Šepšecy: Wotbagrowana wjeska w Hornjej Łužicy
Šepšecy (prjedy tež Šepc; němsce Schöpsdorf) běchu holanska wjeska na sewjeru Hornjeje Łužicy, kotraž bu w lěće 1981 wopušćena a potom za Bjerwałdsku brunicowu jamu wotbagrowana.
Po hamtskich ličbach mějachu so 70 wobydlerjow přesydlić. Wjetšina z nich přećahny do susodneho Delnjeho Wujězda.
Geografija
Šepšecy ležachu na prawym boku Sprjewje sewjernje Delnjeho Wujězda a juhozapadnje Łuća, w dźensnišim zapadnym zaliwje Bjerwałdskeho jězora. Sydlišćo steješe na kopcu, zo by před wulkej wodu Sprjewje škitane było.
Stawizny
Prěnje historiske naspomnjenje městna jako Schewbsdorf pochadźa z lěta 1418. Přez lětstotki podsteješe wjeska ryćerkubłu w Delnim Wujězdźe. Hač do lěta 1957 běchu Šepšecy samostatna gmejna; potom buchu do Łuća zagmejnowane.
Šepšečenjo zhonichu wot planowaneho přesydlenja swojeje wsy hakle 1976 w běhu přesydlenja susodneho Łuća. W lěće 1981 rozpušći so gmejna a dnja 8. měrca wotmě so rozžohnowanska swjatočnosć w Šepšecach.
Wobydlerstwo
Po statistice Arnošta Muki mějachu Šepšecy w 1880tych lětach 122 wobydlerjow, kotřiž běchu bjez wuwzaća Serbja. Tež Arnošt Černik zwěsći w lěće 1956 w Šepšečanskej gmejnje hišće serbskorěčnu wjetšinu wot 73,9 % wobydlerstwa.
Ewangelscy Šepšečenjo přisłušachu Łućanskej wosadźe.
Hlej tež
Žórła
- Archiv verschwundener Orte Forst/Horno: Dokumentation bergbaubedingter Umsiedlung. 2010, str. 284f.
- Frank Förster: Verschwundene Dörfer im Lausitzer Braunkohlenrevier. [=Spisy Serbskeho instituta 8] Wobdźěłane a rozšěrjene wudaće, Ludowe nakładnistwo Domowina, Budyšin 2014, str. 277–283, ISBN 978-3-7420-1623-2.
- Günter Meusel a dr.: Schöpsdorf – Streiflichter aus der Geschichte. Wud. Rat des Kreises Hoyerswerda. Budyšin 1983.
Wotkaz
Commons: Šepšecy – Zběrka wobrazow, widejow a awdiodatajowThis article uses material from the Wikipedia Hornjoserbsce article Šepšecy, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Wobsah pod CC BY-SA 4.0 k dispoziciji steji, jeli njeje so hinak podało. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Hornjoserbsce (DUHOCTRUNGQUOC.VN) is an independent company and has no affiliation with Wiki Foundation.