舊調景嶺警署

舊調景嶺警署(英文:Old Rennie's Mill Police Station),又叫前調景嶺警署(英文:Former Rennie's Mill Police Station),係香港舊時一間差館,喺新界調景嶺寶琳南路160號。差館喺1962年起好,到1991年停用。之後舊差館一度丟空,到1999年用嚟安置被逼遷嘅普賢佛院(1956年成立)。2013年西貢區議會建議用舊差館發展風物資料館(之後正式命名「將軍澳風物汛」),當局2014年就終止普賢佛院嘅短期租約,但未提供安置方案,所以佛院拒絕搬走。雖然當局目標2018年底落成,但係到2021年12月24號先搞掂。

舊調景嶺警署
舊調景嶺警署

調景嶺警署

調景嶺警署嘅成立同調景嶺嘅歷史有密切關係。1950年代開始,調景嶺用嚟安置受國共內戰影響而走難到香港嘅難民(主要係國軍家眷),到1950年代尾已經有超過一萬人。1961年香港政府決定畀難民香港身份證,同時改善嗰度基建,開始供水供電同埋開闢車路,調景嶺警署亦喺1962年起好,維持嗰度嘅治安,亦對嗰度進行嚴密監視,避免親國民黨人士主導嘅1956年雙十暴動重演。

調景嶺警署地理位置喺調景嶺高處,設有哨崗,可以居高臨下望晒成個調景嶺。

1990年代頭,香港政府落實清拆調景嶺寮屋區,重建成將軍澳新市鎮一部份,調景嶺警署喺1991年底率先停用,到1995年4月政府正式宣佈清拆寮屋區。

普賢佛院

1956年,藏傳佛教章嘉活佛徒弟吐登上師落腳香港調景嶺建立普賢佛院,援助嗰度嘅居民。佛院供奉嘅觀音嘅化身「綠度母」,又收藏咗原本喺北京雍和宮嘅「唐卡」(佛像圖)。

受政府清拆調景嶺寮屋區影響,普賢佛院喺1999年7月9號開始被安置到原調景嶺警署,只需繳交每年一蚊港紙象徵性租金,當做拆遷嘅賠償,不過租約只係短期租約。

普賢佛院入面有一啲藏傳佛教嘅宗教物品,亦供奉咗四百幾個喺調景嶺過身嘅國軍靈位。

受西貢區議會決定選址舊調景嶺警署起風物資料館影響,普賢佛院嘅租約喺2014年11月28號到期後,政府要求佛院搬出,不過就無提供任何安置方案同賠償,所以佛院第四代住持劉建國講明拒絕遷出。2015年6月,地政總署人員執行收地行動,劉建國喺佛院天台點火燒手抗議,不過都阻止唔到當局嘅行動。當局將佛院內物品扣押,建築物出面用圍板封住,外面設有保安崗亭。

將軍澳風物汛

2013年,香港政府預留一億港紙畀各區區議會推動「社區重點項目」,西貢區議會最終決定用其中五千萬搞調景嶺文物行山徑同埋風物資料館,項目由基督教靈實協會中標,負責頭5年嘅營運。

風物資料館定名「將軍澳風物汛」,選址舊調景嶺警署(包括隔籬兩座警員宿舍),總樓面面積為562平方米,展覽內容由Pointsman顧問公司設計及策展,完成工程後移交基督教靈實協會接手營運。風物資料館免費開放,展示將軍澳發展做新市鎮之前嘅面貌,同埋區內嘅發展里程,亦會搞專題展覽、講座同埋導賞團。館入面設有紀念品舖頭同埋茶室。而隔籬兩座警員宿舍就會活化成旅舍,命名做「靈風雅舍」,設有14間客房,並靠旅舍收入去維持成個項目自負盈虧。

項目工程喺2017年2月開始,喺同年4月24號舉行動土禮,目標2018年底落成,但係到2021年12月24號先搞掂。

參考

Tags:

舊調景嶺警署 參考舊調景嶺警署差館新界英文西貢區議會調景嶺香港

🔥 Trending searches on Wiki 粵語:

周星馳開卷 (電視節目)英國香港高級程度會考羅苡之大樹菠蘿容可兒談善言九評共產黨南港島綫龍涎香董幸兒聖枝主日余思敏亞氏保加症馬田 (YouTuber)郭富城麥詩敏愛·回家之開心速遞KOL美式16波葉巧琳鍾卓穎大紀元時報哈馬斯周卓盈長沙灣陳俞希69柬埔寨陳潔玲 (藝人)臺7乙線李炘頤陳僖儀歌手2018溫家偉蔣中正家族三星集團兜巴星Chill Up鄭衍峰中國朝代含𡳞頓號蔣家旻法屬阿爾及利亞黎明廣東麻雀籌碼計法劉朝健世界養生組織扯旗 (生理)復活蛋彭麗媛深圳李雲迪姜濤謝安琪車婉婉黃淑蔓陳廣池簡些路黃潔琪麥巴比4黑社會 (電影)黎紀君盛勁為馬貝利賴清德HTTPS林家棟譚德塞跳飛機陳嘉靖愚人節美式咖啡🡆 More