ꯈꯣꯡꯂꯣꯏ ꯕꯤꯗꯥꯏ

ꯅꯥꯔꯛ ꯃꯣꯡꯁꯣꯡꯅ ꯀꯥꯈꯠꯄ ꯌꯥꯔꯣꯏ ꯃꯇꯥꯒꯨꯝ ꯉꯥꯛꯊꯣꯛꯂꯤ꯫ ꯑꯗꯨꯕꯨ ꯈꯥꯡ- ꯂꯥꯛꯄ ꯉꯝꯕꯄꯣꯠ ꯅꯠꯇꯦ꫰ ꯃꯤꯑꯣꯏꯕꯤ ꯆꯀ꯭ꯔꯤꯗ ꯫ ꯈꯣꯡꯂꯣꯏ ꯑꯣꯏꯅ ꯂꯥꯛꯃꯤꯟꯅꯔꯤꯕ ꯑꯊꯧꯕ꫰ ꯂꯥꯏꯔꯕ ꯑꯃꯗꯤ ꯄꯥꯡꯗꯕ ꯆꯪꯁꯤꯟꯕ ꯍꯧꯔꯛꯏ ꯆꯤꯡꯗꯣꯟꯒꯤ ꯄꯥꯟꯗꯝꯗ꯫ ꯇꯁꯦꯡꯅ ꯆꯤꯡ ꯀꯥꯕꯗꯤ ꯍꯧꯗ꯭ꯔꯤ ꯃꯈꯣꯏ꯫ ꯆꯤꯡꯈꯣꯡꯒꯤ ꯑꯏꯪꯕ ꯅꯨꯡꯁꯤꯠꯇ꫰ ꯄꯨꯝꯅꯃꯛ ꯇꯨꯡꯑꯣꯏꯅꯔꯕ ꯃꯤꯑꯣꯏ ꯈꯔ ꯅꯤꯡꯉꯥꯏꯗꯅ ꯐꯝꯂꯤ ꯃꯃꯤꯠ ꯎꯏꯁꯤꯟꯗꯨꯅ꯫ ꯆꯥꯡꯗꯝꯅꯅ꫰ ꯀꯜꯂꯛꯄ꫰ ꯑꯄꯥꯝꯕ꫰ ꯑꯉꯛꯄ꫰ ꯃꯌꯥꯏ ꯀꯥꯕ ꯀꯔꯤꯁꯨ ꯐꯥꯎꯗ꯭ꯔꯕ ꯃꯈꯣꯏꯅꯤ꯫ ꯃꯁꯥꯅ ꯇꯁꯦꯡꯅ ꯌꯦꯡꯂꯤ ꯃꯈꯣꯏꯒꯤ ꯅꯨꯡꯗ꯫ ꯑꯁꯤꯕ ꯍꯛꯆꯥꯡ ꯈꯔꯁꯨ ꯇꯥꯔꯤ ꯆꯤꯡꯈꯣꯡꯒꯤ ꯃꯆꯤ ꯃꯆꯤꯗ꯫ ꯀꯥ ꯍꯦꯟꯅ ꯉꯝꯕ ꯑꯣꯏꯗ꯭ꯔꯤ꯫ ꯃꯈꯣꯏ ꯑꯍꯨꯝ ꯑꯋꯥꯕ ꯂꯩꯇ꯭ꯔꯤꯕꯅ ꯃꯈꯣꯡ ꯌꯥꯡꯏ꫰ ꯍꯔꯥꯎ ꯇꯌꯥꯝꯃꯤ꯫ ꯑꯔꯥꯞꯄꯗ ꯎꯔꯤ ꯆꯤꯡꯒꯥꯔꯣꯏ ꯁꯪꯒꯨ ꯁꯪꯒꯨ ꯄꯔꯦꯡ ꯄꯔꯦꯡ ꯆꯠꯂꯤꯕ꯫ ꯅꯨꯃꯤꯠꯅ ꯃꯉꯥꯜ ꯐꯨꯗꯣꯛꯄ ꯍꯧꯔꯛꯄꯗ ꯆꯤꯡꯒꯤ ꯑꯉꯝꯕ ꯁꯔꯨꯛꯀ ꯃꯥꯏꯑꯣꯛꯅꯩ꯫ ꯇꯞꯅ ꯇꯞꯅ ꯅꯤꯡꯁꯤꯡꯍꯜꯂꯤ ꯃꯈꯣꯏꯅ ꯂꯥꯛꯈꯤꯕ ꯈꯣꯡꯆꯠ꫰ ꯈꯣꯡꯂꯣꯏ꫰ ꯅꯨꯃꯤꯠꯅ ꯇꯥꯈꯤꯗ꯭ꯔꯤꯉꯩ꫰ ꯅꯣꯡꯃꯒꯤ ꯃꯇꯝ꯫ ꯐꯪꯗꯕ ꯌꯥꯗ꯭ꯔꯕ ꯐꯤꯔꯥꯜ ꯄꯥꯟꯗꯝ ꯆꯤꯡꯗꯣꯟꯒꯤ꫰ ꯌꯧꯒꯦ ꯂꯦꯞꯂꯤꯕ ꯄꯨꯝꯅꯃꯛ ꯆꯤꯡꯗꯣꯟ꫰ ꯀꯅꯥꯅ ꯂꯦꯞꯂꯨꯕ ꯉꯝꯗ꯭ꯔꯤꯕ꫰ ꯅꯨꯃꯤꯠꯅ ꯂꯣꯠꯈꯤꯗ꯭ꯔꯤꯉꯩ꯫ ꯉꯝꯕ ꯍꯦꯜꯂꯛꯂꯤꯕ ꯆꯤꯡꯃꯥꯏꯗ ꯃꯌꯥ ꯀꯥꯊꯣꯛꯇꯨꯅ ꯅꯨꯃꯤꯠꯅ ꯃꯩꯁꯥ ꯀꯥꯝꯊꯔꯤ꯫ ꯆꯣꯛꯊꯕ ꯍꯧꯔꯛꯂꯕ ꯑꯊꯧꯕ꫰ ꯂꯥꯏꯔꯕ ꯑꯃꯗꯤ ꯄꯥꯡꯗꯕ ꯆꯌꯣꯝ ꯄꯨꯊꯣꯛꯇꯨꯅ ꯆꯥꯃꯤꯟꯅꯩ꯫ ꯉꯩꯍꯥꯛ ꯑꯋꯥ ꯄꯣꯊꯥꯐꯝꯗ ꯄꯨꯜꯂꯕ ꯑꯇꯣꯞꯄ ꯆꯤꯡꯒꯥꯔꯣꯏꯒ ꯆꯌꯣꯝ ꯂꯥꯟꯅꯗꯨꯅ ꯆꯥꯃꯤꯟꯅꯩ꯫ ꯅꯣꯛꯃꯤꯟꯅꯩ꯫ ꯍꯧꯅꯔꯨꯕ ꯂꯩꯇꯅ ꯑꯃꯅ ꯑꯃꯒꯤ ꯁꯛ ꯇꯥꯛꯅꯗꯨꯅ ꯑꯣꯟꯈꯤ ꯆꯥꯟꯅꯔꯕ ꯃꯔꯨꯞ꯫ ꯀꯥꯈꯠꯄ ꯑꯃꯨꯛ ꯍꯧꯔꯦ꯫ ꯅꯨꯃꯤꯠꯁꯨ ꯅꯣꯡꯃꯒꯤ ꯃꯄꯨꯟꯁꯤ ꯇꯪꯈꯥꯏ ꯆꯜꯂꯛꯗꯧꯔꯦ꯫ ꯈꯣꯡꯊꯥꯡ ꯇꯞꯊꯅꯔꯛꯄ ꯃꯔꯝꯅ ꯃꯤ ꯀꯨꯡꯁꯤꯟꯕ ꯍꯦꯜꯂꯛꯏ꯫ ꯅꯤꯟꯐꯨꯡ ꯅꯤꯟꯐꯨꯡ ꯇꯥꯔꯝꯕ ꯋꯥꯍꯩꯁꯤꯡ ꯃꯌꯦꯛ ꯁꯦꯡꯂꯛꯏ꯫
- ꯇꯤꯪꯈꯪꯅ ꯄꯤꯛ ꯊꯟꯈ꯭ꯔꯦ ꯀꯥꯕ ꯉꯝꯂꯔꯣꯏ꯫
- ꯅꯊꯧꯅꯥ ꯂꯩꯌꯨ꫰ ꯇꯤꯡꯈꯪ ꯑꯁꯤ ꯂꯥꯟꯊꯣꯛꯂꯒ ꯈꯣꯡꯂꯝꯕꯤ ꯂꯩꯔꯤꯕꯅꯤ ꯫
- ꯑꯁꯝꯕ ꯂꯝꯕꯤꯒ ꯂꯩꯇ꯭ꯔꯕ꯭ꯔ꫱
- ꯑꯁꯝꯕ ꯂꯝꯕꯤꯅ ꯀꯩꯗꯧꯅꯨꯡꯗ ꯇꯨꯡ ꯀꯣꯏꯔꯣꯏ꫰ ꯈꯥꯡꯕ ꯀꯜꯂꯨ꯫
- ꯑꯩ ꯁꯤꯔꯁꯨ ꯁꯤꯈ꯭ꯔꯁꯅꯨ ꯃꯐꯝ ꯑꯁꯤꯗ꫰ ꯄꯥꯡꯒꯜ ꯂꯣꯏꯔꯦ꯫
- ꯅꯪꯒꯤ ꯋꯥꯈꯜꯅ ꯅꯪꯒꯤ ꯍꯛꯆꯥꯡꯕꯨ ꯄꯟꯊꯍꯜꯂꯤꯕꯅꯤ꯫
- ꯍꯨꯃꯥꯡ ꯐꯥꯎꯕ ꯊꯣꯛꯈꯤꯗ꯭ꯔꯦ ꯑꯩꯒꯤ ꯍꯛꯆꯥꯡ꫰ ꯑꯩ ꯁꯤꯈꯤꯕꯗ
ꯆꯤꯡꯅꯗ꯭ꯔꯦ꯫ - ꯃꯥꯡꯗ ꯂꯥꯛꯀꯗꯕ ꯅꯨꯡꯉꯥꯏꯕꯁꯤꯡ ꯅꯪ ꯎꯅꯤꯡꯗ꯭ꯔꯕꯔ꫱
