Тимонин Николай Иосифович: геолог

Тимонин Николай Иосифович (1934—2016) — геолог-туялысь, геология-минералогия наукаясса доктор.

Николай Тимонин чужис Коми обласьтысь Луздор районса Поруб грездын 1934 вося тӧвшӧр тӧлысь 2-ӧд лунӧ.

1952 воын помаліс Изьва районса Мокчой шӧр школа, 1957 воын — В.В. Вахрушев нима Свердловскса горнӧй институтысь геолого-разведка факультет, босьтіс гӧрд диплом «Техника разведки» специальносьт серти.

1957—1961 воясӧ уджаліс Лунвыв Уралса да Оренбургса геология управленньӧяслӧн геолоразведкаясын, корсис изшом да ыргӧн куйланінъяс. 1961 восянь уджаліс СССР-са наукаяс академияысь Коми филиаллӧн Геология институтын: старшӧй лаборант, младшӧй да старшӧй научнӧй сотрудникӧн, институтса туясян секретарӧн, ведушӧй да главнӧй научнӧй сотрудникӧн.

Уджысь орӧдчытӧг помаліс аспирантура. 1983—1996 воясӧ — СССР-са наукаяс академияысь Коми филиаллӧн (ӧні — Россияса наукаяс академиялӧн Коми наука шӧрин) Президиумын веськӧдлысьӧс наукаысь вежысь. Вӧчис ыджыд удж Коми муын туясьӧмъяс котыртӧмын, академическӧй учреждениеяс лӧсьӧдӧмын да ёнмӧдӧмын. Н.И. Тимонин унатор вӧчис СССР-са наукаяс академиялысь Коми филиалысь Коми наука шӧрин артмӧдігӧн.

Куліс Сыктывкарын 2016 вося лӧддза-номъя тӧлысь 19-ӧд лунӧ.

25 во чӧж нуӧдіс туясьӧмъяс Тиманын, Войвыв да Полярнӧй Уралын, Пай-Хойын, Вайгач да Выльму діясын. Туясян уджъясыс йитчӧмаӧсь Урал-Из гӧраяс артмӧмкӧд.

Кандидат ним вылӧ диссертациа дорйис 1971 воын СССР-са наукаяс академиялӧн Геология институтын.

1998 воын Коми наука шӧринса Геология институтын дорйис геология-минералогия наукаясса доктор ним вылӧ диссертациа. Йӧзӧдіс 300 сайӧ туясян удж, на лыдын 20 монографиа.

Н.И. Тимонин вӧчис ыджыд общественнӧй удж.

Котыртіс да веськӧдліс туясян экологическӧй уджтасъясӧн: «Сӧстӧм Печора» (1986), «Коми Республикаса видзана вӧр-ва мутасъяс» (1996). Вӧлі куим тома «Коми Республика» энциклопедияын медшӧр редакторӧс вежысьӧн.

• Тектоника гряды Чернышева. — Л., 1975.
• Новоземельский мемориал. — Сыктывкар, 1995.
• Печорская плита: история геологического развития в фанерозое. — Екатеринбург, 1998.
• Палеогеодинамика Пай-Хоя.
• Минералогия Пай-Хоя.

• Коми Республикаса наукаын нималана уджалысь (1992)
• «Почёт пас»
• Коми Республикаса канму премиа босьтысь (2001)
• СССР-са «Знание» котырлӧн «Зіль уджысь» пас
• «Коми Республикаса мупытшса озырлунъяс корсьӧмын уджысь» пас
• «Уджвывса ветеран» медаль

• Дедеев В. Тимонин Николай Иосифович // Республика Коми: Энциклопедия: В 3-х т. — Сыктывкар: Коми кн. изд-во, 2000. — Т. 3. — С. 149.
• Тимонин Николай Иосифович // Известия Коми научного центра УрО РАН. — 2010. — №. 1. — С. 119.