fafahiyan Kitakit

Mafadil ci Maciwciw馬久久被洪水沖走

  Itiyaho i no to’ato’asan ho a mihecaan, ira ko cecay a fayinayan ci Maciwciw ko ngangan ningra, o masowalay i niyaro’ ko kainaneng ningra a maomah, anini a romi’ad matiya to kaloladay a romi’ad a maomah. Paceko’ sa masiya’ a maorad,macedas to ko ’alo, ca ka pahoda manawnaw to ko pala, malemeday ci Maciwciw macepet ningra ko cecay a datong malodadangoyan, pawpaw sato tayra i kafahalan a kanatal, cowa ka fana’ ci Maciwciw tonini a kanatal, mafadil no nanom o tadaroray to ningra, tangasa i mamangay a kanatal, ’aro sa i tapangan no kilang a pahanhan. ona mamangay a kanatal ’araw han o kolol no ’iso konini, pasiwalipasiwali a midangoy koya ’iso, saikoray to i,sera’ sa itira cowako kafana’fana’an oya fainayan a palal, o maro’ay itini sahetoay o fafahiyan. Yo talipa’elal cingra, paceko’ sa malikot no ’alomanay a fafahiyan, ona fafahiyan i laway away ko ngoyos, mitatoy to salifong, saraawaw sa a misatoro’toro’ ci Maciwciwan.

Malofo i Fafahiyan kanatal 在女人國被關

 Ona sa fafahiyan cowa ho paka’araw to matiniay caay ka lecad to fafahiyan a ’a’adopen, mapawacay to nengneng han mana ciwikol i ’a’ayaw saan cangra faheka a malalicalicay o maan a ’a’adopen ko matiniay saan.tomeli a maso’eso cisimal a nengengen, ka’eso’ a kaenen kiya sato ko kasasowal nangra, sowal sato ko kakeridan nona fafahiyan a kanatal, paliten a milofo, pacofcof han a pakaen ta matongal ko ka so’eso ta pacoken a komaen.

  Tangitangicen ni Maciwciw a papitedal toya sapalit, cowa to ka pitengil cangra. Pawsa han to romi’ami’ad a pakaen, sano nipa’oripan a diyong ko ’orip ni Maciwaciw itini tona fafahiyan kanatal.

 Nanam sato ci Maciwciw ato ya mipawsaay a fafahiyan, misacaciaw tatosa, ano roma i, pakimaden ni Maciwciw tono niyah a ’orip ato niyah a niyaro’, safaheka koya mipapawsaay a fafahiyan, sini’adaen to ci Maciwciwan, mitengel to sa’eli ni Maciwciw a palaliw. Cila to i, takaw han nira a misimed ko po’ot i patafoan a mipawsa, halo sapiketon ni Maciwciw toya sapipalit cingranan a ka’ered.

Patatikor i niyaro’ ci Maciwciw 馬久久回到部落

 Sato’emanan sato ci Maciwciw a milaliw, nikawrira, saferengan sato a ra’aw’aw koya fafahiyan a milepelay cingranan i lalikor, hadidi han ni Maciwciw ko cahiw,roray ato adada no doka’ kanapatay sato a comikay a milaliw, tahira i lawac no riyar, away to ko lalan to pilaliwan, aya samaan sato kao sa misaharateng, itiya paceko’ sa ira i ’a’ayaw ni Maciwciw ko cecay a ’iso miraod, mikalic mikalic sa miceli’ ci Maciwciwan, awaay to i faloco’ ko maamaan a maharatengay dengan to o pilaliw a cecay ko maharatengay ni Maciwciw, ano omaan to pa’ayawan to samikalic sa i, o nga’ay konini a kalicen, itira to a teroc sa i kolol noya ’iso. Awa to a manengneng koya fafahiyan a milepel, sowal sa koya ’iso o widang noya mipapawsaay tisowanan kako, mipadang a panokay tisowanan saan.

