Михаил Кудряшов (Михаил Иванович Кудряшов) (1959 идым 25, РСФСР, Марий АССР, Курыкмарий кундем, Сарансола ял –26 теле 2013, Йошкар-Ола) – курыкмарий серызе, почеламутчо, драматург, кусарыше, Марий Эл Республикысе тӱвыран сулло пашаеҥже (2000), Пайдул Искаев лӱмеш Чуваш Тӱнямбал литератур премийын лауреатше (2007).
Михаил Иванович Кудряшов | |
---|---|
Михаил Кудряшов | |
Шочмаш дене лӱм | Михаил Иванович Кудряшов |
Шочын | 1959 ий 25 идым |
Шочмо вер | РСФСР, Марий АССР, Курыкмарий кундем, Сарансола ял |
Колен | 2013 ий 26 теле (54 ий) |
Колымо вер | Йошкар-Ола |
Чап пӧлек да премий | Марий Эл Республикысе тӱвыран сулло пашаеҥже (2000), Пайдул Искаев лӱмеш Чуваш Тӱнямбал литератур премий (2007), Марий Эл Республикын Тӱвыра, савыктыш да калык паша шотышто министерствын Чапкагазше (1999), Марий Эл Республикын Кугыжаныш Погынын Чапкагазше. |
Михаил Кудряшов 1959 ийын идым тылзын 25-ше кечынже Марий АССР Курыкмарий кундем Сарансола ялыште кресаньык ешеш шочын.
Тÿвыра пашаеҥ, журналист, «У сем» журналын тÿҥ редакторжо (1997), писатель, краевед. 1977 ийыште Курыкмарий районысо Кузнеч кыдалаш школым тунем пытарымек, Совет армий радамыш куснен. Армий деч вара Козьмодемьянск олаште «Копир» заводышто пашам ыштен.
1981-1986 ийлаште Марий кугыжаныш университетыште, историй да филологий факультетыште, историй пӧлкаште тунемын. Вара Советский районысо Кужмара школышто историй ден обществознаний туныктышылан пашам ыштен. 1989 ийыште Йошкар-Олашке илаш куснымыж деч вара «Периодика Марий Эл» газет савыктышыште корректорлан пашам ыштен. 1997 ийыште «У сем» журналын тÿҥ редакторжо лиеш.
Литератур паша деке М. Кудряшов школышто тунеммыж годымак шÿмаҥын. Икымше почеламутшо «Кырык сирем» «Ленин корны» газетеш печатлалтын (1982). Икымше сборникше «Йоза окнявлӓ» («Волшебные окна») 1991 ийыште ош тӱням ужын. Варарак «Ӹлӹме жеп» («Время жить»), «Сирмӓш поран» («Метелица писем») повесть да ойлымаш книгаже лектын. Олык марий наречий денат икмыняр публикацийже печатлялтын. Историко-литературный да краеведений дене погымо материалжым «Знаешь ли ты родной край?» сборникыште савыктыме. Саде книгаже вич гана марла да рушла печатлалт лектын.
М. Кудряшов драматургий жанр денат пашам ыштен. Тудын кум пьесыж почеш Курыкмарий да Виловатово калык театрыште спектакльлам шындыме.
М.Кудряшов кусарымаш пашаланат шуко жапым ойырен. Тудо курыкмарий наречийышке В. Шукшинын, М. Юхман, У. Нойненын, В. Юксернын, Г. Гордеевын, Г. Алексеевын, Вяч. Абукаев-Эмгакын, Ю. Соловьёвын да моло финн-угор писатель-влакын произведенийыштым кусарен.
Михаил Кудряшов Пайдул Искаев лӱмеш Чуваш Тӱнямбал литератур премийын лауреатше, Марий Эл Республикын Тӱвыра, савыктыш да калык паша шотышто министерствын да Марий Эл Республикын Кугыжаныш Погынын Чапкагазше-влак дене палемдалтын. Марий Эл Республикысе тӱвыран сулло пашаеҥже.
Михаил Кудряшов сылнымут аланыште пеҥгыдын шоген. Тудо ойлымашым, повестьым, пьесым возымо дене пырляк шочмо кундемын историйжым, пÿртÿсшым шымлен, чыла тидым сылнымут йӧн деке лишемден, лудшылан – эн ондак тунемше ден туныктышо-влаклан – школ программе сынан, тунемме книга да пособий семын пуэн моштен. «Юзо окна-влак», «Знаешь ли ты родной край?» книгалаже чылалан пеш пайдале да шергакан улыт. Нуным школлаште, кундемнан тӱвыра ден историйжым тунемме уроклаште, моткоч кÿкшын аклат. Михаил Кудряшов краевед, историк да писатель лийын.
Йошкар-Ола, 2007. С. 197.
This article uses material from the Wikipedia Олык Марий (Olyk Marij) article Кудряшов, Михаил Иванович, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Контентым CC BY-SA 4.0 лицензий почеш кучылт кертыда (весым возымо огыл гын). Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Олык Марий (Olyk Marij) (DUHOCTRUNGQUOC.VN) is an independent company and has no affiliation with Wiki Foundation.