J.j. Cale: Amerikaanse singer-songwriter en gitaris

Laes hie wie v'r mit de versjillende saorte Limburgs ómgaon.

J.J. Cale (oetspraok: Dzjeejdzjeej Keejl), gebaoren es John Weldon Cale (Oklahoma City, 5 dieëtsember 1938 – La Jolla, 26 juli 2013), waas 'nen Amerikaanse singer-songwriter en gitaris. Hae greudje op in Tulsa, det ouch inne staot Oklahoma ligk. Hae is veural bekèndj van twieë nómmers die ouch door Eric Clapton zeen gedaon, namelik After Midnight en Cocaine. 'n Anger bekèndj nómmer van 'm is Call Me The Breeze. J.J. Cale steitj bekèndj es de vertolker vanne zoeageneumdje "Tulsa Sound".

Zienen artiestenaam "J.J. Cale" kreeg t'r van 'ne nachclubeigener in Los Angeles, aangezeen d'r nag 'nen angere John Cale inne regio aktief waas. Ónger aanspäöring van Leon Russell en anger muzikantjen oet Tulsa waagdje Cale de spróngk nao de meziekscene van Los Angeles. Naodet t'r al zie geldj haw opgemaak góng d'r trögk nao Tulsa en vanoet dao wós t'r toch nag door te braeke.

Cale stórf innen aovendj van 26 juli 2013 op 74-jäörige laeftied aan 'n hertaanval, in e krankenhoes in La Jolla inne staot Californië.

Zien hanjelsmirk waas 't zoeageneump "laid back"-zinge (juus nao d'n tèl inzètte mitte zangk). Daonaeve waas Cale, door zienen deenstied bieje lóchmach, henjig mit lektronica, wodoor d'r zienen eige meziek mitperduceerdje en zien opnames e specifiek geluid krege. Óngerdeil hievan zeen 't dubbe vanne zangk en 'ne lome, ingetaoge sfeer.