Вильчинская, Стефания

Стефания Вильчинская чачсь евреень раськенэ. Тетязо — коцтонь фабрикань кирдиця Юлиан (Исаак) Вильчинский (пол.  Izaak Wilczyński; ?—1911); авазо  — Саломея Вальфиш (пол.  Salomea Walfisz; ?—1929). Прядсь Ядвига Сикорскоень эсь школа (пол.  Jadwiga Sikorska;) Варшава ошсо, мейле естественной наукань факультет Бельгиянь Университетсэ, Льеж ошсо, 1906 иестэ тонавтнесь естественной наукат Женева ошонь Университетсэ, Швейцариясо^[3].

Варшавав велявтомадо мейле важодсь волонтёрокс еврей эйкакшонь уроз кудосо. Уроз кудось аштесь ташто церкувасо, берянь кудосо. Вильчинская ладизе важодема лувонть ды ладязель прявт таркас. Тосо теевсь содавиксэкс 1909 иестэ  Януш Корчак марто, вейсэнь важодемаст ды тевест мольсть сынст куломань видс Треблинкасо ^[3].

Корчак марто ветясь евреень эйкакштнэнь Уроз Кудонь тевтнесэ Варшава ошсо (1912—1942), конась аштесь  Крохмальной куросо, 92, косо тевс нолдазельть од педагогикань лувт-койть, конатне лездасть эйкакштэнень кастомо эсь прянь кисэ каштанчисэ. Уроз Кудось ульнесь теезь кода государства, конасонть ветить эйкакшт, тосо ульнесь эсь «конституция», эйкакшонь кочксезь парламент, ялгань суд.

Кода корты вейке тонавтниця, Кудонь тевтне мольсть кода Швейцариянь част. Корчаконь эрямодонзо сёрмадыця — Бетти Джин Лифтон лецтни:

«малава весе урозтнэнень Стефа ульнесь седеекс, прякс, ваныцякс ды авакс»

Эйкакштнэ мерсть тензэ «пани Стефа».

Стефания Вильчинская ветясь кудосонть Корчаконь арайстэ Васенце Весе Масторонь войнань шкане ды зярдо сон туекшнось Палестинав 1934 ды 1936 иетнестэ. Стефанияяк арсекшность туеме эрямо Палестинав, эрясь аламос Эйн-Хародсо, ансяк велявтокшнось войнань ушодомадо икеле Польша Масторов ^[3].

Немецень самодо мейле 1940 иестэ уроз кудонть ютавтызь геттос. Стефаниянь ялгатне кортнесть тензэ чиемс Польшасто, сон эзь карма ды лиядсь Корчак ды эйкакшнэнь марто^[3].

Кизнат 1942 иестэ немецьтне мерсть ютавтомс урозтнэнь кулома лагерьс. Умарьковонь 6 чистэ, валске марто кудосонть марязевсь: «Alle Juden raus!». Важодицятненень мерезель кадомс кудонть, ансяк весе лиядсть эйкакштнэнь марто. Эйкакштнэнь стявтызь нилень-ниле, ванстыцятне куродызь ды истя сыргасть Умшлагплацов, косто сынст ускизь Треблинкав. Васенцетнень ветясь Януш Корчак, омбоцетнень — Стефания Вильчинская^[3].

Наум Ремба, евреень вейсэндявкссонь секретарь, ёвтнесь, ломантне весе пижнесть, ансяк Уроз Кудонь эйкакшнэ мольсть састыне, верьга прянь кирдезь.

Калмамо тарказо Стефаниянь эзь лиядо, яла теке тензэ тейсть калмо тетянзо ды аванзо ютксо Варшава ошонь Евреень калмазырьсэ (уч. 64, ряд 1). Януш Корчаконь ды Стефания Вильчинскаянь кеврунгонь пусмо ашти Вармань Пандо прясо, Иерусалим ало.

1947 иестэ Стефания Вильчинскаянень куломадо мейле ульнесь максозь сиянь Паро Тевень Крёст. 2004 иестэ Варшаво ошсо нолдазель книгазо «Вал эйкакштнэнень ды тонавтыцятненень».

2005 иестэ Польша масторсо нолдазельть зярыя ловномапусмот, конасонть сёрмадозель Стефаниянь эрямодонзо.