Balogo: Parmainan tradisiunal Banjar
Balogo marupakan sabuting janis pamainan bahari matan Kalimantan Selatan.
Ngaran Balogo diambil matan kata logo, maraga pamainan ngintu mamakai logo. Pamainan bahari Suku Banjar ngini rajin dimainakan kakanakan sampai urang tuha, baik sacara bakalumpuk atawa baikungan. Jumlah pamain tadiri matan 2 sampai 5 urang.
Masing-masing tim nang baanggutaakan babarapa pamain harus kawa maruntuhakan logo nang mambantuk piramida halus lawan logo lain nang taulah matan tampurung nyiur atawa "logo tanding". Pamainan ngini jua mamakai sabuting alat nang disambat panapak atawa campa. Panjangnya kikira 40cm wan libar 2cm. Kagunaan alat ngini gasan manunjul logo supaya kawa badungsur wan marubuhakan logo ampun lawan nang dipasang wayah bamain.
Cara mamasang logo adalah mandiriakannya bajurut ka balakang di garis-garis bahantang. Inti pamainan ngini adalah katarampilan mamainakan logo gasan marubuhakan logo ampun lawan nang dipasang. Regu nang paling banyak marubuhakan logo lawan pacangan kaluar sabagai pamanang.
Wayah ampih bamainan, bubuhan nang manang disambat "janggut". Pamanang kawa manjapai wihang atawa janggut buhan lawan nang kalah sambil baulang-ulang manguciakakan "janggut-janggut".
Pamainan ngini rancak dimainakan masyarakat Banjar wayah sampai tahun 1980-an. Namun wayahini, pemerintah daerah lagi gancar maadaakan patandingan balogo gasan tatap malastariakan pamainan bahari nang masih batahan ngini.
Referensi
This article uses material from the Wikipedia Bahasa Banjar article Balogo, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Konten tersedia di bawah CC BY-SA 4.0 kecuali dinyatakan lain. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Bahasa Banjar (DUHOCTRUNGQUOC.VN) is an independent company and has no affiliation with Wiki Foundation.