Z Mytom Zejlerja wuznamjeni Sakske statne ministerstwo za wědomosć a wuměłstwo wusahowace wukony „na polu přiswojenja, nałožowanja a posrědkowanja serbskeje rěče,“ wosebje hornjoserbšćiny.
Wěnowane je myto basnikej, publicisće a duchownym Handrijej Zejlerjej (1804–1872), kotryž jako załožer moderneje serbskeje literatury płaći a kotrehož twórby hač do dźensnišeho wuznam za serbsku rěč maja. Myto Zejlerja je z 5.000 eurami dotěrowane a so wot lěta 2014 dwulětnje w serbskim sydlenskim rumje Swobodneho stata Sakskeje wosobinje abo skupinje wosobow jónkrótnje spožči.
Z prěnim Mytom Zejlerja počesći Sakska statna ministerka za wědomosć a wuměłstwo Sabine von Schorlemer 20. junija 2014 w Kamjenskej klóšterskej cyrkwi swj. Hany fararja a něhdyšeho redaktora Katolskeho Posoła Gerata Wornarja (* 1942), za jeho „dołholětne wobstajne skutkowanje na dobro spěchowanja a šěrjenja dobreje spisowneje serbšćiny jako čestnohamtski šefredaktor a publicist.“
Knjeni dr. Irenje Šěrakowej (* 1942) spožči so myto za serbsku rěč 2016 za „spušćomne, wutrajne a wobšěrne skutkowanje na dobro praweho nałožowanja serbskeje rěče w najwšelakorišich wobłukach pismowstwa.“ Lawreata počesći dr. Eva-Maria Stange 16. septembra 2016 w Kamjencu.
Třeće Zejlerjowe myto spožči so w lěće 2018 Dieterej Redźe a Julianje Kaulfürstowej za swój angažement za wobchowanje Slepjanskeje serbšćiny. 2020 dósta Chrysta Meškankowa Myto Zejlerja za swoje zasłužby wosebje na polu serbskeje cyrkwinskeje hudźby.
Składnostnje 150. posmjertnin Handrija Zejlerja wotmě so mytowanje 19. oktobra 2022 prěni raz we Łazowskej ewangelskej cyrkwi, hdźež bě mjenodawar přez lětdźesatki skutkował. Myto Zejlerja 2022 spožči so Witej Bejmakej, wosebje za jeho zasłužby při zakótwjenju serbskeje rěče w digitalnym swěće.
This article uses material from the Wikipedia Hornjoserbsce article Myto Zejlerja, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Wobsah pod CC BY-SA 4.0 k dispoziciji steji, jeli njeje so hinak podało. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Hornjoserbsce (DUHOCTRUNGQUOC.VN) is an independent company and has no affiliation with Wiki Foundation.