Тарасова, Марина Андреевна: эрзянь сёрмадей, ёвксонь арсий.

Чачсь вейке тёжа вейксэсядт кодгемень кавксоце (1968) иень медьковонь кеменце чистэ Мордовия Республикань Кочкур буень Од Мурза велесэ. 1985-це иестэ сон прядызе Од Мурза велень средней школанть ды сась тонавтнеме Саран ошов, Н. П. Огарёв лемсэ Мордовской прявтуниверситетэнь филологиянь факультетэв. Университетэнь прядомадо мейле акувать важодсь «Чилисема» журналонь редакциясо, Мордовиянь правительствасо келень, литературань, экономикань ды историянь научно-исследовательской институтсо, седе кувать – «Сятко» журналсо (1997 — 2012-це иетнестэ).

Тарасова Марина васень стихензэ, ёвтнеманзо, ёвксонзо сёрмадынзе эйкакшпорасто. Сынь ульнесть рузонь кельсэ. Шкинемань кинзэ лангс жо кеместэ стясь эрзянь кельсэ сёрмадозь ёвксонзо вельде. Сынст эйстэ седе ламотнень печатынзе «Чилисема» журналсо. Васенце эрзянь кельсэ сёрмадозь ёвксось ульнесь «Вармазей». Од сёрмадыцянтень пек лездась «Валдыне» литературной курось, конань ветясь эрзянь содавикс поэтэсь Михаил Втулкин. Тесэ теевсь малавиксэкс эрзянь кельсэ лия од сёрмадыцятнень марто. Тонавтнесь пельдест, косо-косо пелькстаськак.

Ёвксонзо печатавсть «Родник» (1991-це ие), «Ёвксонь кужо» (1993-це ие), вейсэнь пусмотнесэ. «Псакань ёвкст» башка книгазо лиссь Эрзя-мокшонь книгань издательствасо 1996-це иестэ, ды совась эрзянь келень корпусонть анокстамсто (Erzya Source Literature (Corpora)). Пек лембестэ ловныцятне вастызь Тарасова Маринань «Мурзай», «Мон карман учомо», «Вандора ды Ласькамо» ды лия ламо литературной ёвксонзо, конат лиснесть «Чилисема», «Сятко», «Странник» журналтнэсэ.

Марина Андреевна Тарасова зярдояк а явны вечкевикс эсь жанрастонзо – ёвкстонть. Минь уш тонадынек: седе ламо ёвкстнэнь сёрмалить эйкакштнэ. Тарасова Марнинань ёвкстнэ пек явовить эйкакшонсетнень эйстэ. Сынь седе покшткак, домкаткак. Ёвксонь героензэ седе сеедьстэ нармунть, кудоютконь ды идем ракшат, тикшеть, касовкст… Сынь пек молить ломань ёнов. Эрямост, тевест-ладост кармавтыть талномо эрьва ловныцянть.

Бути ушодат ловномо Тарасова Маринань ёвксонзо, а сезеват пелевидьс пачкодезь. Истя эрси сестэ, зярдо ловнат алкуксонь произведеният. Лисни, Марина Тарасова виев сёрмадыця. А стяко сонзэ совавтызьгак Россиянь сёрмадеень союзс. Те ульнесь 1998-це иестэ.

• Тарасова, Марина Андреевна. Псакань ёвкст [Текст] / М. Тарасова ; художникесь А. Пурескина. – Саранск : Мордовской книжной издательствась, 1996. – 104, [3] с. : ил., портр. – Пер. загл.: Сказки, которые рассказала кошка. – (эрз.).
• Писатели Мордовии : библиографический справочник : в 2 т. Е. 2. Л – Я / сост. : А. И. Брыжинский, Л. П. Бойнова, Е. И. Чернов. – Саранск : Мордовское книжное издательство, 2015. – 544 с. ISBN 978-5-7595-1938-6 (т. 2)
• «Чилисема», 2015, №3[442], Лоп.16 ISSN 0869-5016 (эрз.)
• Демин В.И. Кунсолодо, мон тенк ёвтнян ёвкс... / В.И. Демин // Сятко. 2002. № 11. С. 94-102. [Слушайте, я вам сказку расскажу].(эрз.)
• Еремкин Андрей Васильевич Художественное своеобразие мордовской литературной сказки (на примере творчества М. Тарасовой) // Вестник Чувашского университета. — 2007. — № 3.