A bandêa de Zêna, ciamâ ascì Crôxe de San Zòrzo, a l'é 'na bandêa costituîa da 'na crôxe róssa in cànpo giànco, co proporçioìn 3:5.
ZE | Quésta pàgina a l'é scrîta in léngoa zenéize A Grafîa adeuviâ a l'é quélla de l'Académia Ligùstica do Brénno |
A bandêa a l'é stæta concèssa a Zêna da-o Pàppa Urbano II, quéllo ch'o l'à bandîo a Primma Croxâ, pròpio pò-u ròllo e i mériti ch'â Repùblica a l'à avûo inte quélla spediçión. Da parteçipaçión de Zêna a-a Primma Croxâ ne pàrla ascì o Tàscio inta sò La Gerusalemme liberata. Into Cànto XVIII l'aotô o löda o Ghigèrmo Enbrìaco (Inbriægo) e i "mèistri d'àscia" zenéixi ch'àn costroîo a tôre d'asédio, co-a quæ a l'é stæta conquistâ a Çitæ do Sànto Sepórto. I bàrchi che mostrâvan a bandêa rossocroxâ êan temûi into Mediterànio. Pe sta raxón chi l'Inghiltæra a l'à domàndòu a-a Repùblica de poéi mostrâ lê ascì a bandêa rossocroxâ in scî sò bàrchi. E l'é pe quéllo ch'a bandêa de l'Inghiltæra (quélla che lô ciàman a Crôxe de Sàn Zòrzo) a l'é a mæxima da Repùblica de Zêna; e pâ ch'a ségge stæta adreitûa afitâ da-i Zenéixi a-i Ingléixi into Medioêvo, ciù ò mêno into XIII sécolo; coscì i ingléixi aviéivan posciûo navegâ into Mâ Mediterànio sénsa poîa d'êse atacæ da-i piràtti e da-i tùrchi.
A ciù antîga testimoniànsa de l'ûzo da bandêa co-a Crôxe Róssa in cànpo giànco da pàrte de Zêna (Insignia cruxata comunis Janue) in sciâ tærafèrma a l'é di 28 de Seténbre do 1218. Inte quélli ténpi a bandêa co-a crôxe a sventolâva in sciâ çitæ de Vintimìggia ch'a s'êa aréiza a-i Zenéixi. Da-o 1238 in avànti, a bandêa co-a crôxe a l'é stæta mostrâ in mâ ascì, da prinçìpio cómme bandêa de goæra, da-o 1242 a l'é diventâ a bandêa navâle da çitæ. A bandêa a l'é stæta dêuviâ scinn-a-a pèrdia de l'indipendénsa into 1805 (anesción a-a Frànsa do Napolión). Da alôa a l'é restâ sôlo cómme scìnbolo monicipâle.
O scìndico de Zêna, o Marco Bucci, o pénsa de domandâ de palànche a-a regìnn-a Lizabétta II d'Inghiltæra pe-î ùrtimi 250 ànni d'afìtto, dæto che l'Inghiltæra a l'à ciàntòu li de pagâ aprofitàndo da deboléssa da Repùblica de Zêna. I giornâli ingléixi ascì àn parlòu che no l'é goæi de sta stöia chi.
Da-o 2019, pe voentæ da zónta Bucci, a l'é stæta institoîa a "fèsta da bandêa", manifestaçión dedicâ pròpio a-a Crôxe de San Zòrzo. A fèsta a se têgne a-i 23 de arvî, giórno de Sàn Zòrzo, tùtti i ànni e, tra e iniçiatîve ciù inportànti, a gh'é a nòmina de dêxe "anbasciatoî" de Zêna into móndo e colegaménti co-o Flag Institute e o St. George’s Club de Lóndra. Inti giórni da manifestaçión divèrse bandêe són instalæ in sce vàrri palàççi da çitæ, cómme o palàçio Tùrsci, o palàçio da Región, o tiâtro Càrlo Felîçe e a tôre do Pâxo.
This article uses material from the Wikipedia Lìgure article Bandêa de Zêna, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). O contegnûo o l'é disponìbile in sciâ bâze da licénsa CC BY-SA 4.0, se o no l'é diversaménte specificòu. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Lìgure (DUHOCTRUNGQUOC.VN) is an independent company and has no affiliation with Wiki Foundation.