I Gringsing Tekén Ni Ranjani

Satua I Gringsing tekén Ni Ranjani (aksara Bali: ᵒi​griŋsiŋ​teken·​ni​rañjrani) inggih punika silih tunggil satua Bali.

Kacerita ané malu ada anak ngubu ditu di tegalé linggah ajaké dadua. Ia, maadan Ni Ranjani tekén méméné. Ia tusing nu ngelah bapa, tur tusing ngelah nyama lénan. Geginané sesai-sai tuah matanduran di tegalé.

Ri tatkala semeng dina purnama, kacerita koné méméné Ni Ranjani nyakitang basang. Ni Ranjani orahiné ngalih dadong balian ditu di duwur bukité kangin apang teka mai ngubadin. Umah dadong balian koné maraab ambengan.

Gelisang satua, apang tusing makelo méméné nyakit, ngénggalang Ni Ranjani luas ké umah dadong balian. Nganteg di umahné ento dapetangé suwung gamblang. Gelar-gelur ia majeritan, tusing ada anak masaut. Di subané keto, majalan buin Ni Ranjani nuju umah ané buin besikan ané maraab duk. Ni Ranjani majeritan ditu. Lantas ada anak masaut uli tengah umahé. Jeg suba demen atiné Ni Ranjani sawiréh katemu ngajak dadong balian.

Tusing ada buin akijepan, jeg pesu suba anak tua maawak gedé, bok magambahan gempel, paningalanné nelik, munyiné gedé gora, nyonyoné lambih, basing gedé, batis mabulu, tur kuku lantang. Makasiab ia Ni Ranjani.

Masaut anaké aeng totonan, "Yeh nyai Ni Ranjani, kenken tumben nyai teka ka pondok dadonge".

Masaut Ni Ranjani, "Kené dadong, dadong apang mulih ké umah icangé, wireh mémén icangé sakit basang. Dadong jani tundené ngubadin".

Dadong basang gedé nyautin, "Nah lamun keto, nyanan dadong kemé ngubadin mémén nyainé. Satonden nyai mulih, aliang malu iban nyainé tebu. Tebuné totonan daar, tur ampasné sepahang di jalan. Nyanan ampas tebuné totonan lakar tuwut dadong apang neked di umah nyaine".

Kacerita suba Ni Ranjani nuwutin pamunyin dadong totonan. Satwa di gelis, neked lantas Ni Ranjani di kubuné sambilang makpak tebu. Matakon méméné, "Kenken Ranjani, tepukin nyai dadong balian?"'

Masaaut lantas Ranjani, "Tepuk mé, né cang ngidih tebu orahiné makpak, tur ampasné lakar tuwuté tekéning dadong balian apang nganteg mai."

Mara madingehang keto makesiab méméné, "Dadong balian anak tusing ngelah tebu. Umah ané cen ojog nyai?"

Masaut Ni Ranjani, "Paling malu icang ngojog umah maraab ambengan, kewalé suwung mangmung. Lantas kemé cang ké umah ané maraab duk. Tepukin ia I Dadong balian ané aeng ditu."

Mara keto, nyangetang ngetor bayuné mémén Ranjani, "Tusing ja dadong balian, ento tuwah Dadong Raksasa ané demen ngamah jelema. Kenken baan Iraga mengkeb jani, sinah suba nyanan iraga lakar tadaha ajak Dadong Raksasa."

"Nah, kené dogen Ranjani, nyai menek ka punyan nyuhé di samping semeré, ditu mengkeb apang tusing tepuké tekén Dadong Raksasa. Memé mengkeb di betén palungané. Apang tusing tepukiné tekén Dadong Raksasa."

Di subané nyaluk sanja, Dadong Raksasa teka kema ké umahné Ni Ranjani nuwut sepahan tebu tuni. Pejalané keteb-keteb, nyonyoné kaplik-kaplik, tur giginé kretek-kretek. Kacerita anteg suba Dadong Raksasa ditu. Dapetangé suwung.

