孫權: 東吳皇帝

孫權
東吳皇帝
唐代畫家閻立本（中文：閻立本）《帝王歷代圖卷》中嘅孫權部分，收藏喺波士頓美術館
在位	200年～222年（江東首領） 222年～229年（吳王） 229年5月23號～252年5月21號（稱帝）
都城	武昌（229年）、建業（229年後）
前任	始祖武烈帝孫堅（追尊） 長沙桓王孫策
繼任	廢皇帝孫亮
配偶	謝夫人（中文：謝夫人 (孫權)）、徐夫人（中文：徐夫人 (孫權)）、步夫人、大懿皇后（中文：大懿皇后）、敬懷皇后（中文：敬懷皇后）、潘皇后（中文：潘淑）
子嗣	孫登、孫慮、孫和、孫霸、孫奮、孫休、孫亮、孫魯班、孫魯育
字	仲謀
諡號	大皇帝
廟號	太祖
父王	孫堅
母后	吳夫人
出世	182年7月5號（光和五年陰曆五月十八）
死	252年5月21號（神鳳元年陰曆四月廿六）
陵墓	蔣陵
年號	黃武（222年～229年） 黃龍（229年～231年） 嘉禾（232年～238年） 赤烏（238年～251年） 太元（251年～252年） 神鳳（252年）

孫權阿爸孫堅同阿哥孫策，響東漢末年群雄割據中，佔據咗江東六郡做根據，打好咗基業同各派軍閥抗爭。孫權文武雙全，年少嗰陣已經有將帥嘅才能、統率大軍嘅能力。200年，佢嘅哥孫策作爲江東盟主，遇刺身亡，於是佢十八歲就掌權，繼任做吳侯，統治咗江東。佢防禦咗曹操同劉備嘅進攻，促成三國鼎立嘅局面，面對曹魏同蜀漢時，孫權統領嘅東吳企喺中立位置，對東吳有利時會同兩邊妥協。佢冇乜意思要完全征服自己嘅對手，好多史家認爲係因爲後勤基礎未足以支撐孫權實現呢個意思。

啲人對佢評價好高，連佢嘅敵人曹操都讚佢「生子當如孫仲謀」。207年聯合劉備抗曹操，喺赤壁之戰打敗曹操。不過佢末年失策，埋下咗吳國敗亡嘅隱憂。喺三國霸主嘅奠基人中，相比曹操、劉備，孫權嘅統治時間最長。佢過世後，東吳亦自此衰退，噉係由於繼位人能力唔夠。

同三國時代嘅其他第一代君主一樣，孫權都好識用人，而且響納諫方面做得更好，重會認真聽反面意見。同時都好有戰略眼光。《三國志》記載吳國大臣對孫權嘅評價：「提魯肅於凡品，是其聰也；拔呂蒙於行陣，是其明也；獲于禁而不害，是其仁也；取荊州而兵不血刃，是其智也；據三州虎視於天下，是其雄也；屈身於陛下（曹丕），是其略也」，雖然難免溢美之辭，但概括嘅嘢都算全面。

家系

據清代《四庫全書》嘅記載，先祖可以追溯到春秋時代嘅兵法家孫武，而家喺浙江省杭州富陽區南部有條叫龍門古鎮嘅村，而家做咗觀光地。呢條村九成人姓孫，自稱係孫權嘅後裔。喺呢條村嘅族譜，客家人革命家孫文亦係呢族人，但實際上孫權嘅阿爺當初出生嘅家世論真僞係不明嘅。

初頭

182年（光和五年），阿爸孫堅做緊下邳嘅縣丞時，五男三女中嘅第四仔（二仔）孫權出生，喺個仔出世時望孫權嘅風貌，認爲佢會上到高貴嘅位置而開心。

184年（光和七年），太平道嘅張角發動宗教叛亂，亦即黃巾之亂，爲咗鎮壓佢，佢老豆跟喺漢王朝中郎將朱儁之下參戰，吳氏同啲仔女留咗喺九江郡嘅壽春。189年（中平六年），佢跟住阿哥孫策移居去廬江舒嘅周瑜屋企。

