Un óblast (en rusu: область) ye un tipu de suxetu federal de la Federación Rusa.
Un óblast ye una entidá política constituyente de la xunión federal que conforma el gobiernu de Rusia: tien representación nel Conseyu de la Federación, y ye una división alministrativa de primer nivel. Cada óblast tien un gobiernu estatal qu'exerce la so autoridá sobre un territoriu xeográficu definíu, con un gobernador nombráu direutamente pol presidente de Rusia a la cabeza, y un parllamentu o duma elixíu democráticamente. Los óblasts divídense en raions o distritos, ciudaes independientes (equivalentes a un distritu) y okrugs autónomos, que son llegalmente suxetos federales d'estatus igual al de un óblast pero que tán alministrativamente subordinaos a ún d'ellos. Anguaño namái dos óblast, el d'Arcánxel y el de Tiumén, conserven entá la figura del okrug autónomu: el de Nenets y los de Khanty-Mansi y Yamalo-Nenets respeutivamente.
Óblast, asina, ye un términu rusu asemeyáu a los occidentales de provincia o rexón. La mayoría reciben el so nome a partir del de so centru alministrativu, que ye'l nome oficial pa denomar la capital d'un óblast, que xeneralmente ye la ciudá mayor del territoriu. Les esceiciones son los óblast de Leningráu y Moscú, que nun tienen capital oficial, y el de Sajalín, que recibe'l so nome d'un accidente xeográficu (una islla). Dos óblast, amás, caltienen los nomes antiguos de les sos ciudaes capitales: el de Leningráu, anterior nome de San Petersburgu, y el de Sverdlovsk, antiguu nome de Ekaterimburgu. Los óblast, en xeneral, son rexones con una población mayoritaria de xente d'etnia rusa y falante nativa de rusu, y la mayoría asitiense na Rusia Europea. El so tamañu ye pervariable: el mayor ye'l de Tyumen, con 1.435.200 km², y el más pequeñu'l de Kaliningráu, con namái 15.100 km². El más populosu ye'l de Moscú, con 7.095.120 habitantes, y el menos pobláu el de Magadán, con 156.996 habitantes.
—
This article uses material from the Wikipedia Asturianu article Óblasts de Rusia, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). El conteníu ta disponible baxo los términos de la CC BY-SA 4.0 si nun s'indica otra cosa. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Asturianu (DUHOCTRUNGQUOC.VN) is an independent company and has no affiliation with Wiki Foundation.