ߞߣߍߞߍ߸ ߥߟߊ߫ ߝߎߥߟߊ߫ ߕߊ߮߸ ߤߊߡߊ߲ߕߍ߫ ߗߍ߬ߓߊ߬ߦߊ ߦߋ߫߸ ߏ߬ ߦߋ߫ ߘߎߢߊ߫ ߝߘߏ߬ߓߊ߬ ߞߏ ߟߋ߬ ߘߌ߫ ߡߐ߱ ߟߎ߬ ߟߊ߫ ߟߊ߲߬ߘߊ ߘߐ߫߸ ߊ߬ߟߋ߬ ߦߋ߫ ߞߍ߫ ߟߊ߫ ߗߍ߬ߡߊ߲ ߠߎ߬ ߟߋ߬ ߟߊ߫ ߘߎߢߊ߫ ߝߊ߲߭ ߓߍ߯ ߘߐ߫߸ ߒ߬ߞߊ߬ ߡߏ߬ߛߏ ߟߎ߬ ߝߣߊ߫ ߦߋ߫ ߓߌ߬ߟߊ߬ ߟߊ߫ ߞߐ߬ ߘߐ߫ ߘߎߢߊ߫ ߝߊ߲߭ ߘߏ߫ ߟߎ߫ ߘߐ߫.
ߊ߬ ߞߍߢߊ ߣߴߊ߬ ߥߎ߬ߛߎ ߟߎ߬ ߦߋ߫ ߝߘߏ߬ ߟߊ߫ ߢߐ߲߮ ߡߊ߬ ߦߙߐ ߟߎ߬ ߣߌ߫ ߢߐ߲߯ ߕߍ߫߸ ߒ߬ߞߊ߬ ߞߎߡߘߊ ߣߌ߲߬ ߞߎߡߊ߫ ߕߐ߫ ߦߴߊ߬ ߞߍ߫ ߢߊ ߟߋ߬ ߞߊ߲߬ ߒ߬ ߓߘߊ߫ ߡߊ߲߬ߘߋ߲߬ ߖߡߊߣߊ ߟߎ߬ ߘߐ߫. ߏ߬ ߡߍ߲ ߦߋ߫ ߘߊߡߌ߬ߣߊ߫ ߟߊ߫ ߕߊ߲߬ߓߊ߬ߡߊ߬ߞߏ ߡߊ߬߸ ߞߊ߬ ߥߊ߫ ߛߋ߫ ߛߏ߬ߟߌ߬ߛߌ ߡߊ߬߸ ߞߊ߬ ߥߊ߫ ߓߌ߬ߟߊ߬ ߗߍ߬ߓߊ߬ߦߊ ߟߊ߫߸ ߞߊ߬ ߝߊߘߌߝߊߘߌ ߣߌ߫ ߛߍ߯ߡߦߊ ߣߌ߫ ߖߐ߲ߓߌߢߣߊ ߕߎ߲߰ ߏ߬ ߟߎ߫ ߟߊ߫߸ ߞߊ߬ ߣߊ߬ ߛߋ߫ ߞߐ߬ߟߊ߬ߞߊߘߌ ߣߌ߫ ߞߐ߬ߥߟߎ߬ ߞߏ ߟߎ߬ ߡߊ߬߸ ߞߊ߬ ߣߵߊ߬ ߞߎ߲߭ߘߏ߲߬ ߕߐ߲߫ ߓߌߟߊ ߣߌ߫ ߓߎ߬ߙߋ߬ߟߊ߬ߞߊߘߌ ߟߎ߫ ߡߊ߬ ߛߊ߫.
ߝߟߐ߫ ߕߘߍ߬߸ ߒ߬ ߠߊ߫ ߡߌ߬ߙߌ߲߬ߘߌ ߕߘߍ߬ ߕߴߊ߬ ߘߋ߲ ߠߊߖߌ߰ ߟߊ߫ ߝߴߊ߬ ߓߊ߯ ߞߊߡߋߙߋ߲ߧߊ߫ ߕߎ߬ߡߊ ߡߍ߲ ߠߊ߫߸ ߏ߬ ߟߋ ߕߘߍ߬ ߦߴߊ߬ ߞߍ߫ ߟߴߊ߬ ߞߏ ߓߍ߯ ߓߎ߲ߓߎ߲߫ ߘߊ߫ ߒ߬ ߠߊ߫ ߣߊߡߎ߲ ߠߎ߬ ߓߟߏߦߊ ߡߴߊ߬ ߝߍ߬.
