قصر أيت بن حدو: فيلاج تاريخي فالجنوب الشرقي ديال المغرب

	قصر أيت بن حدو
	معلومات عامة
نوع	قصر (بني صحراوي) و تراث
لبلاد	لمغريب
لموضع	آيت زينب
تصنيف تراتي	موقع تراث عالمي و ترات تقافي ديال لمغريب
	معلومات إضافية
	ait-ben-haddou.net:80

هاد لݣصر هو من أهم لمعاليم التاريخية و التقافية د إقليم وارزازات و هو مصنّف ف لّيستا د تراث لعالمي د ليونيسكو من 1987.

لݣصر د آيت بن حدو ميتال ديال لهندسة لمعمارية التقليدية ف لمجال لقبل صحراوي، ب حيت هو تجمّع ديال بنايات كاتّستغل ب شكل جماعي و دايرين بيها تحصينات دفاعية.

تاريخ

واخّا لݣصر، ب شّكل ديالو لحالي غادي يكون ف لغالب تّبنا ف لقرن 17، لبلاصة لّي كاين فيها كانت من لقديم فيها نشاط بشري، بحيت كانت من أهم لحطّات ديال لݣافلات التّيجارية لّي كاتربط بين مرّاكش و بلاد السودان و لّي كانت كاتدوز على واد درعة و التيزي د تلويت.

لموقع

لݣصر د آيت بن حدّو جا ف لوطيات لجنوبيين د جّبال د لأطلس لكبير.

لهندسة لمعمارية

مقالات متعمقة: ݣصر• إݣودار

بحال أي ݣصر مغريبي د لمنطقة د درعة تافيلالت، آيت حدّو مكوّن من مجموعة د دّيور لمبنية ب الطّين و مزاحمة بيناتها و لّي لعلو ديالها غادي كايكبر من برّا ل لمركز ديال لݣصر، باش تعطيه شكل ديال كدية ولا جبل صغير. هاد لهندسة عندها دور دفاعي.

لݣصر محمي ب سوار عاليين فيهوم بروج ف رّكاني ديالهوم.

لݣصر فيه مرافق مشروكة بحال الجّامع، ساحة، رحبة ديال الزّرع، فندق و مخزن د زّرع (إݣودار) ف وسط الدّوار و لّي هو أعلى بناية ف لݣصر.

فيه جوج روضات، وحدة ل لمسلمين و تّانية د ليهود.

لݣصر د آيت بن حدو فيه ضريح ديال السيد سيدي علي أوعامر.

لحضور التقافي

ݣصر آيت بن حدو تخدّم ف بزّاف د لمرّات ستوديو سينيمائي طبيعي ل عدد كبير من لأعمال السّينيمائية و التّلفزيونية لعالمية. لهتيمام د السينيمائيين ب لموقع بدا من عوام 1940:

أفلام

لورنس الدزيرة لعربية (Lawrence of Arabia) - إخراج ديڤيد لين ف 1962.
دجيمس بونض - الضواو لحيين د النهار (The Living Daylights) - إخراج دجون ݣلين ف 1987.
لموميا (The Mummy) - إخراج ستيفن سومرز ف 1999.
ݣلادياتور (Gladiator) - إخراج ريدلي سكوت ف 2000.
لمملكة د السما (Kingdom of Heaven) - إخراج ريدلي سكوت ف 2005.
لإسكندر (Alexandre)- إخراج أوليڤر ستون ف 2005.
لأمير د فارس: الرّمال د الزّمان (Prince of Persia: The Sands of Time) - إخراج مايك نيوويل (2010).

مسلسلات و أفلام د تلفازا

لمسيح د الناصرة (Jesus of Nazareth) - مسلسل صغير خرجو فرانكو زيفيريلّي ف 1977.
اللعب د لعروش (Game of Thrones) - مسلسل نتجاتو HBO بين 2011 و 2019.

عيون لكلام

شوف تا

قصبة تاوريرت

تقدر تزيد شوف بزاف د تّصاور و لمعلومات ديال Aït Benhaddou ف ويكيميديا كومنز.

This article uses material from the Wikipedia داريجة article قصر أيت بن حدو, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). المحتوى متاح وفق CC BY-SA 4.0 ما لم يرد خلاف ذلك. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki داريجة (DUHOCTRUNGQUOC.VN) is an independent company and has no affiliation with Wiki Foundation.