Mandai

Mandai sabujurnya masuk janis lauk nabati wan kawa jua diulah jadi sayur gasan kawan makan karana asalnya matan buah tiwadak. Buah tiwadak ini gin hanyar ada amun bila musimnya haja. Tagal mandai ini karana pangulahan matan tiwadak jadi kawa tahan lawas sampai imbah tuntung musim tiwadak. Cara maulah mandai sabujurnya nyaman haja. Imbah tiwadak diambil buah di dalamnya, kuyak kulit luarnya sampai barasih. Kulit tiwadak nang dibarasihi ini pang nang ngarannya mandai. Basuh lawan banyu nang barasih. Tatak halus-halus sasuai kahandak, imbah itu randam di dalam banyu uyah di dalam wadai tuplis nang batutup rapat. Ganaakan sampai mandai bujur-bujur masin. Marandam mandai nang masih mantah sampai bujur-bujur masin bisa saminggu sampai sabulan.

Mandai nang sudah masin, kawa langsung dimasak. Kawa diulah sayur using-using dicampur patai wan bahan tambahan nang lain sasuai kahandak. Atawa mandai tadi disanga dijadi'akan lauk makan. Jangan takutan lawan bau tiwadaknya. Bila sudah jadi mandai, bau tiwadaknya kadada lagi. Gasan nang balum tahu kayapa rasa mandai, rasa mandai mirip kaya rasa daging nang lunyut.