Ano hakowaay to ko romi’ad i riyar cato kafana’ ci Maciwciw, yo tangasa ilawac no niyaro’ ningra faterik han noya ’iso ci Maciwciw patalahekal. Sowal sa ci Maciwciw toya ’iso, wataay to ko pipadang iso ato ya mipawsaay takowanan a kaying, o maan sa ko sapacofay ako i tamowanan hokini?  Pacaof koya ’iso: to mihecahecaan katayni ilawac no riyar patelien ko ’icep, tolon ato ’epah, ta tayni kako a komaen toya nitelian noma han nira. Solikor sato a micerem a milaliw.

Away to ko mafana’ay cingranan 没有人認識他

Rakat sato ci Maciwciw a minokay, mafalicay to ko pala, o lalan ho masasiromaay to, romakat a firkaay ko faloco’ ni Maciwciw o tatara i niyaro’ ako kina lalan hakini ? tahira to i niyaro’ away to ko mafana’ay cingranan, awa ko kafanafana’an ningra a tamdaw, sowalen ningra ko ngangan no maliteng nira awa ko mafana’ay, oya sa paloma’an oroma to ko tomirengay a loma’, caay ko kafana’an ko maro’ay tona loma’. Itira to a makesem ko faloco’ ni Maciwciw o tadapakoyoc to kako saan ko harateng ningra.

 Naw mahaen han i, ya cecay a romi’ad itira i fafahiyan kanatal todongay samo’etep’etep sanay ko romi’ad itini i niyaro’ ni Maciwciw, sowalaw, ano o kapakapah ho ko tireng ni Maciwciw a nengnengen mata’elifay to ko pinapina a so’ot ko mihecaan, cowa ka liteng ko tamdaw itira toya no fafahiyan a kanatal. Orasaka, oya itiraay i niyaro’ ni Maciwciw a tamtamdaw sahetoay to o teloc no teloc no niyaro’, sa awa ko mafana’ay ci Maciwciwan.

Lalengatan no misacepo’ 阿美族海祭的起源

  Nikawria, masongila’ a paratohen ni Maciwciw ko tamtamdaw no niyaro’ to nikafalid tayra i cowa ko kafana’an a fafahiyan kanatal, malofo itira, panapina to mihecaan mapa’orip no mipawsaay a fafahiyan, mikalic to widang ningra a ’iso a mapanokay a tayni i niyaro’ no malitengay ako. Tengil sa ko iniyaro’ay a tamdaw, macocok ko faloco’ nangra a miaray to pipa’orip noya kaying ato ’iso. Do’edoen ita ko palimo’ot noya ’iso ta masimaw to ’orip ita, ta ’adihay to ko paini titanan to foting.Onini ko lalengatan no ’Amis a tamdaw to mihecahecaan misacepo’ i riyar pateli to ’icep, tolon ato ’epah, miaray to to’as.

 O cinganganay to misacepo’ itini i lislis no sawalian a kakoniyaro’ misacepoay to mihecaheaan. Patinako han o Makotaay niyaro’, itiraay i sakalima folad no miheaheaan a misacepo’ tahinini cowa ka tawal kina lisin. O romi’ad i, o kakita’an ko miketonay to pisacepo’an a romi’ad, i’ayaw no pisacepo’an o sakatosa ato sakatolo a selal tayra to i riyar a mifoting, misil, mipaceng ato mitiked, o mifotingan tono kapah itira i lawac no ’alo ano ca i lidong no kilang a masaopo mitangtang toya foting sakalahok nangra. Toya to pisacepo’an a romi’ad dafak mifoting ho, ma’edeng tangasa to siwa ko widi minokay to tayra i sefi a mitangtang toya foting. Ma’ecak to ko nitangtangan a foting ocoren to no kakita’an ko kapah mihawikid to ’epah, titi, foting ato tolon tayra i pifafotingan no niyaro’ mita’ong to kawas no riyar. Malaheci to i, patiko tayra i sefi mipakilac to foting. O rayray no selal ko pido’edoan a pakilac, o satata’angay o sanga’ay o hano malitengay, tarararem sa ko pipakilac, ano ca ka ’emin no saka a selal a komaen a foting palada’en ko kararemay a selal, haen sa a taharem a selal, cowa ka pisaloya to kakaenen.