彭卓棋

彭卓棋喺香港出世，2012年喺香港大學讀社會科學，主修政治公共行政系。

喺2015年，佢成立咗公司，開始咗佢嘅創業之路，業務嘅範圍包括有市場推廣、網絡行銷等等。

喺2016年，佢創立咗香港青年創業聯盟，去支援後生仔創業。

佢喺14歲開始投身社會運動。2009年受黃毓民影響加入咗社民連，參加過反高鐵示威同埋五區公投。2011年，佢同黃毓民退出咗社民連，同年成為普羅政治學苑第一屆嘅畢業生。喺2012年，佢去咗讀香港大學，之後成為黃毓民喺立法會嘅議員助理，負責做政策研究，亦都有幫過手處理司法覆核嘅案件。同年，佢都有參加反國教活動。

喺2014年，佢參加過雨傘運動。同年，佢參加咗香港大學學生會選舉。當期時佢嘅候選內閣Smarties成員葉璐珊因為有共青團嘅身份，所以候選內閣嘅政治立場受到質疑，最終亦因為噉而落選。之後彭卓棋發表聲明話「喺組閣期間，時間有限，只能夠透過朋友介紹人加入，喺校園電視報出『紅底』參選人嘅一日前，我並唔知道葉璐珊嘅背景，能夠組莊出選已經好難得。之後葉璐珊被各界質疑佢嘅背景，佢要求內閣必須誠實面對所有嘅指控，葉璐珊一直將佢所知、所見同所聽毫無保留咁向各位分享，儘管本人知道佢嘅做法對依個內閣嘅選情極為不利。」 彭卓棋之後喺蘋果日報澄清相關嘅指控。

2018年1月，旺角嘅健身中心TF GYM突然間執笠，身為會員之一嘅彭卓棋發起咗「TF苦主聯盟」，搵咗超過400個苦主。要求健身中心賠錢同埋還返儲物櫃嘅個人物品。彭卓棋希望健身中心嘅負責人去解釋事件，並叫警方徹查事件。彭卓棋話，健身中心喺停業前大力促銷招收新嘅會員，聯盟已經將資料交咗畀警方調查。之後喺1月21號，彭卓棋舉行記者招待會交代進展。

2019年，彭卓棋加入南區民生關注組成為咗赤柱及石澳嘅社區幹事。到年中，香港嘅反送中示威浪潮一路持續，佢都有積極參與社會運動，並且參選赤柱及石澳區議會選舉，獲得民主派嘅推薦硬撼建制派。最終佢以2,680票擊敗咗得2,592票嘅陳李佩英當選。

2020年3月，大眾書局突然間執笠，彭卓棋同埋李傲然、巫堃泰幾個區議員去咗跟進大眾書局嘅執笠問題，幫有需要嘅員工過渡。

2021年，佢同細佬彭家浩一齊參與2021年香港區議員宣誓，結果佢宣誓無效，即時冇咗區議員議席。佢之後做咗基本法學生中心會長。