林景楠

林景楠2015年同泰籍太太Bowie Kanokwon結婚，生咗大女叫「自悠」。2020年二女「良梔」（粵音「良知」）出世 。

因光復沙田期間言論畀海關解僱

2015年2月，林景楠途經「光復沙田」（反對一簽多行等政策）示威現場同接受電視台訪問，表達同政府唔同睇法，結果畀激進建制派起底，先被調離客運檢查崗位；至2015年10月，更畀海關「以言入罪」解僱。其後佢創立阿布泰國生活百貨。

武漢肺炎表現

2020年1月爆發武漢肺炎第一波疫情期間，阿布泰國生活百貨取得由泰國購入嘅一批口罩，醫管局前線醫護人員、邊境管制站嘅紀律部隊人員包括海關、入境處同衞生署職員，喺出示工作證件或者委任證就可以唔使排隊，以實名登記後，優先購買口罩。結果當日阿布泰國生活百貨14間門市都有千名市民排隊。不過，佢做法引起咗部分親建制派網民不滿，佢哋話呢間店「違反《防止賄賂條例》第3條」，向醫護人員同海關等提供優先購買口罩嘅權利。至2月因應確診武漢肺炎個案上升，又喺青衣城以每個港幣1蚊嘅價錢開售口罩。

2020年立法會選舉

林景楠曾經喺2020年3月初表明有意參選2020年香港立法會選舉進出口界功能界別，不過之後喺6月中喺社交媒體發文正式宣佈，將會參選2020年香港立法會選舉新界東直選，並參加2020年香港立法會選舉民主派初選。2020年7月，佢提名期截止後先報名參選新界東選區，經諮詢兩位協調人同攞到呢區四份之三參選人/團隊唔反對/同意下，有關提名獲得酌情接納處理最後初選結果取得5,350票。。而最後佢亦報名參選進出口界。

涉違反《港區國安法》被捕、後續

2021年1月6號朝早10點，林景楠因為涉嫌違反《港區國安法》中「顛覆國家政權罪」罪名畀香港警務處國安處人員拘捕，有指同佢曾參與2020年立法會選舉民主派初選有關。佢喺2023年1月認罪。

被捕之後，林景楠嘅政治立場開始向親中陣營靠攏，喺2022年8月表達對中國共產黨總書記習近平7月1號訪港發表講話嘅睇法嘅時候話「必須全面貫徹『一國兩制』方針，必須落實『愛國者治港』，避免接觸港獨思想」等等，之後喺第二年1月1號喺Facebook上載同財政司司長陳茂波嘅合照，形容香港有「完善嘅法律法規」，同埋話要「講好香港故事」。

2023年3月22號，佢响新浪微博、Facebook出Po，話「香港唔可以亂，亦都亂唔起」，重話「阿布泰同黃色經濟圈割蓆，未來會繼續服務香港」。