߘߍ߬ ߦߋ߫ ߘߊ߬ߟߎ߫ ߞߋߟߋ߲ ߠߎ߬ ߟߋ߬ ߡߊ߬ ߣߊߟߌ߬ߡߎ߲߫ ߡߏߙߌߦߊ ߘߌ߫.
ߦߟߌߡߊߛߙߋ ߟߎ߬
This article uses material from the Wikipedia ߒߞߏ article ߝߎߕߊ߫-ߖߊ߬ߟߏ߲߫ ߝߌߟߊ ߟߎ߬, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). ߞߣߐߘߐ ߦߋ߫ CC BY-SA 4.0 ߟߊ߫ ߓߌ߬ߟߊ ߟߋ߬ ߘߐ߫߸ ߝߴߊ߬ ߛߌ߬ߣߊ߬ߦߊ߫ ߢߊߝߐߟߌ ߘߋ߬. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki ߒߞߏ (DUHOCTRUNGQUOC.VN) is an independent company and has no affiliation with Wiki Foundation.