Taxo

Lo crese lente e pote deveni multe vea, e ateni altias de 2.5 a 20 m, con un tronco de 5 m perimetre. Los ave un lenio brun rojin, folias plata e lansin.

La conos de la semes pare multe diferente de los de la plu de coniferes. Cada cono conteninte un seme solitar ensircada par un scama cual developa a un strutur simil a un baca, mol e roja briliante, nomida un arilo. La arilo es matur 6 a 9 menses pos poleni. La arilo es comeda par turdos, bombisilas, e otra avias, cual sperde la semes dur, no danada, en sua feces, cual es la modo xef de sperde la taxo.

Tota spesies de taxo conteni la multe venenosa alcaloide de taxo. Tota partes de la arbor conteni la alcaloide estra la arilos. La arilos es comable e dulse, ma la seme es multe venenosa. La stomaco de avias no pote rompe la pel de la seme, donce, la seme no pote relasa la veneno. Ma umanas ave stomacos cual rompe la pel, e donce pote es ferida e an matada par los, si on no estrae prima la seme. Animales ci come a pasto, spesial boves e cavalos, es trovada a veses mor prosima a un taxo pos come la folias. Ma servos es capas de rompe la alcaloide, e donce come fasil la folia de la taxo.

La lenio de la taxo es brun rojin (con lenio de sava plu blanca), e es multe flexable. Lo ia es tradisional usada per fabrica arcos, spesial arcos longa, como usada par la engles a la batalia de Agincourt. La parola "taxo" es derivada de la latina taxus, cual es derivada, tra elinica, de la parola scitianes per la arbor e per la arco, taxša.

La taxo pote vive a un eda grande. La taxo en la semetero de la vileta cimrica de San Cynog es datida con 5000 anios. Posible sua vive longa es la razona perce la taxo es ance asosiada con la sempreverde "arbor de la mundo" Yggdrasil en mitolojia Norsce.