Pintados

Pinaggagamit an katagang ini kan mga kolonyalistang Kastila bilang kaapudan sa mga katutubong Sebwano asin Waray na panô nin batik o batok (tattoo) sa lawas. Sinda mahihiling sa mga isla nin Cebu, Bohol, subangang parte nin Negros, Leyte, asin Samar sa rehiyon Bisayas (Visayas) kan Filipinas. Enot na pinaggamit an terminong pintados sa panahon nin kolonisasyon nin Espanya sa Filipinas.

An Boxer Codex nagpapahiling na parehas an lalaki sagkod babayi iyo igwang batik o batok. Naglalaag sinda kaini sa kublit gamit an matarom na pidaso nin batbat asin pagpahid nin itom na pulbura sa mga bukas na lugad na dagos nang nagigin permanente. Sa sarong panurat ni Rodriguez kaidtong 1565, saiyang pigtawan deskripsyon an mga katutubo (sa Ingles) "... these Indians wear gold earrings, and the chiefs wear two clasps about the feet. All the body, legs, and arms are painted; and he who is bravest is painted most."

Terminolohiya

An mga katutubo sa mga probinsya nin Camarines, sa purong parte kan subangan nin isla, sagkod an Marinduque iyo may pagkakapareha sa mga Pintados. Kaidtong ika-16 na siglo, an terminong "Bisaya" iyo piggagamit sana sa mga tawo sa Sulnopan na Visayas, mantang an terminong "Pintados" iyo para sa mga tawo sa Sentral na Visayas sagkod Subangan na Visayas. Sa ngunyan, an terminong "Visayan" iyo piggagamit sa gabos na grupong etniko sa gabos na rehiyon kan Visayas, mientras an terminong "Bisaya" iyo para sa mga Sebwano na an katutubong ginikanan iyo an Sentral na Visayas. An pangenot na etnikong grupo sa Subangan na Visayas iyo an mga "Waray". An iba pang mga grupong etniko na katutubo sa sentral asin subangan na parte kan Visayas iyo an Porohanon sa Camotes, an Kabali-anon sa sur kan isla nin Leyte, an Inabaknon sa isla nin Capul, asin an Ata sagkod Magahat, na iyo parehas sa sur kan isla nin Negros.

Gawi nin Pagbuhay

Pagbado

An mga katutubong Pintado igwa nin halabang buhok na nakasalapid sa korona kan saindang buhok. An mga babayi harus nagsusulot nin dakulang alahas sa talinga na gibo sa bulawan sagkod gading o ivory, asin iba pang mga dekoratibong tela sa payo. An mga babayi nagsusulot man nin palda na gibo sa medriñaque asin makolor na silk, na igwang bahaques (breech-clouts). An mga Tumao nagsusulot nin badong halaba.

Sagras

An mga Pintados istrikto sa pag-aagum, mayong minagom na hababa sa saiyang estado. An mga lalaki sagkod babayi pwedeng mag-agum nin maski pira hasta kayang bakalan asin suportahan. An mga babayi man bukas na magpahiwatig kan saindang sekswal na pangtanaw.

Armas

An mga armas kan sarong Pintado iyo an mga darakulang pakurbang sundang, arug kan cutlasses, spears, asin caraças.

Mangubat

An mga batok o tattoo nagpapahiling nin pagigin maurag kan sarong lalaki sa mga ralabanan: mas dakul na tattoo, mas matrayumpo. An Pintados iyo lahing tuod sa giyera; na padagos sa pakikipaglaban sa kadagaan sagkod sa kadagatan para sa Mangubat (booty). An taramong ini may boot-sabihon na pagpasiring sa ibang kadagaan sa paghahanap nin masasakop na lugar asin tawo.

Larao

An Larao, may boot-sabihon na pagmundo sa nagadan. Sarong pagsarado an piggigibo sa palibot nin harong kan nagadan na tawo, asin kun siisay man, dakula o sadit, an uminagi iyo mapaparusahan.

Hilingon man

Iba pang babasahon

Toltolan

Sarong saringsing an artikulong ini. Makakatabang ka sa Bikol Wikipedia sa pagparambong kaining pahina.

This article uses material from the Wikipedia Bikol article Pintados, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Content is available under CC BY-SA 4.0 unless otherwise noted. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Bikol (DUHOCTRUNGQUOC.VN) is an independent company and has no affiliation with Wiki Foundation.