Mikławš Jacsławk (němsce Nikolaus Jaczwauk; * 3.
februara">3. februara 1827 w Nowoslicach, † 29. julija 1862 w Njebjelčicach) bě serbski duchowny, basnik wótčinskeje lyriki a satiriski spisowaćel. Wustudowawši w Praskim Serbskim seminarje sta so z kapłanom w Njebjelčicach.
Jacsławk narodźi so jako syn Nowosličanskeho ratarja a wopytowaše najprjedy gymnazij w Chomutovje. Wot 1845 do 1852 bě chowanc Serbskeho seminara a wot 1845 do 1847 šuler němskorěčneho Małostronskeho gymnazija. W lětomaj 1847/48 bě chorosće dla dlěši čas doma we Łužicy. Po nawróće do Prahi studowaše wot 1848 do 1852 tamle filozofiju a teologiju.
Po studiju skutkowaše najprjedy hač do 1854 jako pomocny wučer a němski prědar při Budyskim tachantstwje a wot 1855 hač do swojeje zažneje smjerće w starobje jenož 35 lět jako kapłan při Njebjelčanskej cyrkwi swjateho Měrćina.
Mikławš Jacsławk bě sobuzałožer Praskeho serbskeho towarstwa Serbowka a wot 1850 do 1852 jeho starši. Swoje prěnje, hłownje romantiske, basnje podawaše do Kwětkow, wot 1848 tež do Jutnički, hdźež bě jedyn z najaktiwnišich sobudźěłaćerjow. Z čěšćiny přełoži Tylowe powědančko Šwanda dudak (1850) a pěseń Pod hrodźišćom niže klóštra.
W rewoluciskim času mjez 1848 a 1850 napisa někotre satiriske fejetony a skicy, mjez nimi Zaječu zhromadźiznu (1849), parodiju na Narodnu zhromadźiznu w Frankobrodźe. 1855 předpołoži Maćicy Serbskej 200 stronow wobšěrnu knihu Powěsće z Delan, kotraž pak njebu wozjewjena a kotrejež manuskript so na njeznate wašnje zhubi.
Sam bě wot 1847 čłon Maćicy a w lětomaj 1854/55 jeje wuběrkownik.
This article uses material from the Wikipedia Hornjoserbsce article Mikławš Jacsławk, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Wobsah pod CC BY-SA 4.0 k dispoziciji steji, jeli njeje so hinak podało. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Hornjoserbsce (DUHOCTRUNGQUOC.VN) is an independent company and has no affiliation with Wiki Foundation.