ߡߍ߲ ߟߐ߬ ߕߐ߫ ߦߋ߫ ߕߊ߲߬ߓߊ߬ߡߊ߬ߞߏ ߟߋ߬ ߡߊ߬ ߛߊ߫߸ ߊ߬ߟߋ ߕߘߍ߬ ߦߋ߫ ߞߍ߫ ߟߊ߫ ߞߍߣߍ߲ߘߋ߲ ߠߎ߬ ߢߡߊߣߍ߬ߣߍ ߣߴߊ߬ߟߎ߫ ߟߛߊߣߌ߲ߧߊ ߟߎ߬ ߟߋ߬ ߡߊ߬߸ ߓߊߏ߬ ߓߌ߬ߟߊ߬ߞߙߏ ߛߊ߲߬ ߁߈ ߣߌ߫ ߂߅ ߕߍߟߊ ߦߴߊ߬ ߕߘߍ߬ ߟߊ߫ ߟߋ߬ ߥߊ߬ߖߊ (ߝߙߐ ߞߎ߲߬ߠߊ߫ ߝߎ߯ߟߊ) ߞߘߐߟߊ ߓߘߊ߫ ߣߐ߯ ߗߘߍ߬ߓߏ (ߣߐ߮ ߡߍ߲ ߦߋ߫ ߞߍ߫ ߟߊ߫ ߓߌ߬ߟߊ߬ߞߙߏ ߥߊ߬ߖߊ ߞߘߐߟߊ ߘߐ߫ ߗߘߍ߬ ߝߏߟߏ߲ ߘߐ߫) ߟߎ߬ ߟߊ߫߸ ߏ߬ ߟߋ ߕߘߍ߬ ߦߋ߫ ߟߛߊߣߌ߲ߧߊ߫ ߟߊ߫ ߕߊ߲߬ߓߊ߬ߡߊ߬ߞߏ ߘߐ߫߸ ߡߍ߲ ߞߘߐ ߖߍ߬ߘߍߖߍ߬ߘߍ ߦߋ߫ ߥߊ߬ߖߊ ߞߘߐߟߊ ߛߊߣߌ߲ߧߊ ߘߌ߫ ߛߊ߫ ߢߐߛߌ߫ ߞߘߐ ߏ߬ ߟߎ߬ ߞߊߣߊ߬ ߓߌ߬ߟߊ߬ ߖߋߟߌ߫ ߞߎߘߊ߫ ߟߕߊ ߘߐ߫ ߞߵߊ߬ ߘߊ߲ߘߊ ߜߟߍ߬ߦߊ߫.
ߊ߬ߟߋ ߦߋ߫ ߞߘߐߘߌߦߊ߫ ߟߊ߫ ߛߎ߬ߡߊ߲߬ ߘߌߡߊ߲ ߠߎ߬ ߘߐߓߍ߲߭ ߠߋ߬ ߟߴߊ߬ߟߎ߫ ߢߍ߫߸ ߞߵߏ߬ ߟߊߓߊ߲߫ ߛߎ ߓߊ߲߫ ߕߏߟߏ߲ ߡߊ߬ ߥߟߊ߫ ߛߏ߬ߟߌ߬ߛߌ߸ ߏ߬ ߟߋ ߝߣߊ߫ ߦߋ߫ ߟߊߓߊ߲߫ ߠߊ߫ ߗߍ߬ߓߊ߬ߦߊ ߡߊ߬ ߛߐ߱ߡߊ߬ ߛߊ߫.
ߝߊ߰ߣߌ߲߫ ߝߌ߬ߟߊ߫ ߟߋ߬ ߦߋ߫ ߞߙߊ߫ ߟߊ߫ ߞߍߣߍ߲ߘߋ߲ ߠߎ߬ ߢߍ߫߸ ߞߵߏ߬ ߞߴߊ߬ߟߎ߫ ߥߣߊ߬ߙߌ߬ߟߊ߲ ߘߌ߫ ߓߎ߬ߙߋ ߟߊ߫. ߝߊ߰ߣߌ߲߫ ߝߌ߬ߟߊ ߏ߬ ߟߎ߫ ߟߋ߬ ߦߋ߫ ߦߙߌ߬ߞߌ߬ߓߊ ߣߌ߫ ߞߍߣߍ߲ߘߋ߲߫ ߝߎ߯ߟߊ ߟߎ߬ ߘߌ߫. ߘߙߌ߬ߞߌ߬ߓߊ ߏ߬ ߦߋ߫ ߘߐߝߎߟߋ߲߫ ߠߊ߫ ߟߋ߬ ߞߍߣߍ߲ߘߋ߲ ߠߎ߬ ߡߊ߬ ߛߴߊ߬ߟߎ߬ ߘߴߊ߬ߟߎ߫ ߟߊ߫ ߓߎ߬ߙߋ ߟߊߕߊ߬ߡߌ߲߫ ߣߐ߰ߦߊ߬ ߘߐ߫.
