Vic Reinders

Laes hie wie v'r mit de versjillende saorte Limburgs ómgaon.

Vic Reinders (1888-1961) waor 'ne Mestreechse beeldend kunsteneer. Daoneve sjreef heer ouch gediechte in 't Nederlands en 't Mestreechs.

Vic Reinders woort gebore in 1888 es Mathieu Antoine Victor Reinders. In 1910 riechde heer, same mèt 'n aontal aander kunsteneers de Limburgse kunstkring op. Heer storf in 1961.

Vic Reinders waor in de ierste plaots beeldend kunsteneer. 't Sjrieve vaan gediechte waor veur häöm 'n nevenactiviteit. Heer heet noets zelf poginge oondernome um zie werk te publicere. Zien Nederlandstaolege gediechte zien oetgegeve in twie bundels; de ierste bundel is oetgegeve door zien vrun ter iere vaan ziene zestegste verjaordaag, de twiede bundel nao zienen doed.

Ouch zien Mestreechse gediechte zien nao zienen doed oetgegeve. Zie dialek-werk umvat achtien gediechte, gesjreve tösse 1937 en 1956. Väöl vaan zien gediechte goon euver de stad Mestreech, Mestreechse gebruke en persoene. Wijer sjreef heer veerze mèt e religieus karakter.

Aon m'n Geboortestad

Wie leefste in m'n hart, mien Starestad,
mien Treech; iech zeen d'n Maos, d'n tores, pleine, straote,
iech huur d'n taol, dat bijnao zingend praote,
en weet: diech höb iech àltied leefgehad.

[...]

Wie broesj in diech dee geis mèt Carneval,
wie levenslöstig wètste fies te viere;
mèh aoch daonao, serjeus weer, God te iere,
dee geis vaan diech is, joonk, weer opgeveerd

Wie hunkerde m'n hart nao diech, mien stad,
es iech soms wied vaan diech eweech mòs leve;
ao, àltied is die beeld miech bijgebleve:
iech höb diech àl mie leve leefgehad.

(Oet: Mestreechter Veerskes, 1962)

De gediechte vaan Reinders in 't Mestreechs zien oetgegeve in de bundel:

• Mestreechter Veerskes (1962)

Reinders' gediechte in 't Nederlands zien versjene in de bundels:

• Ogivaal, verzen van Vic Reinders (1948)
• Druppels van stilte: gedichten (1962)

Gediechte vaan Reinders zien ouch trök te vinde in versjèllende blomlezinge:

• Boekèt Mestreechs (2005)
• Mosalect (1976)