Jan Andricki (němsce Johann Andritzki; * 22.
oktobra">22. oktobra 1880 w Pančicach, † 14. oktobra 1955 w Radworju) bě serbski wučer, kantor, dirigent a kulturny prócowar.
Narodźi so jako syn Pančanskeho žiwnosćerja-šewca Jana Andrickeho a młódši (poł)bratr Mikławša Andrickeho a wopytowaše wot 1894 do 1899 Tachantsku šulu a Katolski wučerski seminar w Budyšinje. W lěće 1899 bě z wikarom a wot 1900 do 1908 z wučerjom w Radworju. 1908 sta so z nawodu Radworskeje šule. Dla swojeho serbskeho nastajenja bu 1937 wot nacionalsocialistiskeje wyšnosće suspendowany, kotraž jeho jako „radikalneho Serba“ posudźowaše. Po kóncu fašistiskeho knjejstwa so pak w lěće 1945 zaso do zastojnstwa nawróći. 1948 poda so na wuměnk.
Jako Radworski wučer nazwučowaše w lěće 1904 z towarstwom „Meja“ činohru Na hrodźišću Jakuba Barta-Ćišinskeho, štož bě zdobom prěnje dospołne předstajenje hry. Za swoje zasłužby při zběranju pjenjez za twar Serbskeho domu dósta čestny diplom. We swojej wučbje a swójskich spisach mjez druhim za Serbske Nowiny a Katolski Posoł prócowaše so wo čistu serbšćinu bjez zbytnych cuzych wobrotow. W fašistiskim času mjez 1937 a 1945 nawjedowaše Radworsku Meju dale jako cyrkwinski chór a staraše so na te wašnje wo dalewobstaće towarstwa. Wot lěta 1898 bě z čłonom Maćicy Serbskeje.
Jan Andricki bě zmandźeleny z Madlenu, rodź. Cyžec (1887–1962) a nan serbskeho martrarja Alojsa Andrickeho. Cyłkownje měještaj Andrickec mandźelskaj šěsć dźěći, dwě dźowce (Marja a Marta) a štyrjoch synow (Jan, Gerard, Alojs, Alfons).
This article uses material from the Wikipedia Hornjoserbsce article Jan Andricki, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Wobsah pod CC BY-SA 4.0 k dispoziciji steji, jeli njeje so hinak podało. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Hornjoserbsce (DUHOCTRUNGQUOC.VN) is an independent company and has no affiliation with Wiki Foundation.