O Finacadan No Pangcah

Na masolinga’ mawasil ko Pangcah, itiya ho makomod no Dipong ko Taywan, pakayni han nangra i ngarngar no sowal mikalalima a misasieked ko Pangcah.Ira ko no’amisan a Pangcah, Siwkolan a Pangcah, No walian a Pangcah, Falangaw a Pangcah ato Palidaw a Pangcah, nano to’as itini i Kalingko ato i Posong a malaklak, O Pangcah kako anca O ’Amis kako saan ko pangangan.Itini i laeno a misilsil pakafana’ tona lima a finacadan.Sakacecay, No’amisan a Pangcah, Itini i masadahtalay a pala mingataay to riyar a pala paloma’, na itira i Cingaroan tala’amis tangasa i taliyok no Nafakowan ko pala.Sakatosa, o Siwkolan a Pangcah, na itira i tarawadaw no Kalingko talatimol tangasa i Cilamitay, nawhani maemin paniyaro’ i lawac no Siwkolan a tarawadaw sa mapangangan to Siwkolan a Pangcah.akatolo pasawalian a Pangcah, itini i nowalian a lotok, mililis to riyar, mifater to Kalingko na itira i Fakong talatimol tangasa i Madawdaw, saka pasawali a Pangcah han,Sakasepat o Falangaw a Pangcah, na itira i Madawdaw talatimol tangasa i Tamali, nawhani, maemin maro’ i Posong taliyok no Falangaw a niyaro’ sa o Falangaw a Pangcah han.Sakalima, o Palidaw a Pangcah, mararaay ko paniyaro’an nangra,satimolan to no kasafinacadan,malaklak paniyaro’ i Fanaw, Palayapay ato i Kangcang, nawhan itira i Palidaw ko lilengawan sa Palidaw a Pangcah han.Na misatapang i saka enem polo’ a miheca, mafalic to ko kicay no siyakay no Taywan, ’aloman to ko kapah miliyas to niyaro’ tayni i Tokay mikilim to saka’orip, saka ira to anini ko i Tokayay a Pangcah hananay.