Córdoba

Laes hie wie v'r mit de versjillende saorte Limburgs ómgaon.

Córdoba (klemtoean oppen ieëste lèttergreep) is 'n stad in Andalusië in 't zuje van Spaanje. 't Is de houfstad vanne pervinsje Córdoba. De stad ligk 122 marer baove zieëspegel, ane reveer de Guadalquivir en ane voot vanne berg Sierra Morena. In 2016 haw Córdoba róndj de 325.000 inweuners, womit 't de op twieë nao grótste stad van Andalusië is. 't Is de wermste stad van Europa; eder jaor kump d'n temperatuur veur maondje lang ónaafgebraoke baove de 35 °C oet.

Oeatj waas Córdoba ein vanne wichtigste stej vanne werreld. Innen tieëndjen ieËf zelfs de op ein nao grótste, mit 'n inweunersaantaal van róndj 'n half miljoen; veur daen tied waas det oetzunjerlik hoeag. Oet daen tied zeen taalrieke monumènten euvergebleve, wovan de Mezquita 't bekandjste is. Saer 1984 steit 't gans historisch centrum vanne stad oppe Werreldirfgoodlies.

De stad is de gebaorteplaats van filosofe wie Seneca, Averroes en Maimonides. Kwa kaokkóns is 't gerich "Rabo de Toro" (stoufpot van stierestert) bekandj.

Dore kolonisaasje van Amerika dore Spanjoeale höbbe mieër es doezjend plaatse dao de naam Córdoba mitgekrege. De wichtigste daovan is Córdoba in Argentinië, waat mit ruum mieër es e miljoen inweuners väöl grótter is es 't oearsprunkelik.