Belaagerig Vo Konstantinopel In De Joor 717 Und 718

D Byzantiner und d Bulgare häi d Stadt erfolgriich verdäidigt. S Ändi vo dr Belaagerig isch e Wändepunkt in dr Islamische Expansion gsi.

D Belaagerig vo Konstantinopel (717–718)
Deil vo: dr islamische Expansioon
Die byzantinischi Flotte pruucht Griechischs Füür
Datum 15. August 717–15. August 718 Ort Konstantinopel Usgang Byzantinische Siig
Konfliktparteie
Umayyade Kalifat	Byzantinischs Riich Bulgare
Befählshaber
Sulayman Maslama	Leo III. Terwel
Truppesterki
öbbe 200.000 Maa, 1800 Schiff	30'000 Byzantiner, 50'000 Bulgare
Verlust
öbbe 130'000 bis 170'000 Maa, 1795 Schiff	umbekannt

D Byzantiner si für d Belaagerig vorberäitet gsi. Si häi d Stadtmuure versterkt und Vorrööt aagläit gha. Die byzantinischi Flotte het im Guldige Horn gankeret und dr Haafe isch mit ere Iisechetti abgschlosse worde.

Im Summer vom Joor 715 het im Kalif Sulayman si Brueder Maslama die arabisch Armee vo Aleppo gäge Konstantinopel gfüert und isch im August 717 aachoo. D Flotte mit 1'800 Schiff isch im Septämber under em Sulayman sälber in Bosporus iinegfahre. Konstantinopel isch vo denn aa uf em Land und uf em Meer vo sim Hinderland abgschnitte gsi. D Aagriff vo de Araber si ooni Erfolg bliibe und wo dr Winter aagfange het, häi d Araber iiri Kamel und Rösser müesse schlachte und Soldate si wäge dr Chelti gstorbe. Im Früelig het dr Kaiser Leo III. die arabisch Flotte aagriffe und vernichdet, so dass die arabisch Armee vo denn aa käi Noochschub me überchoo het. Dr Kaiser het s denn fertig brocht, dr Khan vo de Bulgare, dr Terwel, wo in iim zwar e Find gsee het, aber d Araber für die gröösseri Gfoor ghalte het, drzue z bringe, d Araber aazgriffe. 20'000 bis 50'000 Araber si under de Muure vo dr Hauptstadt gfalle, und am 15. August 718 isch die arabischi Armee abzooge. Arabischi Gschichtsschriiber häi d Verlust vo iirer Site uf 500'000 Maa gschetzt, woorschinlig si s aber nume 130'000 bis 170'000 gsi, und fast alli vo de 1'800 Schiff si kabut gsi.

Wil si d Heerschaft uf em Meer verloore häi, isch dr Vormarsch vo de Araber brämst worde. Konstantinopel het wider emol zeigt, ass mes nid chönn eroobere, und das isch eso bliibe, bis d Kreuzfaarer vom Obeland d Stadt ane 1204 ufem Vierte Chrüzzuug iignoo häi.

• Theophanes. The chronicle of Theophanes Confessor. Byzantine and Near Eastern history AD 284-813, Clarendon Press, Oxford 1997, ISBN 0-19-822568-7.

• Ekkehard Eickhoff: Seekrieg und Seepolitik zwischen Islam und Abendland. Die Hegemonie unter byzantinischer und arabischer Hegemonie (650-1040). De Gruyter, Berlin 1966.
• Paul Speck: Kaiser Leon III. Die Geschichtswerke des Nikephoros und des Theophanes und der Liber Pontificalis. Eine quellenkritische Untersuchung. Teil 1. Die Anfänge der Regierung Kaiser Leons III. Bonn 2002 (=ΠOIKIΛA Byzantina 19), S. 283-372.
• Ilse Rochow: Byzanz im 8. Jahrhundert in der Sicht des Theophanes. Quellenkritisch – historischer Kommentar zu den Jahren 715-813. Berlin 1991 (=Berliner byzantinistische Arbeiten 57), S. 86-97.

Dä Artikel basiert uff ere fräie Übersetzig vum Artikel „Belagerung_von_Konstantinopel_(717–718)“ vu de dütsche Wiki Alemannisch. E Liste vu de Autore un Versione isch do z finde.