- ꯑꯩ ꯃꯗꯨ ꯊꯥꯖꯕ ꯉꯝꯗꯦ ꯇꯨꯝꯊꯕ ꯄꯥꯝꯂꯦ꫰ ꯁꯤꯕꯕꯨ ꯆꯥꯡꯌꯦꯡꯅꯤꯡꯂꯦ꯫
ꯂꯩꯆꯤꯜ ꯃꯄꯩ ꯑꯃ ꯈꯪꯍꯧꯗꯅ ꯍꯨꯝꯖꯤꯜꯂꯛꯄꯗ ꯃꯈꯣꯏꯒꯤ ꯈꯣꯟꯖꯦꯜ ꯑꯗꯨ ꯃꯔꯨꯑꯣꯏꯔꯨꯗ꯭ꯔꯦ꯫ ꯆꯣꯛꯊꯕ ꯈꯔ ꯐꯕꯒꯨꯝ ꯅꯤꯡꯂꯤ ꯈꯣꯡꯂꯣꯏ ꯑꯍꯨꯝꯒꯤ ꯍꯛꯆꯥꯡꯁꯨ꯫ ꯃꯤꯠꯀꯨꯞꯇ ꯁ꯭ꯋꯥꯏ ꯃꯥꯡꯈꯤ ꯂꯩꯆꯤꯜ꯫ ꯃꯤꯑꯣꯏ ꯈꯔ ꯑꯣꯝꯁꯤꯟꯗꯨꯅ ꯂꯩꯔꯤꯕꯗꯨ ꯎꯔꯛꯏ꯫ ꯃꯈꯣꯏ ꯑꯍꯨꯝ ꯆꯪꯁꯤꯜꯂꯨꯏ꫰ ꯇꯤꯡꯈꯪ ꯃꯔꯛ ꯑꯣꯏꯔꯕꯁꯨ꯫ ꯄꯤꯛꯈ꯭ꯔꯕ ꯂꯣꯛ ꯑꯃꯗꯅꯤ ꯃꯤꯌꯥꯝꯅ ꯏꯁꯤꯡ ꯉꯥꯏꯅꯔꯤꯕ꫰ ꯃꯨꯟꯅꯔꯤꯕ꯫ ꯇꯥꯡꯅ ꯐꯪꯕ ꯇꯥꯟꯖꯥ ꯑꯃꯅ ꯃꯈꯣꯏ ꯑꯍꯨꯝꯕꯨꯁꯨ ꯈꯧꯔꯥꯡꯕ ꯈꯔꯗꯤ ꯀꯣꯛꯍꯜꯂꯤ꯫ ꯑꯊꯧꯕ ꯐꯝꯄ꯭ꯔꯦꯠ ꯇꯥꯅ ꯐꯝꯊꯈꯤ꯫ - ꯃꯔꯨꯞ ꯑꯩꯒꯤꯗꯤ ꯄꯥꯡꯒꯜ꫰ ꯊꯧꯅꯥ ꯂꯣꯏꯔꯦ꯫ ꯃꯐꯝ ꯑꯁꯤꯗ ꯄꯜꯍꯧꯔꯒꯦ꫰ ꯅꯈꯣꯏ ꯑꯅꯤ ꯃꯇꯣꯟ ꯂꯣꯝꯅ ꯀꯥꯔꯨꯈꯣ꯫ - ꯑꯊꯧꯕ ꯀꯥꯔꯛꯂꯤꯕꯁꯤ ꯇꯪꯈꯥꯏ ꯐꯥꯎꯕ ꯆꯟꯗ꯭ꯔꯤ꫰ ꯀꯔꯤꯒꯤꯅꯣ ꯑꯃꯨꯛ ꯊꯨꯅ ꯊꯧꯅꯥ ꯃꯥꯡꯂꯤꯕ꫱ - ꯃꯔꯨꯞ ꯑꯩ ꯃꯈꯥ ꯇꯥꯅ ꯀꯔꯤꯁꯨ ꯄꯥꯝꯂꯨꯗ꯭ꯔꯦ꫰ ꯄꯣꯊꯥꯅꯤꯡꯂꯦ꯫
- ꯅꯈꯣꯡ ꯅꯈꯨꯠ ꯇꯦꯛꯄ ꯅꯠꯇꯦ ꯅꯪ꫰ ꯑꯃꯨꯛꯇꯗꯤ ꯈꯟꯊꯈꯣ꫰ ꯂꯥꯛꯈꯤꯕꯒꯤ ꯃꯔꯝ꯫ - ꯐꯅ ꯑꯣꯏꯅꯤꯡꯕ ꯑꯣꯏꯁꯅꯨ ꯃꯔꯨꯞ꫰ ꯑꯁꯨꯛ ꯋꯥꯕ ꯈꯣꯡꯆꯠ ꯑꯩ ꯃꯈꯥ ꯇꯥꯅ ꯁꯔꯨꯛ ꯌꯥꯅꯤꯡꯗ꯭ꯔꯦ꫰ ꯅꯈꯣꯏ ꯆꯠꯆꯔꯣ ꯊꯦꯡꯂꯅꯤ꯫

- ꯑꯊꯧꯕ!
