Urang Cino Bukiktinggi

Asa kadatangan masyarakaik Cino di Bukiktinggi alun pasti diketahui taun baranyo, tapi kampuang tampek tingga kumpulan masyarakaik Cino alah ditantuan sajak pamarintahan Balando, tapeknyo ado di Kelurahan Benteng, Pasa Ateh. Panantuan tampek tingga masyarakaik Cino di Bukiktinggi diatua dalam paraturan nan banamo wijkenstelsel nan digunoan sajak tahun 1856. Sajak saaik itu, masyarakaik Cino mulai tingga di Kota Bukiktinggi. Masyarakaik Cino diagiah hak mambangun toko jo rumah tingga sahinggonyo kampuang tampek tingga urang Cino dapek lo manjadi pasa untuak urang-urang tu badagang. Banyak nan dari masyarakaik Cino di Kota Bukiktinggi nan badagang, tapi ado jo nan manjua jasa atau jadi pagawai pamarintah.

Kampuang tampek tingga masyarakaik Cino di Bukiktinggi banamo Kampuang Cino. Bantuak tampek tingga urang Cino di Kampuang Cino tu hampia samo sadonyo. Ado duo atau tigo tingkek. Dibangun baderet mamanjang dan talatak di jalan pusek Kota. Lantai patamo digunoan untuak manggaleh, sadangkan lantai atehnyo digunoan untuak tampek tingga.

Masyarakaik Cino di Bukiktinggi biasonyo manciptaan budayo surang nan balain dari etnis lain di Kota Bukiktinggi. Urang Cino alah sajak lamo tingga di Bukiktinggi, tapi sampai kini urang-urang tu tataok baradaptasi jo panduduak asli Bukikttinggi. Budayo Cino nan baragam manjadi sumbangan untuak pakambangan budayo Indonesia tarutamo di Kota Bukiktinggi.

Parekonomian padagang Cino punyo paningkatan tiok tahunnyo. Paningkatan tu dapek dicaliak dari fasilitas hiduik masyarakaik Cino nan punyo kamajuan dalam gaya hiduiknyo dibandiangan masyarakaik lokal. Salain tu, dari pandidikan, banyak anak-anak masyarakaik Cino nan lah dapek basakolah sampai paguruan tinggi di lua daerah Sumatera Barat. Ekonomi Cino taruih bakambang dan mancapai puncak sajak awal 19. Parekonomian Cino dapek maju dek babarapo pangaruah , contohnyo caro karajo urang Cino nan dicontoh manuruik keyakinan urang tu, kabijakan pamarintahan samaso maso Balando jo kabijakan pamarintahan Indonesia sasudah kemerdekaan sarato jo kondisi lingkungan sakita.

• Urang Cino Padang