ߝߎ߯ߟߊ ߛߊ߫߸ ߏ߬ ߦߋ߫ ߞߙߊ߫ ߟߊ߫ ߞߵߊ߬ ߞߍ߫ ߝߎ߯ߟߊ߫ ߖߊ߲ ߘߏ߫ ߟߋ߬ ߘߌ߫ ߗߏ߲߫߸ ߓߊ߲߬ߝߊߟߌߝߊߟߌ ߦߋ߫ ߞߐߞߙߎ߬ ߟߊ߫ ߛߐ߲߬ ߘߵߊ߬ ߘߏ߲߬ ߊ߬ߟߎ߬ ߞߣߐ߫ ߛߴߊ߬ ߘߴߊ߬ ߟߐ߬ ߗߊ߫߹ ߜߟߋ߬ߞߋ߬ (ߜߘߋ߫) ߡߊߣߎ߲߬ߞߎ߬ߣߍ߲ ߘߏ߫ ߟߋ߬ ߦߋ߫ ߘߐߓߍ߲߬ ߠߊ߫ ߞߊ߬ ߣߍ߰ ߘߐߜߊ߬ߛߌ߬ߣߍ߲߫ ߣߎ߲ߠߊߓߐߣߍ߲ ߕߏ߲ߓߐߣߍ߲ ߘߏ߫ ߘߏ߲߬ ߊ߬ ߣߎ߲ ߠߊ߫߸ ߞߵߏ߬ ߘߏ߲߬ ߞߍߣߍ߲ߘߋ߲ ߞߋ߬ߟߋ߲߬ߞߋ߬ߟߋ߲߬ߠߊ ߓߍ߯ ߓߟߏ߫߸ ߏ߬ ߟߋ ߕߘߎߕߐߟߊ ߦߋ߫ ߕߏ߫ ߟߊ߫ ߜߙߊ߬ ߟߊ߫ ߛߐ߲߬.
ߛߏ߬ߟߌ߬ߛߌ ߦߋ߫ ߞߣߍߞߍ ߕߏߟߏ߲ ߠߎ߬ ߘߐ߫ ߓߟߋ߬ߓߟߋ ߘߏ߫ ߟߋ߬ ߘߌ߫߸ ߡߍ߲ ߕߏߟߏ߲ ߦߋ߫ ߞߍ߫ ߟߊ߫ ߛߎ ߘߐ߫ ߗߍ߬ߓߊ߬ߦߊ ߘߎ߬ߛߊ߬ߝߌ߲ ߛߎ ߘߐ߫ ߞߵߊ߬ ߘߎ߬ߛߊ ߜߍ߫ ߞߣߍߞߍ ߛߐ߰ߡߊ߬ߘߊ ߟߊ߫.
ߗߍ߬ߓߦߊ߬ ߟߏ߲ ߞߣߍ ߓߊ߯ ߓߐ߫߸ ߞߍߣߍ߲ߘߋ߲ ߠߎ߬ ߣߌ߫ ߛߍ߯ߡߊ ߟߎ߬ ߣߌ߫ ߞߣߍߞߍߣߎ߲ ߣߌ߫ ߞߣߍߖߋߟߌ ߟߎ߬ ߘߴߊ߬ ߕߍ߲߬ߕߍ߲ ߞߊ߬ ߞߣߍߞߍ߫ ߝߎߥߊ ߡߊߜߍ߲߫. ߘߋߣߍ߲ ߠߎ߬ ߘߌ߫ ߟߊߟߐ߬ ߛߝߊ ߘߐ߫ ߞߵߊ߬ߟߎ߫ ߗߍ߬ߓߊ߬ߦߊ߫ ߛߊ߫. (ߒߠߋ ߡߊ߫ ߛߋ߫ ߝߎߥߊ ߟߊ߫ ߡߎߣߎ߲߬߸ ߏ߬ ߘߐ߫ ߒߠߋ ߡߴߊ߬ ߘߐߞߏ ߓߍ߯ ߟߐ߲߫. ߊߟߎ߫ ߘߌ߫ ߛߴߊ߬ ߓߟߏߟߊߕߎ߲߰ ߠߊ߫).
ߗߍ߬ߓߊ߬ߦߊ ߓߊ߯ ߓߊ߲߫߸ ߞߊߡߋߙߋ߲ ߠߎ߬ ߘߌ߫ ߞߍߣߍ߲ߘߋ߲ ߠߎ߬ ߟߊ߫ ߓߌߟߊ ߟߎ߬ ߕߊ߬ ߞߵߊ߬ ߡߊߟߐ߬ ߘߋ߲ߕߌ߮ ߟߎ߬ ߟߊ߫ ߞߊ߬ ߥߴߊ߬ߟߎ߫ ߘߟߊߝߎ߬ ߞߏ߫ ߘߋ߲ ߠߎ߬ ߝߊߘߌ߲ߧߊ߫ ߘߊ߫. ߏ߬ ߟߎ߬ ߘߴߊ߬ߟߎ߫ ߛߐ߫ ߖߊ߲߬ߛߊ߬ߟߌ ߟߎ߬ ߟߊ߫.