ꯂꯥꯏꯔꯕ ꯑꯃꯗꯤ ꯄꯥꯡꯗꯕ ꯄꯥꯝꯕꯩ ꯂꯩꯇ꯭ꯔꯗꯨꯅ ꯊꯥꯗꯣꯛꯂꯝꯂꯦ ꯑꯊꯧꯕꯕꯨ꯫ ꯃꯇꯧ ꯑꯗꯨ ꯎꯕꯗ ꯅꯛꯅꯕ ꯆꯤꯡꯒꯥꯔꯣꯏꯁꯤꯡꯅ ꯆꯤꯕꯣꯟ ꯆꯤꯕꯣꯟ ꯉꯥꯡꯅꯩ꫰ ꯑꯇꯝꯅꯅ ꯍꯥꯏꯔꯛꯄꯁꯨ ꯌꯥꯎꯏ꯫ - ꯃꯤꯅꯨꯡꯁꯤ ꯈꯪꯗꯕ꯫ ꯂꯥꯛꯃꯤꯅꯔꯒ ꯂꯪꯊꯣꯛꯂꯝꯕ꯫ ꯄꯟꯊꯨꯡ ꯌꯧꯕꯁꯨ ꯉꯝꯂꯣꯏ꯫ ꯂꯥꯏꯅ ꯈꯜꯂꯨꯅꯨ ꯆꯠꯀꯗꯧꯔꯤꯕ ꯂꯝꯕꯤꯁꯤ꯫ ꯑꯣꯏꯔꯔꯣꯏꯗꯕ ꯈꯣꯡꯆꯠꯅꯤ ꯍꯟꯈꯤꯕꯅ ꯑꯐꯕ ꯑꯣꯏꯒꯅꯤ꯫ ꯃꯈꯣꯏ ꯑꯅꯤꯒꯤ ꯋꯥꯈꯜ ꯍꯣꯡꯍꯟꯕꯗꯤ ꯉꯝꯗꯦ꫰ ꯈꯣꯡꯊꯥꯡ ꯂꯦꯞꯇꯦ꯫ ꯅꯣꯛꯍꯧꯕ ꯉꯥꯡꯅꯍꯧꯕ ꯃꯈꯩ ꯅꯥꯊꯩꯔꯝꯂꯦ꯫ ꯑꯃꯨꯛ ꯍꯟꯈꯤꯕ ꯍꯥꯏꯕꯗꯨꯗꯤ ꯑꯣꯏꯊꯣꯛꯂꯔꯣꯏ꫰ ꯂꯥꯛꯈꯤꯕꯒꯤ ꯃꯔꯝ ꯄꯟꯊꯨꯡ ꯌꯧꯔꯨꯅꯕꯅꯤ꯫ ꯂꯝꯁꯤ-ꯁꯤꯍꯧꯕ ꯍꯛꯆꯥꯡ ꯀꯌꯥ ꯃꯆꯤ ꯃꯆꯤꯗ ꯇꯥꯍꯧꯔꯤꯕ ꯆꯤꯡꯈꯣꯡꯗꯒꯤ ꯍꯧꯔꯒ꯫ ꯃꯈꯣꯏ ꯑꯗꯨ ꯍꯟꯈꯤꯕꯒꯤ ꯃꯃꯤ ꯑꯃꯠꯇ ꯇꯥꯍꯧꯗꯦ꫰ ꯀꯅꯥ ꯀꯅꯥ ꯁꯤꯈꯤꯕꯒꯤ ꯃꯇꯧ ꯎꯠꯍꯧꯏ꯫ ꯇꯥꯟꯖꯥ ꯑꯗꯨꯗ ꯑꯁꯤꯕ ꯍꯛꯆꯥꯡ ꯑꯃ ꯀꯣꯜꯂꯒ ꯀꯅꯥꯒꯨꯝꯕ ꯑꯃꯅ ꯃꯆꯤꯟꯗ ꯁꯣꯜꯂꯝꯃꯤ꫰ ꯈꯥꯡꯕ ꯋꯥꯕꯅꯔ ꯑꯗꯨꯛ ꯉꯥꯏꯉꯝꯗ꯭ꯔꯤꯕ꫱ ꯅꯊꯟꯇ ꯁꯤꯖꯤꯔꯤꯕ ꯃꯔꯨꯞ꫰ ꯅꯪꯒꯤ ꯂꯝꯕꯤ ꯑꯐꯕ ꯃꯃꯤ ꯑꯃꯠꯇ ꯎꯈꯤꯗꯦ꯫ - ꯇꯥꯔꯕ꯭ꯔ ꯃꯔꯨꯞ ꯑꯁꯤꯕꯤ ꯋꯥꯍꯩ ꯑꯁꯤ꯫
