賣豬仔(粵拼:maai6 zyu1 zai2)原本指由中至外嘅苦力買賣,係種奴隸貿易。啲工人雅稱華工,俗稱豬仔,主要種類有三——去美國或者加拿大嘅賒單苦力、去拉丁美洲嘅契約華工,同去南洋嘅豬仔華工。
「豬仔」招攬自五湖四海,以窮鄉僻壤居多,聚埋喺幾個貿易發達嘅城市道交易。「賣豬仔」檔口嘅集中地,有澳門、香港、廣州、汕頭、廈門同新加坡等。
呢種生意响十九世紀中後期至二十世紀初最蓬勃,澳門係當時嘅遠東交易中心,喺聖安多尼教堂同大三巴牌坊附近,呢種舖頭林立,1866年大概有四十間,1873年有多過三百間,1856至1873年(冇計1861同1867年)間,出口嘅華工唔止十八萬。佢等自稱招工館,葡人稱之為「barracão」(譯作巴拉坑),華人叫豬仔館。當時中國窮困潦倒,無數老百姓生活艱難,有好多後生壯丁,俾人販呃或者自願,賣身出埠做苦工。南粵人隨船出海之後嘅第一站落角點,多數係東南亞(故謂之曰下南洋),唔少最終去到所謂「新世界」——歐洲列強玩嗮嘅大細殖民地。
香港响十九世紀時,一度係世界主要的苦力轉運中心,政府嘅公共工程局就開咗啲打着招工館牌面,外觀似客棧,内籠同監獄無異嘅豬仔館。豬仔館有官辦同民營嘅,去到1906年式微時,都重剩返23間。喺美孚嘅饒宗頤文化館,以前係其中之一,叫「華工屯舍」,乃唯一現存嘅呢類歷史遺跡。响1851至1872年間,由香港運去美國、澳洲同東南亞嘅華工總數有32萬零人。响1861至1872年間,由香港起航嘅苦力船有426艘,英國船最多,其次係美國嘅。航運商人同中介人靠貴價賣船飛嚟弁取暴利,為咗賺到盡,重會超載同剋扣食糧飲水。旅途期間,「乘客」一路圂喺艙底,迫到密厔厔,唔夠飲,食唔足,空氣濁,缺醫乏藥,過着非人生活,死好多人。由1850至1856年,華工出洋死亡率平均係25.2%。同一時期,由香港出發到秘魯、三藩市同古巴嘅苦力船上面,先後有4次嚴重死亡事故,比率由20%至66.66%不等。
簽咗賣身契之後,就會變成契約工,收到啲安家費,亦失去自由,俾人用船一批一批噉運走。有文獻記載話,佢等喺長期嘅海上航程之中,會遭到牲口式對待,尤其是喺開餐時——啲人唔一定有碗用,通常主人會用大木兜或者鐵㷛裝啲嘢食出嚟,成班就圍住踎喺道食,形同餵豬,於是就有「賣豬仔」一詞嘞。同時代,呢門生意喺中國沿海多處都有,販運路線唔同。
後來,「賣豬仔」又多咗引申意義——呃人糊里糊塗噉做某件事、出賣自己勞力,同埋出賣其他人。
This article uses material from the Wikipedia 粵語 article 賣豬仔, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). 呢度嘅所有文字係根據 CC BY-SA 4.0 牌照嘅條款發佈;可能會有附加嘅條款。 Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki 粵語 (DUHOCTRUNGQUOC.VN) is an independent company and has no affiliation with Wiki Foundation.