ߏ߬ ߟߎ߬ ߝߣߊ߫ ߣߊ߬ ߕߎߡߊ ߏ߬ ߦߴߊ߬ ߕߘߍ߬ ߟߊ߫ ߟߋ߬ ߡߊ߬ߙߌ߬ߝߊ߬ߕߌ߮ ߟߎ߬ ߟߐ߬ߣߍ߲߫ ߦߋ߫ ߝߎߥߊ ߟߊߡߌߣߌ߲ ߘߐ߫߸ ߏ߬ ߟߎ߬ ߘߌ߫ ߝߊߘߌߝߊߘߌ߫ ߡߎ߮ ߜߊ߬ߛߌ߬ ߞߵߊ߬ ߕߎ߲߰ ߢߐ߲߮ ߠߊ߫ (ߞߏ߲߬߹ ߜߌ߹ …).
ߏ߬ ߦߋ߫ ߞߍ߫ ߟߊ߫ ߕߎ߬ߡߊ ߡߍ߲ ߠߊ߫߸ ߡߏ߬ߛߏ ߟߎ߬ ߣߌ߫ ߝߐߟߌߟߊ ߟߎ߬ ߦߋ߫ ߓߙߊ ߘߐ߫ ߝߊߘߌߝߊߘߌ ߡߊߞߐ߬ߣߐ߲ ߛߌ߱ ߘߐ߫. ߝߊߘߌߝߊߘߌ ߞߊ߲ ߓߐ߫ ߘߴߌߞߘߐ߫߸ ߏ߬ ߟߎ߬ ߝߣߊ߫ ߘߌ߫ ߘߐ߲߭ ߞߊߘߴߊ߬ ߡߊ߬ ߞߊ߬ ߘߐ߲߬ߞߟߌ߬ ߘߌߡߊ ߛߎ߮ ߓߍ߯ ߘߏ߫ ߟߊ߫߸ ߦߏ߫: (ߝߊߘߌߝߊߘߌ ߏ߰߸ ߗߍ߭ ߝߎߥߊ߬߸ ߞߘߎ߬ ߓߐ ߘߊ߫ ߒ ߞߊ߲ ߠߊ߫, ߝߊߘߌߝߊߘߌ ߓߐ ߘߊ߫ ߗߍ߭ ߝߎߥߊ߬ ߟߊ߫߸ ߞߘߎ߬ ߓߐ ߘߊ߫ ߒ ߞߊ߲ ߠߊ߫).
ߞߍߣߍ߲ߘߋ߲ ߠߎ߬ ߘߴߊ߬ ߕߍ߲߬ߕߍ߲߫ ߞߊ߬ ߝߊߝߊ ߡߊߜߍ߲߫߸ ߊ߬ߟߎ߬ ߦߴߊ߬ߟߎ߫ ߛߋ߲߭ ߕߊ߬ ߟߊ߫ ߞߋߟߋ߲߫ ߘߌ߫߸ ߞߵߊ߬ ߓߌ߬ߟߊ߬ ߞߋߟߋ߲߫ ߘߌ߫߸ ߊ߬ߟߎ߬ ߦߋ߫ ߕߊ߬ߡߌ߲߬ ߠߴߊ߬ߟߎ߫ ߟߊ߫ ߕߊ߲߬ߓߊ ߟߎ߬ ߕߘߎ߫ ߞߊ߲ ߝߣߊ߫ ߓߍ߲߬ ߠߊ߫ (ߜߙߊ߫߹ ߜߙߊ߫߹ …߹) ߤߊ߲߯ ߊ߬ߟߎ߬ ߦߋ߫ ߛߋ߫ ߝߊߝߊ ߟߊ߫ ߕߎ߬ߡߊ ߡߍ߲ ߠߊ߫.
