Linguistica Strato

Un sustrato es un lingua cual ave min potia o prestijia ca un otra, e un suprastrato es un lingua cual ave plu potia o prestijia. Ambos la linguas sustratal e suprastrato influe lunlotra, ma en modos diferente. Un astrato es un lingua cual es en contata con un otra en un popla visina sin avente prestijia clar plu o min, como la efeto de un sprachbund (comunia de linguas) como lo en la Balcanes. La idea de strato ia es prima developada par la linguiste Graziadio Isaia Ascoli (1829 - 1907).

Esta consetas aplica a un situa do un lingua intruinte fundi se en la teritorio de un otra, tipal como la resulta de migra. Esce la caso suprastratal o sustratal aplica ta es normal sola evidente pos multe jeneras, en cuando la lingua intruinte esiste en un cultur diasporal. Per la lingua intruinte ta persiste (la caso sustratal), la popla migrante ta nesesa prende la rol de un elite o migra en un cuantia sufisinte grande relativa a la popla orijinal. Esta es per dise ce la intrui es o un invade o un coloni; un esemplo es la Impero Roman developa a la linguas romanica estra Italia, desponente galo e otra linguas indo-european.

La caso suprastratal, un popla elite ta adota ultima la lingua de la clases inferior. Un esemplo es la burgundianes e la francos en Frans, ci ia abandona sua linguas germanica per la linguas romanica de la teritorios cual los ia concista, ma influe forte la lingua local.

Otra esemplos de sustratos es la influe de la lingua norn, aora estinguida, a la dialetos de scotes de la Isolas Shetland e Orkney; en Asia sude-ueste e Africa norde, dialetos arabi local, spesial la dialetos levantan, egiptian, e magreb comun esibi sustratos sinifiante de otra linguas semitica (como arami), farsi, e la linguas berber. Arabi iemeni ave arabi sude moderne, arabi sude vea, e himiaritica como sustratos.

Un suprastrato pote ance represente un elemento linguistica como lo cual ia aveni pos la Concista Norman en 1066, cuando la usa de engles ia ave prestijia basa, e parolas de franses (spesial la dialeto de Normandia) ia entra engles en cuantias grande. En la caso de franses, latina es la suprastrato e galo es la sustrato.

Un esemplo cual es probable plu bon un esemplo de un astrato es la efeto ce latina e elinica ia ave sur la linguas european, spesial en areas de siensa. O on pote vide lo un esemplo de suprastrato, la resulta de la prestijia de la linguas clasica, an si lo efeto no inclui un move de popla.

Un otra esemplo es japanes, cual alga linguistes sujeste es la resulta de un sustrato austronesian con un suprastrato altaica, un de un varia de esplicas per la orijina de la lingua.