初平三年（192年）孫堅喺同劉表嘅戰鬥中戰死，畀黃祖嘅部下殺死（襄陽之戰）。葬禮終結後，一時移住江都，由吳夫人撫養啲遺孤。

193年（初平四年），孫策入咗袁術旗下之際，佢派遣呂範將屋企人迎送去住喺曲阿嘅吳景度。遞年，孫策爲咗袁術攻打廬江，揚州刺史劉繇驚咗袁術同孫策，於是同佢哋對立，將吳景趕出丹陽。呢陣時，孫策嘅屋企人都喺劉繇嘅地盤。朱治就使人去曲阿將吳氏連埋孫權同班細佬脫出，保護咗佢哋（《吳書·朱治傳》注《江表傳》）。然後佢同阿媽移住去曆陽同阜陵。

195年（興平二年），孫策喺江東舉兵崛起，破咗劉繇軍後，孫策入咗曲阿，派遣部將陳寶去阜陵迎接屋企人，喺之後嘅征戰，孫權就跟住阿哥流轉各地。呢陣時孫權開始同啲士人交流，佢嘅名畀好多人知，攞到嘅名望同佢老豆、阿哥齊等。孫權性格明朗，度量大，諗嘢細，同時有決斷力。因爲噉，孫策制訂策略時，恆常同孫權商議，因此孫權參加咗好多計略、謀議。孫策對佢意見評價幾高，話孫策自身都唔及佢，認爲佢係個非常人材。

孫權得15歲時（196年，建安元年），阿哥就畀佢做咗陽羨縣嘅首長，助力孫策佔據江東，之後受推薦，擔任代行奉義校尉嘅職務。佢喺吳郡跟胡綜同朱然學學問。周泰同潘璋配畀佢做下屬。亦喺呢年，佢舉做孝廉。

199年（建安四年）孫權跟住孫策征伐，擊破廬江太守劉勳，然後進軍沙羨（而家武漢江夏區西郊），擊破黃祖（孫策嘅江東平定）。但喺攻打徐州廣陵郡時，畀廣陵太守陳登大敗。

200年（建安五年）初，孫氏同曹操結成同盟。司空曹操招聘孫權同佢細佬孫翊（實際去做人質）。結局冇去成。當年春天孫策畀許貢麾下嘅刺客襲擊，得26歲咁短命。嗰陣時佢嘅仔孫紹未出世，長史張昭推薦嘅軍閥後繼者係孫堅嘅三仔孫翊，但孫策付託嘅後嗣係18歲嘅孫權。死之前，孫策同孫權講：「裏頭嘅事決定唔到時問下張昭，外便嘅事決定唔到時問下周瑜。」所以佢對張昭行師傅嘅禮遇。

孫權對兄長嘅死傷心到喊唔停口，張昭激勵佢，勸佢除咗喪服，去視察陣營。日後孫權追贈孫堅做武烈皇帝，孫策追贈做長沙桓王。由於孫權有才，又注意團結各派力量，好快就掙得威望，令江東局勢從混亂中穩定落來。

江東首領

之後孫權繼任攬權。曹操本來想趁孫策死咗嘅機會，去攻擊孫權，呢陣時留喺許都嘅孫氏使者張紘勸話不如畀啲恩惠佢好過，說服到曹操。於是孫權畀曹操把持嘅東漢朝廷封做討虜將軍，兼任會稽太守。當時孫氏支配嘅地域有會稽、吳郡、丹陽、豫章、廬陵等郡，但形勢險峻，難以服從。而且呢陣時君臣關係未有着落，恆常要主君注視事態，所以佢出力鞏固自己嘅勢力。不過周瑜同張昭預見孫權將來係會成就大業嘅人物，所以精誠爲佢效力。

