福建麻雀

福建麻雀其實有好多種玩法，而最常見係將東南西北中發白用嚟當花牌補花，換言之即係只打筒索萬三種牌。而且叫糊時要用福建話大嗌「福建」，否則被發現冇嗌時需打出兩隻牌並重抽（以補花形式）。

福建麻雀有一種「百搭」玩法，「百搭」即係話隻牌可以用嚟當任何一隻牌咁用，不過同越南麻雀或者江南麻雀嘅百搭唔同，越南牌同江南牌寧寧舍舍整幾隻「百搭牌」出嚟，但福建麻雀嘅百搭牌叫做「金」，即係平時叫開嘅「財神」。喺開局之後第一隻開出嚟嘅牌，就係金，呢個過程叫做「開金」，開咗金之後，嗰隻牌其餘三隻就用嚟做「百搭」

帶弟百搭

「帶弟」意思係九一相連，由一到九，每一個數目之後個數目叫做弟，而由於九一相連，九之後嘅弟就係一，如此類推。而帶弟百搭即係話喺槓尾開隻牌出嚟，但就唔係用嗰隻牌做百搭，例如開出嚟係三筒，咁三嘅帶弟係四，就用四隻四筒做百搭。

福建麻雀基本上係玩「輪莊制」，多數用全部144張牌。東西南北中發白並不被認為係花牌。花牌係“金”則該色花牌不使補花。四個人玩，打十六張牌，同一般蔴雀玩法一樣，輪流通過模牌、掉牌、「上、碰、槓」去做一副糊牌。

福建麻雀有一啲特殊番牌類型，同一般蔴雀唔同

搶金

當一開完金，一起手即叫糊就可搶金（百搭牌），莊家搶金要先打1隻先可搶，閒家可直接搶金，計法自訂。

平糊

開出嚟副糊牌，又無花又無槓，咁叫平糊，平糊會根據搶金計。

三金倒

任何一家只要拎到三隻金，就唔使理做緊乜嘢牌，立即可以食糊，計底分 40 倍。

金雀

用兩隻金嚟做「對」，即係「將眼」，計底分 60 倍

福建麻雀叫做「計銀両」，同廣東麻雀計法唔同，福建麻雀嘅銀兩計算，基本上係由「底分、花分、金」組成

底分

根據糊出嘅牌型而定出級別，即係一般蔴雀嘅番

花分

根據糊出時有幾多隻花牌計算，開槓當一隻花，暗槓當兩隻花

金

每隻金嘅銀兩同底分相同

連莊、抓莊

連莊即係冧莊，莊家食糊可以做多次莊，咁叫連莊，連莊食糊，可以加底分，連多次，就加幾多倍。抓莊即係閒家贏莊，可以贏一倍

封頂

根據情況而定一個最大輸分值