- ꯄꯥꯡꯗꯕ꫰ ꯇꯨ ꯆꯨꯡꯅꯤꯡꯉꯥꯏꯒꯤ ꯃꯁꯛꯅꯤ꯫
- ꯃꯔꯨꯞ ꯅꯍꯥꯛ ꯊꯥꯖꯕ ꯂꯩꯔꯤꯕ꯭ꯔ꫰ ꯑꯊꯧꯕꯅ ꯍꯤꯡꯗꯨꯅ ꯂꯩꯔꯛꯈꯤꯅꯤ ꯍꯥꯏꯕꯒꯤ꫱ - ꯃꯗꯨ ꯂꯥꯛꯁꯤꯜꯂꯨꯕ ꯉꯝꯗ꯭ꯔꯦ ꯃꯔꯨꯞ꫰ ꯅꯪ ꯑꯩ ꯐꯥꯎꯕ ꯆꯠꯃꯤꯟꯅꯔꯤ ꯀꯥꯎꯔꯛꯂꯕꯅꯤ꯫ - ꯐꯅ ꯑꯣꯏꯔꯕꯁꯨ ꯃꯔꯨꯞ ꯑꯄꯥꯝꯕ ꯂꯝꯕꯤꯗꯤ ꯈꯛ ꯊꯤꯒꯨꯝꯁꯤ꯫
- ꯃꯥꯟꯅꯤ ꯃꯔꯨꯞ ꯃꯗꯨ ꯀꯥ ꯍꯦꯟꯅ ꯈꯨꯗꯣꯡꯊꯤꯅꯤꯡꯉꯥꯏꯅꯤ꯫
- ꯏꯍꯤꯡ ꯅꯥꯏꯍꯤꯡ ꯁꯥꯔꯕ ꯑꯁꯤꯕ ꯃꯍꯥꯛ ꯑꯗꯨ ꯑꯁꯝꯕ ꯂꯝꯕꯤꯗ ꯈꯣꯡ ꯊꯥꯡꯂꯨꯕꯒꯤꯅꯤ꯫ ꯇꯤꯡꯈꯪ ꯇꯨꯝꯕꯧ ꯃꯥꯌꯣꯛꯅꯕ ꯉꯝꯈꯤꯗꯦ ꯃꯍꯥꯛ꯫ - ꯃꯍꯥꯛꯀ ꯂꯣꯏꯅꯔꯛꯄ ꯃꯄꯥꯡꯁꯤꯡꯅ ꯂꯣꯏꯁꯤꯟꯕ ꯅꯥꯗꯅ ꯇꯦꯡꯊꯥꯔꯤ꯫
- ꯃꯍꯥꯛꯅ ꯁꯦꯝꯖꯕ ꯂꯝꯕꯤꯅꯤ ꯃꯔꯨꯞ꯫
ꯅꯨꯃꯤꯠꯅ ꯀꯣꯛꯇꯣꯟꯗ ꯂꯩꯈ꯭ꯔꯦ꯫ ꯂꯥꯏꯔꯕ ꯑꯃꯗꯤ ꯄꯥꯡꯗꯕ ꯀꯥꯈꯠꯄ ꯂꯦꯞꯇ꯭ꯔꯦ꯫ ꯐꯤꯔꯥꯜ ꯐꯪꯅꯕꯒꯤ ꯋꯥꯈꯜꯗ ꯆꯣꯛꯊꯔꯕ ꯍꯛꯆꯥꯡ ꯇꯨꯏꯟꯅꯔꯤ꯫ ꯃꯈꯨꯠꯇ ꯈꯨꯠꯂꯥꯏ ꯅꯤꯡꯊꯤꯅ ꯄꯥꯏꯔꯕ ꯃꯤꯌꯥꯝ ꯂꯥꯟꯗꯥꯔꯤ ꯅꯥꯏꯇꯣꯝ ꯇꯥꯔꯕ ꯁꯥ ꯑꯃꯗ꯫ - ꯆꯦꯟꯈ꯭ꯔꯤꯕ ꯁꯥ ꯑꯁꯤ ꯇꯥꯟꯅꯧ꫰ ꯑꯀꯤꯕꯅ ꯂꯧꯁꯤꯡ ꯃꯥꯡꯂꯕꯅꯤ꯫
