Jacques Hamel

November">30. November 1930 in Darnétal; † 26. Juli 2016 in Saint-Étienne-du-Rouvray) is en franzööschen kathoolschen Preester in de Karkengemeen vun Saint-Étienne-du-Rouvray ween. He is an’n 26. Juli 2016 bi en Terroranslag vun twee Mannslüde an’e Sieten maakt wurrn, as he just Hillge Misse lesen hett. De beiden Mannslüde menen, se harrn den Anslag for den Islaamschen Staat utöövt. Vun allerhand Lüde warrt Hamel nu as Merteler for den christlichen Gloven ankeken.

Jacques Hamel is an’n 30. November 1930 in Darnétal up’e Welt kamen. . To’n Preester ordineert wurrn is he 1958. Sien Deenst hett he versehn as Pastoor an de St. Antoine-Karken in Le Petit-Quevilly vun 1958 af an. Vun 1967 af an weer he Pastoor in de Karken vun Notre-Dame de Lourdes in Sotteville-lès-Rouen, denn is he vun 1975 af an as Preester in de Gemeen vun Saint-Pierre-lès-Elbeuf togange ween, un denn noch mol as Gemeene-Preester in Cléon vun 1988 af an. Na de Karken in Saint-Étienne-du-Rouvray is he in dat Johr 2000 kamen. Offiziell hett he mit 75 Johre Bott geven, man he hett Verlööv kregen, as Preester fudder to maken. Dor hett he denn in’t Johr 2005 de Stäe as Hölpspreester vun de Gemeen annahmen un bit an sien Dood utöövt. Mit Mohammed Karabila, den Vörsitter vun den Regionalraat vun de Muslime in de Normandie, hett Hamel tosamenarbeit‘ in en Arbeitsgrupp, wo dat um Gemeenschop unner de verscheden Religionen gung.

Hamel siene Kehlen is vun twee Lüde dörsneden wurrn, de menen, de hören to den Islaamschen Staat. An’n 27. Juli 2016 is in de Karken vun Notre Dame de Paris en Denkelmissen for Hamel afholen wurrn Düsse Missen hett André Vingt-Trois, de Arzbischop vun Paris vörstahn. Deelnahmen hefft de franzöösche Präsident François Hollande, Premierminister Manuel Valls, de Ministers Jean-Marc Ayrault, Bernard Cazeneuve, Emmanuel Macron, Najat Vallaud-Belkacem un François Bayrou, un ok de vörmoligen Präsidenten Nicolas Sarkozy un Valéry Giscard d'Estaing, dorto de Arzbischop vun Rouen, Dominique Lebrun, un de Apostoolsche Nuntius Luigi Ventura. In allerhand (sunnerlich in kathoolsche) Dageblöer un Tiedschriften is Hamel en Merteler nömmt wurrn. Midderwielen hett sik ok Anthony Fisher, de Arzbischop vun Sidney in Australien hören laten un meen, Hamel weer sturven "in odium fidei", un föög dor to: “Düt is en Begreep, dor beschrievt de Kathoolschen den tyypschen Dood vun en Merteler mit, as een, de for sien oder for ehren Gloven starben deit, un vunwegen düssen Gloven.“

An'n 2. Oktober 2016 hett Paavst Franziskus Verlööf geven, nu scholl dat losgahn mit de Seligspreken. De Kongregatschoon for de Perzesse vun Selig- un Heiligspreken hett den Henwies kregen, Paavst Franziskus harr de Tied vun fiev Johre upböört, de anners aftöövt weern möss, ehr datt dat losgahn kann mit de Unnersöken. Dor weer de Mertelerdood vun Hamel Grund un Oorsaak for.