Danau Tazawa

Danau iko marupoan danau tadalam di Japang (kadalaman maksimum 423,4 m). Kadalaman danau ko manyababkan pamukaan aia danau indak pernah mambaku katiko musim dingin.

Dipakiroan danau iko mulai diagai namo pado Zaman Meiji katiko manusia mulai manampati jo tingga di kaki-kaki bukik di sakitaranyo. Tatapi, danau iko alah dikanali sabalumnyo dek Suku Ainu jo namo “Tazawa” nan dipakiroan barasa dari kato dalam bahasa Ainu Tapukopu, nan aratinyo "bukik nan punyo puncak malingka ka ateh".

Danau iko dihubuang-hubuangkan juo jo legenda Putri Tatsuko, nan indak dikatahui asa mulonyo. Di tapi barat Tazawa tadapek patuang Tatsuko barwarna ameh nan tabuek dari parunggu nan marupoan hasia karya Yasutake Funakoshi. Tatsuko, nan mandambakan keabadian jo kacantikan, dalam legenda disabuikan barubah manjadi dewi danau.

Di sabuah desa nan barado di pinggia Danau Tazawa iduik saurang gadih sangaik rancak nan banamo Tatsuko. Inyo sadar bahwasanyo karancakannyo ko indak ka batahan lamo. Salamo 100 malam baturuik-turuik Tatsuko badoa kapado Buddha Welas Asih bia dapek diagai wajah rancak nan abadi. Buddha akhirnyo mangabulkan pamintaannyo. Inyo disuruah untuak maminum aia dari mato aia nan ado di tangah gunuang. Tatsuko manamuan mato aia nan dimukasuik tu dan maminumnyo. Namun samakin diminum, inyo samakin maraso hauih. Tanpa disadari tubuahnyo alah barubah manjadi saikua nago. Sasudah manyasali pabuatannyo, Tatsuko mancabuakan bandannyo ka dalam Danau Tawada dan kamudian iduik sabagai nago di danau.

Ibu Tatsuko cameh jo putrinyo nan pai ka gunuang dan indak kunjuang pulang. Inyo akhianyo batamu jo Tatsuko di pinggia danau. Tatsuko awalnyo manghampiri ibunyo dalam wujud saurang gadih. Namun barubahnyo Tatsuko manjadi saikua nago akhianyo dikatahui pulo dek ibunyo. Ibunyo manjadi sangaik sadiah dan kamudian maambuangan obor nan dipaciknyo ka dalam aia. Obor tu barubah manjadi ikan misterius nan disabuik kunimasu. Di daerah pasisia, sabalah utara Danau Tazawa tadapek danau banamo Hachirōgata. Di danau itu iduik saikua nago banamo Hachitarō nan dulunyo bawujuik manusia. Inyo tahu tentang kabaradoan Tatsuko, dan pai ka Danau Tazawa untuak manamuinyo. Hachitarō kamudian jatuah cinto kapada Tatsuko dan tingga basaonyo di Danau Tazawa. Sasudah kahilangan panghuninyo, Danau Hachirōgata dari tahun ka tahun samakin dangka. Sabaliaknyo sasudah panghuninyo batambah, Danau Tazawa manjadi samakin dalam dan angek sahinggo indak pernah mambaku salama musim dingin.

Hinggo tahun 1940, spesies ikan habitat asli atau panghuni asli Danau Tazawa adolah kunimasu (Oncorhynchus nerka kawamurae), salmon merah, Tribolodon hakonensis, trout Jepang, char, karper, Siluriformes, jo sidat. Tatapi, sasudah tajadi parubahan tingkek kaasaman aia danau tahun 1940, hampia kasado organisme di danau iko punah, tamasuk kunimasu. Ikan nan dapek batahan hiduik hanyo Tribolodon hakonensis. Biapun demikian, sambilan spesimen ikan kunimasu ditamuan pulo di Danau Saiko, Prefektur Yamanashi pado bulan Maret jo April tahun 2010.