- ꯉꯥꯏꯈꯣ ꯃꯗꯨꯕꯨ ꯍꯧꯅꯕ꯭ꯔ꫱
- ꯁꯥ ꯑꯁꯤ ꯆꯤꯟꯖꯥꯛꯅꯤ꫰ ꯑꯉꯝꯕꯅ ꯆꯥꯛꯊꯣꯛꯅꯕ ꯅꯠꯇ꯭ꯔꯕꯗꯤ ꯑꯩꯈꯣꯏꯕꯨ ꯁꯤꯈ꯭ꯔꯣ ꯍꯥꯏꯕ꯭ꯔ꫱ - ꯀꯔꯤ! ꯂꯝꯕꯥ ꯆꯥꯗꯦ ꯅꯈꯣꯏꯒꯤ ꯂꯥꯟ ꯑꯗꯨ꯫
- ꯃꯇꯝ ꯃꯥꯡꯍꯟꯒꯅꯨ ꯋꯥꯔꯦꯝꯅꯤ ꯀꯥꯟꯅꯗꯕ꫰ ꯃꯍꯥꯛꯀꯤꯁꯤ ꯇꯥꯔꯨꯕꯒꯤ ꯀꯥꯟꯅꯕ ꯂꯩꯇꯦ꯫ ꯃꯤꯁꯧ ꯆꯪꯂꯕ ꯃꯈꯣꯏ ꯃꯌꯥꯝ ꯍꯨꯞꯆꯤꯟꯗꯨꯅ ꯁꯥ ꯑꯗꯨꯕꯨ ꯍꯥꯠꯇꯣꯛꯏ꯫ ꯄꯥꯝꯖꯕ ꯁꯔꯨꯛ ꯈꯟꯅꯗꯨꯅ ꯌꯦꯟꯊꯣꯛꯅꯩ꯫ ꯏ- ꯅꯥꯏ ꯈꯔ ꯂꯩꯃꯥꯏꯗ ꯄꯛꯍꯧꯕ ꯑꯗꯨꯅ ꯍꯌꯤꯡ ꯈꯣꯡꯌꯥꯝꯕꯤ꫰ ꯇꯨꯃꯤꯠ ꯀꯥꯡꯁꯤꯡꯅ ꯂꯦꯛꯇꯨꯅ ꯂꯩꯍꯧꯏ꯫ ꯂꯩꯇꯣꯡ ꯂꯩꯈꯨꯠ ꯀꯥ ꯍꯦꯜꯂꯛꯄ ꯆꯤꯡꯒꯤ ꯉꯝꯈ꯭ꯔꯕ ꯁꯔꯨꯛ ꯑꯃ ꯊꯦꯡꯅꯔꯦ ꯃꯈꯣꯏ ꯑꯅꯤ꯫ ꯃꯐꯝ ꯑꯗꯨ ꯑꯁꯣꯛꯄ ꯑꯄꯟ ꯀꯨꯡꯏ꯫ ꯃꯤꯑꯣꯏ ꯀꯌꯥ ꯁꯤꯕ ꯃꯆꯦꯠ ꯈꯥꯛꯇꯨꯅ ꯂꯩꯔꯝꯕ ꯊꯦꯡꯅꯩ꯫ - ꯍꯨꯔꯥꯟ꫰ ꯄꯤꯔꯛꯎ ꯀꯗꯥꯏ꯫
- ꯃꯁꯤ ꯑꯩꯒꯤꯅꯤ ꯅꯡꯒꯤ ꯁꯔꯨꯛ ꯅꯠꯇꯦ꯫
- ꯀꯔꯤ! ꯑꯩꯒꯤ ꯆꯌꯣꯝ ꯍꯨꯔꯥꯜꯂꯒ ꯆꯥꯕ ꯉꯝꯕ ꯅꯪꯕꯨ ꯑꯩꯒꯤ ꯃꯔꯨꯞꯂ꯫
- ꯑꯩꯕꯨ ꯍꯨꯔꯥꯟꯕ!
