Pebble Tools

Se sünd herstellt un bruukt wurrn in dat Ooldpaläolithikum vör um un bi 2,5 Millionen Johren. In de Archäologie weert se as Kennteken vun de Oldowan-Kultur ankeken

Maakt wurrn sünd düsse eenfachen Reedschoppen ut Steen vun de öllsten Aarden vun dat Geslecht Homo: Homo rudolfensis, Homo habilis un Homo ergaster / Homo erectus. Midderwielen warrt dat ok för mööglich holen, dat al bi de Australopithecina so'n Pebble Tools bruukt wurrn sünd. Dat dö bedüden, dat de öllsten Pebbles Tools tostanne kamen sünd, ehr dat dat Geslecht Homo up de Eer updükert is. In Gona, in dat Afar-Dreeeck in'n Noordosten vun Äthiopien sünd Pebbles Tools funnen wurrn, de seker bi 2,6 Mio. Johre oolt sünd. Dat is avers nich klaar, wo se för bruukt wurrn sünd.

För Europa kann nich seggt weer, wonnehr Pebbles Tools upkamen sünd. Hier fangt de Steentied mit de eersten Siedlers in dat Acheuléen an.

Pebble Tools sünd eenfache Reedschoppen ut Flintsteen, wo tominnst eenmol wat vun afslahn wurrn is. Dör so'n Afslag oder dör en Reeg vun Afslääg kümmt en scharpe Kant tostanne, wo een mit snieden kann. Sunnerliche Formen sünd Choppers, Chopping Tools un Rundsteen (Shäroide).

• Steenwarktüüch
• Chopper (Archäologie)
• Chopping Tools
• Fuustbiel

• Hahn, J., Erkennen und Bestimmen von Stein- und Knochenartefakten. Einführung in die Artefaktmorphologie. Archaeologica Venatoria 10,1991.