La religjon tradizionâl cinese e e je chê praticade in grande part de Cine, che e cjape dentri il cult dai antenâts e lis crodincis de mitologjie cinese (cult di erois o personaçs divinizâts), cun diversificazions locâls.
Si trate di crodincis no organizadis di un sisteme centrâl, cence un cult e un rituâl precîs.
La religjon si è disvilupade di un cult pal plui aristocratic. Lis divinitâts principâls a jerin costituidis par antîc dai dius dal cîl, che a difindevin il stât e a garantivin la justizie, di chei de tiere, che a protezevin il podê regâl su la tiere e la prosperitât dai cjamps. A chestis si zontave il cult dai antenâts, in origjin in particolâr chei de dinastie regnante: si ritignive di fat che une part dal spirt dal defont e restàs inte tombe e e ves di jessi nudride des ufiertis dai dissendents. Altris divinitâts locâls a jerin leadis ai flums e ai mârs.
Une vore leadis ae religjon inte devozion popolâr a jerin lis crodincis intal mont dai spirts e intes pratichis magjichis e divinatoriis.
Cu la nassite dal Confucianisim, dal Taoisim e la difusion in Cine dal Buddhisim cinese, chês che a vegnin clamadis lis "trê dotrinis" si son messedadis cu la religjon popolâr ("la cuarte vie") costituint un mosaic composit di crodincis definît religjon tradizionâl cinese. Prime dal bant des religjons e de Rivoluzion culturâl, fissâts dal guvier cinês, dut câs, lis trê dotrinis a vevin un clericât, templis e rituâi, simpri influençâts des crodincis popolârs.
Jessint duncje "popolâr" e cence un so canul, il guvier de Republiche Popolâr nol à sostignût la "rinassite" (come che al è acjadût par religjons dotadis di un corpus di testemonis che al podeve jessi ogjet di studis e insegnaments universitaris) dilunc dal periodi di liberalizazion religjose dai agns '70. Chestis pratichis religjosis vuê a puedin jessi praticadis in pâs.
This article uses material from the Wikipedia Furlan article Religjon tradizionâl cinese, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Il contignût al è disponibil sot de licence CC BY-SA 4.0 se nol è specificât in altre maniere Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Furlan (DUHOCTRUNGQUOC.VN) is an independent company and has no affiliation with Wiki Foundation.