ߞߍߣߍ߲ߘߋ߲ ߠߎ߬ ߓߊ߯ ߛߋ߫ ߝߊߝߊ ߟߊ߫߸ ߊ߬ߟߎ߬ ߟߊ߫ ߞߏ ߟߎ߬ ߘߌ߫ ߞߊ߬ߙߌ߬ߝߊ߬ ߛߍߡߊ ߟߎ߬ ߟߊ߫. ߏ߬ ߟߎ߫ ߟߋ߬ ߦߴߊ߬ߟߎ߫ ߞߣߐ߬ߜߍ߲߬ ߠߊ߫ ߞߵߊ߬ߟߎ߫ ߖߊ߲߬ߕߏ߫ ߊ߬ߟߎ߫ ߘߐ߫ ߛߴߊ߬ߟߎ߫ ߞߊߣߊ߬ ߞߏ߫ ߟߎ߫ ߞߍ߫߸ ߡߍ߲ ߠߎ߬ ߘߴߊ߬ߟߎ߫ ߞߍ߲ߘߍߦߊ߫ ߜߏߦߊ߫ ߦߏ߫: ߞߵߊ߬ߟߎ߫ ߟߴߊ߬ߟߎ߫ ߞߣߐ ߣߴߊ߬ߟߎ߫ ߓߟߏ ߟߎ߫ ߞߊ߲߬߸ ߞߵߊ߬ߟߎ߬ ߟߊ߫ ߘߊ ߛߊ߯߸ ߊ߬ ߣߴߏ߬ ߕߣߊ߬…
ߖߐ߲߬ߛߊ߫ ߏ߬ ߝߣߊ߫ ߞߊߣߊ߬ ߡߊߝߘߏ߬߸ ߊ߬ߟߎ߬ ߘߴߊ߬ߟߎ߬ ߕߟߊ߫ ߛߌ߰ߛߐ߲ ߠߎ߬ ߘߌ߫߸ ߘߏ߫ ߟߎ߬ ߦߋ߫ ߛߎ ߞߍ߫ ߘߏ ߟߎ߬ ߝߣߊ߫ ߦߋ߫ ߕߋ߬ߟߋ ߞߍ߫. ߛߊ߫ ߛߎ ߘߐߕߍ߱ ߘߌ߫ ߣߐ߰ߦߊ߫߸ ߊ߬ߟߎ߬ ߞߊ߬ ߕߐ߲ ߘߏ߫ ߓߋ߬ ߊ߬ߟߎ߫ ߢߐ߲߮ ߞߊ߲߬, ߏ߬ ߟߋ ߞߍ߫ ߖߐ߲ߓߌߢߣߊ ߘߌ߫߸ ߡߍ߲ ߞߘߐ ߦߋ߫ ߖߐ߲߫ ߓߴߌ ߢߣߊ ߘߌ߫.
ߖߐ߲߫ ߓߴߌ ߢߣߊ߫؟ ߏ߬ ߟߋ ߘߐ߫ ߛߊ߫߸ ߜߏ߲߬ߛߊ߲ (ߓߌ߬ߛߊ߲) ߠߋ߬ ߦߋ߫ ߞߍ߫ ߟߴߊ߬ߟߎ߫ ߓߟߏ߫ ߦߋ߲߬߸ ߡߍ߲ ߓߊ߫ ߛߎ߬ߣߐ߬߸ ߏ߬ ߦߋ߫ ߜߊ߬ߛߌ߬ ߟߴߏ߬ ߟߋ ߟߊ߫. ߏ߬ ߝߣߊ߫ ߦߋ߫ ߞߍ߫ ߟߊ߫ ߘߌ߬؟߸ ߡߍ߲ ߓߊ߫ ߥߴߊ߬ ߟߊ߫ ߞߊ߬ ߛߌ߬ߣߐ߰߸ ߊ߬ߟߎ߫ ߘߴߏ߬ ߢߌ߬ߣߌ߲߬ߞߊ߫ ߛߋ߲߬ߧߊ߫ ߛߊ߬ߓߊ߫ ߞߏ߫ «ߖߐ߲߫ ߓߴߌ ߢߣߊ߫؟»߸ ߣߴߌ ߡߴߊ߬ ߟߊߡߌ߬ߣߊ߫ ߏ߬ ߛߊ߬ߓߊ ߛߌ߫ ߘߐ߫߸ ߊ߬ߟߎ߬ ߘߴߌ ߜߊ߬ߛߌ߬ ߞߵߌ ߟߊߞߎߣߎ߲߫.
ߊ߬ߟߎ߬ ߦߋ߫ ߘߋߣߍ߲ ߠߎ߬ ߖߏ߮ ߘߏ߲߬ ߠߊ߫ ߝߣߊ߫߸ ߊ߬ߟߎ߬ ߦߴߏ߬ ߝߣߊ߫ ߞߍ߫ ߟߊ߫ ߘߌ߬؟: ߣߌ߫ ߞߍߣߍ߲ߘߋ߲ ߘߏ߫ ߞߊ߬ ߞߎߡߊ ߘߏ߫ ߞߵߊ߬ ߜߊ߲߫ ߞߵߊ߬ ߓߌ߬ߟߊ߬ ߞߎߡߊ ߘߏ߫ ߘߐ߫ ߛߍ߲߸ ߊ߬ߟߎ߬ ߘߴߏ߬ ߟߐ߬ ߏ߬ ߞߐߛߊ߬ߦߌ߫ ߟߊ߫ ߝߎߚߎ߫ ߝߴߏ߬ ߘߌ߫ ߛߍ߰ ߝߴߊ߬ ߘߏ߫ ߟߎ߫ ߘߌ߫ ߞߊ߬ߛߌ߬. ߏ߬ ߕߍ߫ ߟߊߥߟߌ߬ ߟߊ߫ ߘߏ߫ ߜߘߍ߫ ߡߵߊ߬ߟߎ߫ ߖߏ߮ ߘߏ߲߭ ߡߊ߬ ߞߵߊ߬ ߟߊߥߟߌ߬ ߊ߬ߟߎ ߟߐ߭ ߡߵߊ߬ߟߎ߫ ߝߊ߲ߕߊ߲߬ߞߊ߫ ߟߊ߫ ߘߊߡߊ߲ߘߌߦߊ ߣߌ߫ ߘߊߓߍ߲ߞߟߊߘߌߦߊ ߛߟߊߝߍ߯ߦߊ (ߞߎߡߊ߫ ߟߊߘߌߦߊߢߍ߸ ߞߊ߬ ߕߏ߫ ߌ ߜߊ߲߫ ߠߊ߫ ߞߵߌ ߓߌ߬ߟߊ߬ ߞߎߡߊ߫ ߟߎ߫ ߘߐ߫ ߡߍ߲ ߡߊ߫ ߛߙߊ߬ ߌ ߟߊ߫) ߟߎ߫ ߡߊ߬.