- ꯆꯌꯣꯝ ꯑꯗꯨꯒꯤꯗꯃꯛ ꯃꯈꯣꯏ ꯑꯅꯤ ꯆꯣꯡꯁꯤꯟꯅꯗꯨꯅ ꯅꯝꯅꯩ꯫ ꯑꯃꯅ ꯑꯃꯕꯨ ꯍꯥꯠꯅꯒꯗꯕꯒꯤ ꯃꯇꯧꯅꯤ꯫ ꯁꯤꯡꯀꯨꯞ ꯁꯥꯔꯦ ꯆꯌꯣꯝꯁꯨ꯫ ꯃꯇꯧ ꯑꯗꯨ ꯌ ꯦꯡꯂꯤꯉꯩ ꯈꯣꯡꯐꯝ ꯆꯥꯔꯨꯗ꯭ꯔꯦ ꯂꯥꯏꯔꯕ꯫ ꯄꯥꯡꯗꯕꯅ ꯍꯛꯆꯥꯡ ꯉꯥꯛꯏ꯫ ꯃꯈꯣꯡ ꯊꯥꯡꯕ ꯉꯝꯈꯤꯗ꯭ꯔꯦ ꯂꯥꯏꯔꯕ꯫

- ꯀꯔꯤ ꯃꯇꯧꯅꯣ ꯃꯔꯨꯞ꯫
- ꯄꯥꯡꯗꯕ ꯆꯤꯡꯅꯒꯅꯨ꫰ ꯑꯩꯕꯨ ꯃꯐꯝ ꯆꯥꯕ ꯑꯃꯗ ꯐꯝꯊꯗꯨꯅ ꯄꯣꯊꯥꯍꯜꯂꯨ꫰ ꯑꯗꯨꯒ ꯅꯍꯥꯛ ꯅꯊꯟꯇ ꯀꯥꯈ꯭ꯔꯣ꫰ ꯆꯤꯡꯗꯣꯟ ꯌꯧꯗꯕ ꯌꯥꯗꯦ ꯈꯜꯂꯨ ꯃꯔꯨꯞ꯫ - ꯇꯁꯦꯡꯅ ꯈꯣꯡ ꯐꯨꯛꯄ ꯉꯝꯗ꯭ꯔꯕꯔ ꯃꯔꯨꯞ꫱
- ꯑꯩꯅ ꯃꯤꯠ ꯆꯣꯏꯔꯤꯉꯩ ꯑꯋꯥꯕꯁꯤ ꯅꯪꯂꯤꯕꯅꯤ꯫ ꯆꯠꯅꯤꯡ ꯆꯠꯅꯤꯡꯕ ꯌꯧꯔꯨꯕ ꯉꯝꯂꯔꯣꯏ꯫ ꯁꯦ ꯆꯌꯣꯝ ꯑꯁꯤ ꯄꯨꯈꯣ ꯃꯔꯨꯞ꯫ ꯑꯩ ꯄꯣꯊꯥꯍꯧꯔꯒꯦ ꯐꯟꯊꯔꯒꯅꯨ꯫ - ꯃꯔꯨꯞ!
ꯂꯥꯏꯔꯕꯕꯨ ꯄꯣꯊꯥꯐꯝ ꯄꯤꯔꯝꯂꯒ ꯅꯥꯏꯇꯣꯝ ꯃꯈꯣꯡ ꯊꯥꯡꯕ ꯍꯧꯔꯛꯏ ꯄꯥꯡꯗꯕ꯫ ꯅꯤꯡꯁꯤꯡꯂꯨꯏ ꯑꯊꯧꯕ꫰ ꯃꯍꯥꯛꯄꯨ ꯉꯥꯏꯔꯝꯈꯤꯒꯗ꯭ꯔ ꯈꯜꯂꯤ꯫ ꯂꯥꯏꯔꯕ꫰ ꯈꯨꯗꯣꯡꯊꯤꯕ꫰ ꯐꯥꯎꯔꯝꯒꯗꯕ ꯆꯩꯅꯥ ꯅꯨꯡꯄꯥꯜ ꯑꯅꯤꯗ꯫ ꯑꯉꯝꯕ ꯆꯤꯡ ꯑꯃꯗꯤ ꯊꯥꯞꯇꯣꯛꯈ꯭ꯔꯕ ꯈꯣꯡꯂꯣꯏ꫰ ꯍꯦꯟꯅ ꯆꯃꯝꯅꯍꯜꯂꯤ ꯄꯥꯡꯗꯕꯕꯨ꯫ ꯅꯨꯃꯤꯠꯀꯤ ꯃꯩꯁꯥ ꯆꯝꯊꯕ ꯍꯧꯔꯛꯂꯦ꯫ ꯑꯇꯣꯞꯄ ꯃꯤꯑꯣꯏꯁꯨ ꯊꯣꯏ ꯎꯈꯤꯗ꯭ꯔꯦ꫰ ꯃꯔꯛꯇ ꯑꯃ ꯑꯅꯤ ꯂꯟꯅ ꯊꯦꯡꯅꯕ ꯅꯠꯇꯅ꯫ ꯄꯥꯪꯗꯕ ꯎꯔꯨꯝ ꯂꯥꯡꯕ ꯃꯐꯝ ꯑꯃꯗ ꯉꯩꯍꯥꯛ ꯐꯝꯊꯩ꯫ ꯆꯌꯣꯝ ꯄꯨꯊꯣꯛꯇꯨꯅ ꯑꯔꯥꯝ ꯈꯧꯔꯥꯡꯕ ꯈꯔ ꯀꯣꯛꯍꯜꯂꯤ꯫ ꯄꯣꯊꯥꯕ ꯍꯥꯏꯕꯁꯤꯅ ꯄꯟꯊꯨꯡ ꯌꯧꯁꯤꯟꯕꯗ ꯊꯤꯟꯊꯍꯜꯂꯤ꫰ ꯈꯜꯂꯤ ꯃꯍꯥꯛ꯫ ꯍꯛꯆꯥꯡ ꯑꯗꯨꯇꯅꯤ ꯄꯣꯊꯥꯔꯤꯕ ꯃꯇꯝꯗꯤ ꯂꯦꯞꯇꯨꯅ ꯂꯩꯊꯣꯛꯇꯦ꯫ ꯈꯪꯅ ꯆꯠꯈꯤ꫰ ꯌꯦꯡꯗꯨꯅ ꯂꯩꯍꯧꯏ꯫ ꯄꯣꯊꯥꯗꯕꯤ ꯉꯝꯗꯦ꯫ ꯇꯨꯝꯊꯅꯤꯡꯕꯁꯨ ꯃꯥꯏꯑꯣꯛꯅꯕ ꯋꯥꯔꯛꯏ꯫ ꯄꯥꯡꯗꯕ ꯃꯃꯤꯠ ꯁꯤꯡꯂꯛꯏ꯫ ꯉꯩꯍꯥꯛ ꯎꯏꯊꯔꯨꯔꯦ꯫ ꯅꯨꯃꯤꯠꯁꯨ ꯂꯩꯊꯔꯝꯂꯦ꯫ ꯃꯁꯥꯒ ꯂꯣꯏꯅꯔꯛꯄ ꯄꯣꯠꯂꯝꯁꯤꯡ ꯈꯟꯊꯔꯨꯕ ꯇꯧꯗꯅ ꯃꯈꯣꯡ ꯊꯥꯡꯕ ꯍꯧꯔꯛꯏ ꯌꯥꯡꯅ꯫ ꯎꯕ ꯀꯧꯕꯗꯤ ꯂꯩꯇ꯭ꯔꯤ ꯄꯥꯟꯗꯝ ꯆꯤꯡꯗꯣꯟꯒꯤ ꯐꯤꯔꯥꯜ꯫ ꯅꯥꯔꯣꯟꯗ ꯐꯥꯎꯔꯛꯀꯗꯧꯔꯤꯕ꯭ꯔ꫰ ꯈꯜꯂꯤ ꯃꯊꯟꯇ꯫ ꯄꯥꯅ ꯈꯤꯛꯂꯛꯄ ꯅꯣꯡꯂꯤꯛꯅ ꯅꯨꯃꯤꯠ ꯈꯟꯖꯤꯟꯈ꯭ꯔꯦ꯫ ꯄꯥꯡꯗꯕꯕꯨ ꯆꯤꯡꯅꯍꯜꯂꯤ꯫ ꯃꯈꯣꯡ ꯊꯥꯡꯕꯗꯤ ꯂꯦꯞꯇꯦ꯫ ꯅꯣꯡꯂꯤꯛ ꯃꯥꯡꯈꯤꯕꯗ꫰ ꯈꯜꯂꯨꯗꯅ ꯊꯥꯖꯔꯦ꫰ ꯎꯔꯤꯕ ꯑꯗꯨ ꯐꯤꯔꯥꯜ ꯄꯔꯦꯡ ꯑꯃꯅꯤ꯫ ꯃꯍꯥꯛꯅ ꯄꯥꯝꯖꯅ ꯐꯪꯒꯅꯤ ꯂꯥꯛꯈꯤꯕ ꯑꯗꯨꯁꯨ ꯃꯥꯏꯑꯣꯛꯅꯔꯦ꯫ ꯃꯗꯨ ꯎꯕꯗ ꯈꯟꯊꯔꯨꯗꯅ ꯅꯣꯛꯏ꯫ ꯄꯥꯟꯗꯝ ꯆꯤꯡꯗꯣꯟ ꯐꯪꯂꯦ ꯑꯗꯨꯕꯨ ꯆꯤꯡ ꯀꯥꯕꯒꯤ ꯑꯋꯥ ꯅꯨꯡꯉꯥꯏ ꯑꯗꯨꯗꯤ ꯂꯣꯏꯈ꯭ꯔꯦ꯫ ꯄꯣꯠꯊꯥꯐꯝ ꯅꯠꯇꯅ ꯀꯔꯤꯁꯨ ꯂꯩꯇꯦ꫰ ꯂꯝꯕꯤꯁꯨ ꯎꯈꯤꯗ꯭ꯔꯦ꯫ ꯄꯨꯝꯅꯃꯛ ꯆꯤꯡꯗꯣꯟ ꯍꯥꯏꯕꯗꯨ ꯃꯃꯤꯡ ꯇꯥꯈ꯭ꯔꯕꯁꯨ ꯃꯁꯛꯇꯤ ꯎꯗ꯭ꯔꯤ꯫ ꯃꯍꯥꯛꯀꯨꯝꯅ ꯈꯧꯔꯥꯡꯂꯕ ꯀꯌꯥꯗꯤ ꯂꯦꯞꯂꯤ꯫ ꯅꯨꯃꯤꯠꯁꯨ ꯆꯤꯡꯅ ꯈꯟꯈ꯭ꯔꯦ꫰ ꯅꯣꯡꯃꯒꯤ ꯃꯄꯨꯟꯁꯤ ꯂꯣꯏꯔꯗꯨꯅ ꯫

• (ꯑꯣꯛꯇꯣꯕꯔ ꯲꯱, ꯲꯰꯱꯸) ꯍꯤꯡꯕ ꯇꯝꯂꯤ. 

• ꯍꯨꯌꯦꯟ ꯂꯥꯟꯄꯥꯎ, ꯁꯦꯞꯇꯦꯝꯕꯔ ꯲꯱, ꯲꯰꯱꯸ ꯫