Pomhaj Bóh: časopis ewangelskich Serbow
Pomhaj Bóh je měsačnje wuchadźacy časopis ewangelskich Serbow w Hornjej Łužicy.
Wudawa so w hornjoserbšćinje, składnostnje wozjewja tež přinoški w delnjoserbskej rěči. Pomjenowany je po starodawnym postrowje ewangelskich Serbow „Pomhaj Bóh“. Časopis wobsahuje hłownje přinoški wo přitomnosći a stawiznach ewangelskich Serbow w Hornjej a Delnjej Łužicy. Nimo aktualnych rozprawow z dwurěčnych wosadow wobjednawa powšitkowne nabožne, kulturne a kulturnostawizniske temy. Zamołwita redaktorka je Trudla Malinkowa. Zhromadnej wudawaćelej stej Serbski wosadny zwjazk a Serbske ewangelske towarstwo z.t.
Stawizny
Z Rujan pochadźacy Chrjebjanski farar Friedrich Selle (1858–1931), kiž bě tam za krótki čas serbsce nawuknył, załoži Pomhaj Bóh jutry 1891 jako tydźensce wuchadźace njedźelske łopjeno za serbske ewangelske wosady Hornjeje Łužicy. Časopis słužeše nabožnemu natwarjenju, powučenju, informaciji a zabawje. Hromadźe z druhimi serbskimi ćišćerskimi wudźěłkami jón nacionalsocialisća 1937 zakazachu.
Znowawuchadźenje bě wot decembra 1950 jako měsačnik móžne. Jako přiłoha Pomhaj Bóh wuńdźeštej wot 1988 do 1990 wob lěto dwě čisle nowozałoženeho delnjoserbskeho nabožneho časopisa Pomogaj Bog. Tutón wuchadźa wot 1991 jako měsačna wosebita strona delnjoserbskeho tydźenika Nowy Casnik.
Zamołwići redaktorojo
| 1891–1895 | Friedrich Selle, farar w Chrjebi |
| 1895–1916 | Jan Gólč, farar w Budyšinku a w Rakecach |
| 1916–1917 | Korla Awgust Fiedler, wyši wučer na wuměnku w Budyšinje |
| 1917 | Marko Smoler, nakładnik w Budyšinje |
| 1917–1937 | Korla Wyrgač, farar w Nosaćicach |
| 1950–1955 | Božidar Dobrucky, bywši farar w Budyšinku, wotrjadnik Serbskeho kulturneho zarjada w Budyšinje |
| 1955–1958 | Gustaw Alwin Mjerwa, farar w Bukecach a serbski superintendent |
| 1958–1979 | Gerhard Wirth, farar w Njeswačidle a serbski superintendent |
| 1979–1984 | Cyril Pjech, farar w Riesy |
| 1984–1999 | Siegfried Albert, farar w Budyšinje a serbski superintendent |
| wot 2000 | Trudla Malinkowa, publicistka w Budyšinje |
Literatura
- Werner Měškank, 150 lat czasopisma „Pomogaj Bog”. 50 lat Radia Łużyckiego, Łużyczanie w europejskich kontekstach, UNIWERSYTET WARSZAWSKI INSTYTUT SLAWISTYKI ZACHODNIEJ I POŁUDNIOWEJ, Zeszyty Łużyckie, TOM 39/40, Warszawa 2006, p. 147 - 159
Wotkazaj
- Webstronki časopisa Pomhaj Bóh
- Archiw zašłych wudaćow
Katolski Posoł | Łužyca | Nowy Casnik | Płomjo | Pomhaj Bóh | Rozhlad | Serbske Nowiny | Serbski rozhłós | Wuhladko
This article uses material from the Wikipedia Hornjoserbsce article Pomhaj Bóh, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Wobsah pod CC BY-SA 4.0 k dispoziciji steji, jeli njeje so hinak podało. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Hornjoserbsce (DUHOCTRUNGQUOC.VN) is an independent company and has no affiliation with Wiki Foundation.