Slekke

Laes hie wie v'r mit de versjillende saorte Limburgs ómgaon.

Dit artikel geitj euvere deersaort; veur de plaats, zuuch: De Sjlek.

Slekke of boekpuuetige (Gastropoda) zeen dere vanne klasse oete stam vanne weikdere (Mollusca). De naam boekpuuetige enne weitesjappelike naam zeen te danken ane gespeerdjen óngerkantj van 't lankwèrpig lief, dae veure veurtbewaeging zörg: gaster mèntj boek of maag en poda mèntj puuet. Weltwied zeen zoea 60.000 toet 75.000 versjillige saorte bekèndj.

Slekke zeen de ènsigste weikdere die ouch op 't landj laeve. De meiste slekke laeven inne zieë en daonaeve laef e deil vanne saorten in zeut water. De slekke zeen op versjillige meneren in te deile: zoea guuef 't slekke mit 'n huuske (huuskesslekke) en slekke zónger huuske (naaksslekke), saorte die door kiewe en anger die door lóngen aome; 't guuef aosaeters, plantjenaeters, detritusaeters en zelfs jagendje vleisaeter. De ieëste herkènbaar slekke stammen oet 't Cambrium. Slekke waere genkènmirk door ein inkel sjelp die meistes gedrejdj is. De meiste slekke zeen twieëslechtig; ze kinne van gesjeie geslach zeen, mer ouch hermafrodiet. Slekke waere door väöl dere gegaete, worónger de miens.

Doordet slekke döks e verkalk huuske höbbe, 't slekkenhoes, zeen van dees deergroep väöl oetgestórve saorte bekèndj. Väöl saorte waere gebroek es gidsfossiel, zodet de ajerdóm van aerdläög kan waere vasgestèldj.