ߞߣߍߞߍ ߞߎ߲߬ߢߐ߰ ߞߋߟߋ߲ ߡߊ߬߸ ߏ߬ ߦߴߊ߬ ߕߘߍ߬ ߟߊ߫ ߟߋ߬ ߞߍߣߍ߲ߘߋ߲ ߠߎ߬ ߓߘߊ߫ ߝߌ߬ߛߊ߬ߦߊ߫߸ ߊ߬ ߣߴߊ߬ߟߎ߫ ߓߘߊ߫ ߡߍ߲߫ ߞߏ߬ߟߌ߬ߓߊߟߌߦߊ ߝߣߊ߫ ߘߐ߫߸ ߏ߬ ߘߐ߫ ߝߏ߫ ߞߵߊ߬ߟߎ߫ ߞߏ߬ ߡߎ߬ߕߎ߲߫. ߏ߬ ߟߋ ߦߴߊ߬ ߞߍ߫ ߟߊ߫ ߥߊ߫ ߦߋ߫ ߞߍ߫ ߟߴߊ߬ߟߎ߫ ߘߌ߫ ߞߐ߭ ߟߊ߫ ߞߵߊ߬ߟߎ߫ ߛߊߣߌ߲ߧߊ߫ ߞߵߊ߬ߟߎ߫ ߟߊ߫ ߜߙߍ߫ ߝߊ߯ߣߌ߲ ߡߊߝߊ߬ߟߋ߲߫ ߝߊ߰ߣߌ߲߫ ߓߘߍ ߟߎ߬ ߟߊ߫.
ߢߊ߰ߢߊ߰ ߓߊ߫ ߟߋ߬ ߦߋ߫ ߞߍ߫ ߟߊ߫ ߞߐ߬ߟߊ߬ߞߊߘߌ ߘߐ߫߸ ߡߏ߬ߛߏ ߟߎ߬ ߘߌ߫ ߞߐ߬ߟߞߊ߬ߘߌ߫ ߕߏߟߏ߲ ߞߍ߫ ߓߙߊ ߘߐ߫. ߞߊߡߋߙߋ߲ ߠߎ߬ ߘߌ߫ ߞߐ߬ߥߟߎ߬ ߟߊ߬ߓߐ ߞߍ߫ ߞߊ߬ ߕߊ߬ߡߌ߲߬ ߘߋ߲ߕߌ߮ ߟߎ߬ ߓߍ߯ ߘߟߊ߫߸ ߏ߬ ߟߎ߬ ߝߣߊ߫ ߘߌ߫ ߥߏߘߌ ߘߴߊ߬ߟߎ߫ ߡߊ߬.
ߞߍߣߍ߲ߘߋ߲ ߠߎ߬ ߓߊ߯ ߞߍ߲ߘߍߦߊ߫߸ ߛߍߡߊ ߟߎ߬ ߘߌ߫ ߝߋ߲ߣߍ߲߫ ߗߋ߲߱ ߠߎ߫ ߢߌߣߌ߲߫ ߞߵߏ߬ ߟߎ߫ ߓߌ߬ߟߊ߫ ߘߊ߲߬ߞߎ߲ ߠߎ߬ ߘߐ߫ ߞߊ߬ ߞߍߣߍ߲ߘߋ߲ ߠߎ߬ ߟߐ߬ ߏ߬ ߟߎ߫ ߞߣߐ߬ߜߍ߲߫ ߠߊ߫߸ ߞߊ߬ ߛߍߡߊ ߘߏ߫ ߓߌ߬ߟߊ߬ ߊ߬ߟߎ߫ ߝߍ߬.
