Троича Лун

Троича локтӧ Ыджыд лун бӧрын сизим [[вежон мысти. Йӧз костын артавсьӧ, мый тайӧ лунсяньыс заводитчӧ гожӧм.

Троича лунӧ вӧрысь либӧ вичкоысь вайӧм кыдз пу росъяс пукталӧны керка ӧшинь да ӧдзӧс юр йывъясӧ, медым видзчысьны пӧжарысь да став лёксьыс.

Вачкышталӧны челядьӧс, дзоньвидзалун сиӧмӧн: «Быдмӧ, быдмӧ, кыдз пуыс моз жӧ!».

Кодсюрӧяс вачкышталӧны кыдз пу увъясӧн скӧт лудӧ лэдзигӧн. Мукӧдыс видзӧны росъяссӧ енув пельӧсын мӧд Троичаӧдз.

Унджык сикт-грездас вайӧны вӧрысь том кыдз пуяс да пуктӧны ӧшинь улӧ ли дзирья дорӧ, а Емва вожын сувтӧдлӧмаӧсь улич пӧлӧн ӧтар-мӧдар бокас.

Удораын, Луздорын да Емва вожын том йӧз сувтӧдлӧмаӧсь ыджыдджык кыдз пу луд вылӧ, мичмӧдлӧмаӧсь, сэсся сы гӧгӧр гажӧдчылӧмаӧсь.

Троича вичко улӧ пырысь сиктъясын тайӧ луныс вӧлӧма сура праздникӧн и олысьясыс виччысьлӧмаӧсь гӧсти став матігӧгӧрса сикт-грездъясысь рӧдвужсӧ.

• Коми календар. 2009 во / Лӧсьӧдіс Ӧльӧш Рассыхаев. — Сыктывкар, 2008.