Bohačesć Bjedrich Ponich (němsce Ehregott Friedrich Pannach; * 8.
meje">8. meje 1761 w Malešecach, † 1826 we Łuću) bě serbski ewangelski farar a załožer tak mjenowaneje Ponichoweje knihownje.
Wón narodźi so jako syn fararja Pětra Ponicha a wo 13 lět młódši bratr Samuela Bohuwěra Ponicha w ewangelskej wosadnej wsy Malešecach. Po studiju teologije we Wittenbergu, hdźež běše z čłonom Serbskeho prědarskeho towarstwa, nastupi w lěće 1809 zastojnstwo jako farar we Łuću, hdźež wukřći mjez druhim młodeho Jana Arnošta Smolerja. Ponich skutkowaše hač do swojeje smjerće w lěće 1826 w małej holanskej wosadźe.
Ponich zběraše mnóstwo serbskich rukopisow, wotpisowaše je a nahromadźi sej tak drohotnu knihownju z něhdźe 70 titulemi. Po jeho smjerći kupi farar Budyskeje Michałskeje cyrkwje Handrij Lubjenski knihownju za tři tolerje, zo by ju Serbskemu prědarskemu towarstwu w Lipsku k dispoziciji stajił. Handrij Zejler prosy pak w lisće dnja 11. decembra 1827 Lubjenskeho, žadnu knihownju w Budyšinje wobchować, zo by so tež wot bywšich sobustawow towarstwa wužiwać móhła. Na to so wona pod mjenom „Ponichowa knihownja“ w kapalni Michałskeje cyrkwje zaměstni. Pozdźišo bu z njeznatych přičin tola do Lipska dowjezena.
This article uses material from the Wikipedia Hornjoserbsce article Bohačesć Bjedrich Ponich, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Wobsah pod CC BY-SA 4.0 k dispoziciji steji, jeli njeje so hinak podało. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Hornjoserbsce (DUHOCTRUNGQUOC.VN) is an independent company and has no affiliation with Wiki Foundation.