ߣߌ߫ ߕߊ߬ߡߌ߲߬ߓߊ߰ߕߐ ߡߍ߲ ߞߵߏ߬ ߕߊ߬ ߛߊ߫߸ ߊ߬ߟߎ߬ ߘߴߊ߬ߟߎ߫ ߕߐ߲߬ߕߐ߲߫ ߏ߬ ߣߐ߬ ߟߊ߫ ߞߴߊ߬ ߓߘߊ߫ ߕߐ߲ ߕߊ߬߸ ߊ߬ߟߎ߫ ߘߏ߲߬ ߕߴߊ߬ߟߎ߫ ߓߐ߫ ߌ ߞߐ߫ ߝߋߎ߫ ߝߏ߫ ߣߴߌ ߞߊ߬ ߥߏߘߌ ߘߴߊ߬ߟߎ߫ ߡߊ߬ ߥߟߊ߫ ߥߟߊ߫ ߝߋ߲߫ ߜߘߍ߫. ߊ߬ߟߎ߬ ߘߌ߫ ߛߴߏ߬ ߞߍ߫ ߟߊ߫ ߕߟߋ߬ ߞߋߟߋ߲߫ ߤߊ߲߯ ߞߊ߬ ߛߋ߫ ߕߋ߬ߟߋ߫ ߛߊ߬ߓߊ߫ ߡߊ߬. ߣߴߏ߬ ߓߊ߲߫ ߘߊ߫ ߊ߬ߟߎ߫ ߘߌ߫ ߖߍ߲ߛߍ߲߫ ߓߍ߯ ߘߌ߫ ߥߴߊ߬ ߓߘߊ߫ ߟߎ ߡߊ߬.
ߕߐ߲߫ ߓߌߟߊ ߕߐ߬ߣߐ ߦߋ߫ ߡߍ߲ ߘߌ߫߸ ߞߵߊ߬ ߟߊߥߟߌ߬ ߘߋߣߍ߲ ߠߎ߬ ߖߏ߮ ߘߏ߲߭ ߡߊ߬ ߝߋ߲߫ ߦߙߋߞߋ ߕߐ߬ߡߐ߲ ߡߊ߬߸ ߛߊ߫ ߘߏ߫ ߞߊߣߊ߬ ߓߌ߬ߟߊ߬ ߡߊߣߌ߲ߡߊߣߌ߲ ߘߐ߫ ߕߎ߲ߞߊ߲ ߘߐ߫ ߟߏ߲ ߘߏ߫߸ ߡߍ߲ ߠߎ߬ ߟߊ߫ ߞߎ߬ߙߎ߲߬ߘߎ ߣߴߊ߲ ߕߊ ߟߎ߬ ߕߍ߫ ߞߋߟߋ߲߫ ߘߌ߫.
ߣߌ߫ ߞߍߣߍ߲ߘߋ߲ ߠߎ߬ ߖߍ߲ߛߍ߲߫ ߘߴߏ߬ ߘߐ߫߸ ߓߍ߯ ߘߌ߫ ߥߴߊ߬ ߛߌ߬ߓߏ߲߫ ߠߊ߫. ߡߐ߰ߓߊ ߟߎ߬ (ߕߘߍ߬) ߦߋ߫ ߛߏ ߛߎ߲ߞߎߘߎ߲ ߠߎ߬ ߟߋ߬ ߘߐߕߟߊ߫ ߟߴߊ߬ߟߎ߫ ߕߍ߫߸ ߓߍ߯ ߣߴߌ ߕߊ ߏ߬ ߦߋ߫ ߛߎ ߟߊߕߊ߬ߡߌ߲߫ ߢߐ߲߮ߝߍ߬ ߞߴߌ ߟߊ߫ ߓߎ߬ߙߋ߬ߟߊ߬ߞߊߘߌ ߟߋ߬ ߣߌ߲߬ ߘߌ߫߸ ߞߏ߬ߣߌ߲߬ ߌ ߞߊ߬ ߡߵߊ߬ ߟߊ߫ ߘߋ߬. ߊ߬ߟߎ߬ ߘߌ߫ ߡߊ߬ߛߌ߬ߟߊ߲߬ߠߌ߲߫ ߞߊ߲ ߛߎ߮ ߓߍ߯ ߘߏ߫ ߝߐ߫ ߝߌߦߐ (ߡߍ߲ ߞߍߣߍ߲߫ ߞߎߘߊ ߦߋ߫ ߗߍ߬ߓߊ߬ߞߘߐ ߘߌ߫ ߞߊ߬ߣߌ߲߬) ߏ߬ ߟߎ߬ ߢߍ߫ ߛߴߊ߬ߟߎ߫ ߘߴߊ߬ߟߎ߫ ߝߊ߲ߕߊ߲߬ߞߊ߫ ߊ߬ߟߎ߫ ߡߊ߬ ߢߊ ߡߍ߲ ߡߊ߬. ߟߊߒߡߊ߫ ߘߐ߫ ߊ߬ߟߎ߬ ߘߴߊ߬ ߝߐ߫ ߘߏ߫ ߟߎ߫ ߢߍ߫ ߞߏ߫ ߣߴߊ߬ߟߎ߫ ߡߊ߰ ߘߴߊ߬ߟߎ߫ ߟߊ߫߸ ߞߴߊ߬ߟߎ߬ ߘߌ߫ ߞߍ߫ ߞߏ߬ߣߊ ߘߌ߫߸ ߊ߬ ߣߴߏ߬ ߞߊ߬ߣߊ߫…
ߞߵߊ߬ ߕߘߍ߬ ߡߊ߲߬ߘߋ߲߬ ߛߎߦߊߞߏ ߦߴߊ߬ ߜߌ߲߬ߜߌ߲߬ ߞߊߛߌ ߘߐ߫߸ ߗߍ߬ߞߎ߲ ߠߎ߬ ߕߘߍ߬ ߦߴߊ߬ߟߎ߫ ߢߐ߲߮ ߠߊߛߐ߬ߘߐ߲߬ ߠߊ߫ ߛߏ߬ߟߌ߬ߛߌ ߝߍ߬ ߞߍ߬ߣߍ߸ ߏ߬ ߘߏ߫ ߟߎ߫ ߕߘߍ߬ ߦߋ߫ ߟߊߓߊ߲߫ ߠߊ߫ ߖߊ߲߬ߖߏ߲߬ ߠߊߞߊ߬ߟߌ߫ ߜߏߡߊ߲ (ߢߐ߲߯ ߝߊ߮) ߠߎ߬ ߟߋ߬ ߡߊ߬.