Majeritan ia I Dadong Raksasa, kewala tusing ada ané masaut, krana ia ajaka dadua suba mengkeb. Ni Ranjani nepukin Dadong Raksasa uli duwur punyan nyuhé. Bayuné ngetor. Kéto masih méméné ningeh gelurané Dadong Raksasa, kewala ia tusing nepukin, sawiréh ia matekep palungan.

Di subané sing ada anak masaut, negak lantas ia Dadong Raksasa ditu duwur plangkané sambil mangantosang. Sambilangé nyiksik kutu. Suba makelo ngalih kutu, jeg saget ada kutuné maleketik tur macelep ka betén palungané. Dadong Raksasa ngalih tur badingangé palungané. Maré keto dapatangé mémén Ni Ranjani ditu mengkeb.

"Nah, né ia, bakat jani ané alih kai, jeg lakar pakpak tulangné, ambis isiné, tur ceret getihné." Kéto ia I Dadong Raksasa.

Memené ngénggalang lakar malaib, kewala lacur, énggalan jangkuaka tekén I Dadong Raksasa. Ditu mémén Ranjani katadah tekén I Dadong Raksasa. Liang buka otonan kenehné Dadong Raksasa.

Jani ia lakar ngalihin pianakné buin besik ia Ni Ranjani. Yening bakat, sinah suba jaen bané sawiréh jadma muda. Kéto kenehné Dadong Raksasa sambilangé ngantosang, ia ké sémér ngalih yeh, ngilangang bedak. Ditu ia negak di tuwed nyuh, tongosné Ni Ranjani mengkeb. Di samping séméré tongosné I Dadong Raksasa negak, ada pané misi yeh tur kesinarin tekén bulan. Lantas tepukiné lawat Ni Ranjani ada dimuncuk punyan nyuhé. Ditu lantas I Dadong Raksasa ngelunin Ni Ranjani apang tuwun. Kewala ia tusing nyak tuwun.

Dadong Raksasa lantas mamunyi, "Nah lamun nyai tusing nyak tuwun, lakar jeritang ia I Klabangapit, céléng dadong ané gedé galak tur demen ngelumbih punyan nyuh."

Bah lantas punyan nyuhé totonan. Kajagjagin baan I Dadong Raksasa. Kewala sing bakatangé Ni Ranjani. Tusing tawangé wireh Ni Ranjani makecos, ké carang punyan sandat di sampingné.

Dugasé ento, maré lantas makleteg ia Ni Ranjani, ia ngelah cicing gedé, gembrong maadan I Gringsing Wayang. Uling punyan sandaté Ni Ranjani ngelunin cicingné I Gringsing Wayang apang teka ngutgut celengné Dadong Raksasa. Mara majeritan acepok, suba saget nengok, tur jeg suba dapetangé nyarag celeng gedé totonan, lantas mati. Disubané keto, Ni Ranjani ngorahin tur ngandupang apang ia I Gringsing ngutgut I Dadong Raksasa. Lantas Dadong Raksasa dengel-dengelé, gutguté kanti telah awakné matatu, tur getihné mabrarakan, laut Dadong Raksasa mati.

Disubané keto, mara Ni Ranjani bani tuwun, tur maekang I Gringsing Wayang tekén méméné ané suba mati. Ditu Ni Ranjani sedih katinggalin méméné. Nunas ica ia dumadak méméné apang buin matunggalan awakné tur buin idup. Maré ia mamunyi keto, dapatangé méméné jeg buin idup. Demen pesan atiné ia Ni Ranjani.

Suba jani gelisang satua, bangken Raksasané kepaid ké bangbangé tur katanem.

Ngawit uling totonan sayan-sayan sayang I Ranjani tekén cicingné I Gringsing Wayang, keto masih méméné.

Nah, kasuwen-suwen mapitutur méméné tekén I Ranjani kené, "Nyai ngancan kelih, luwungang ningehang tur ngeresepang pabesen anak len. Apang tusing pelih nampi pabesen lakar nepukin baya buka jani."