ߞߣߍߖߋߟߌ ߟߎ߬ ߕߘߍ߬ ߦߴߊ߬ߟߎ߫ ߓߟߏߘߐߓߍ߲߬ ߠߊ߫ ߘߊ߰ߟߎ߬ ߜߍߟߍ߲ ߛߎ߮ ߓߍ߯ ߘߏ߫ ߟߋ߬ ߟߊ߫߸ ߛߊ߫ ߞߍߣߍ߲ߘߋ߲ ߘߏ߫ ߞߊߣߴߊ߬ ߡߐ߬ߣߍ (ߘߊ߰ߟߎ ߥߟߊ߫ ߟߐ߲ߞߏ) ߟߊߓߐ߫ ߊ߬ ߟߊ߫߸ ߞߵߊ߬ ߞߘߐߓߐ߫ ߖߊ߬ߡߊ ߘߐ߫. ߏ߬ ߘߏ߲߬ ߘߏ߫ ߟߎ߫ ߕߘߍ߬ ߦߋ߫ ߞߍ߫ ߟߊ߫ ߟߋ߬ ߕߎ߬ߡߊ ߘߏ߫ ߟߎ߫ ߟߊ߫߸ ߡߊ߲߬ߘߋ߲߬ߞߊ ߓߍ߯ ߦߴߏ߬ ߞߊ߬ߟߊߡߊ߬ ߡߊ߲߬ߘߋ߲߫ ߝߊ߲߭ ߓߍ߯ ߘߐ߫ ߞߐߘߍ߫ (ߏ߬ ߘߏ߫ ߖߊ߲߬ߖߏ߲ ߠߊߞߊ߬ߟߌ߬ ߘߊ߫ ߒߠߋ ߢߍ߫ ߛߏ ߘߏ߫ ߟߊ߫߸ ߡߍ߲ ߡߊ߫ ߘߏ߲߰ ߦߋ߲߬ߞߊ ߟߎ߬ ߛߌ߫ ߟߊ߫).
ߡߊ߲߬ߘߋ߲ ߠߎ߬ (ߕߘߍ߬) ߕߍ߫ ߗߍ߬ߓߊ߬ߦߊ ߞߍ߫ ߟߊ߫ ߛߊ߲߬ ߛߌ߫ ߟߊ߫ ߣߌ߫ ߛߌ߰ߟߏߟߏ ߡߊ߫ ߓߐ߫ ߡߍ߲ ߠߊ߫߸ ߓߴߊ߬ߟߎ߫ ߕߘߍ߬ ߦߴߊ߬ ߖߊ߬ߕߋ߬ ߟߊ߫ ߟߋ߬ ߞߏ߫ ߛߊ߲߭ ߏ߬ ߕߍ߫ ߛߊ߲߬ ߘߌߡߊ߲߫ ߘߌ߫ ߡߎ߰ߡߍ߫. ߣߌ߫ ߞߘߐ߫ ߜߘߍ߫ ߡߍ߲ ߞߍ߫ ߘߴߊ߬ ߟߊ߫߸ ߒ߬ߓߊ߬ ߒߠߋ ߡߴߏ߬ ߟߐ߲߫.
This article uses material from the Wikipedia ߒߞߏ article ߗߍ߬ߓߊ߬ߦߊ, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). ߞߣߐߘߐ ߦߋ߫ CC BY-SA 4.0 ߟߊ߫ ߓߌ߬ߟߊ ߟߋ߬ ߘߐ߫߸ ߝߴߊ߬ ߛߌ߬ߣߊ߬ߦߊ߫ ߢߊߝߐߟߌ ߘߋ߬. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki ߒߞߏ (DUHOCTRUNGQUOC.VN) is an independent company and has no affiliation with Wiki Foundation.