佢從父兄度繼承咗班家臣，共周瑜、程普、呂範哋一齊，積極噉錄用優秀人材，亦任命佢哋做軍事指揮官。當中陸遜、諸葛瑾、步騭、魯肅、顧雍、是儀、嚴畯、呂岱、徐盛、朱桓、駱統哋就噉樣錄用。喺接位嗰年，廬江太守李術反叛，孫權率領徐琨、孫河，舉兵去攻喺皖城嘅李術。於是李術搵死，孫權得到部曲三萬人。

孫權同魯肅去論天下。魯肅提案話：「趁住北方騷亂，攻打黃祖、劉表，制得荊州，用長江做北界來割據，自己稱做帝王。」

202年，曹操打敗袁紹，統一北方，開始睺住南方。曹操寄信畀孫權，想孫權交個仔來做人質。張昭怕，唔敢決定。孫權同周瑜、阿媽吳氏夫人商議後，就聽周瑜講，堅決唔制。有話之後當年吳氏夫人就逝去嘞。

203年（建安八年），去討伐有父仇嘅黃祖，擊破佢嘅水軍，黃祖軍兵敗潰走。但對手即將陷落嘅呢個時候，後方山越嘅叛亂活躍，要會軍鎮壓。孫權返到豫章，命令呂範平定鄱陽，程普去討伐樂安。建安、漢興、南平唔服從嘅民衆又起亂，命令賀齊去擊破。叛亂頭目悉數捕俘，討斬獲得嘅首級有成六千。然後原先黃祖嘅部下甘寧加入咗孫權。除咗呢個以外，孫翊同孫河畀媯覽殺死，從兄弟孫暠企圖叛亂，孫輔同曹操內通，但啲問題都解決咗。孫權派遣心腹顧徽做使者去曹操度，去調查朝廷嘅內情。

206年（建安十一年），孫權率領周瑜、孫瑜、凌統，討伐山越嘅要衝麻屯、保屯。孫權獲得一萬人餘嘅捕俘，以勝利收場。

207年（建安十二年）繼續西征黃祖，因爲老母重病，俘虜咗好多人就歸還。喺第年208年（建安十三年）春天，孫權終於整低黃祖，得到江夏郡嘅南部。當時黃祖想用水軍阻止孫權嘅侵攻，但畀呂蒙擊破。由於有凌統、董襲等精銳兵嘅攻擊，所以對手最終陷落，黃祖畀兵士馮則殺死。就噉孫權報咗老豆嘅冤仇。

設立孫劉聯盟

 

208年，荊州牧劉表死咗，陰曆七月，曹操引大軍打西南邊，劉表嘅後繼者劉琮投降曹操，於是曹操佔得荊州。劉備被迫走難南下，喺長坂坡畀曹軍打敗。

孫權聽話曹操入咗荊州，立即派魯肅，名義上去弔問啱病死嘅劉表，查實去一探虛實。魯肅尋着劉備，講聯合抗曹嘅事。

年尾時曹操寄信畀孫權，話「近來我數咗啲罪狀，討伐啲罪人，所以將軍旗揮向南邊，劉琮連表示抵抗都冇就降服。呢次我整備咗80萬水軍嘅軍勢，想同將軍你喺吳地嘅地域打下獵噉」，實質逼佢投降。孫權收到呢封信後向群臣展示，冇邊個唔會震驚到面色都變埋。班君臣知道若果唔降服，就會畀曹操討伐，呢份係最後通牒。

孫氏朝臣呢陣時分兩派，主降同主戰，主降派由張昭打頭，話曹操軍勢強勁，想投降曹軍，主戰派由魯肅打頭，想同劉備立聯盟，共抗曹操。於是臣僚間議論紛紛，孫權一時決斷唔到該開戰定歸降。孫氏軍閥嘅性質係豪族嘅集合體，所以歸順派（張昭、秦松等）佔咗多數。劉備嘅軍師諸葛亮派遣到江東，同魯肅隨行，見大都督周瑜爲劉備求救援，作爲使者說服孫權跟主戰派（周瑜、魯肅等）打曹操。周瑜畀意見話曹操講嘅80萬軍只係放大，曹操嘅實力冇咁高。曹軍大部分係北方人，唔熟水戰，熟水戰嘅大部分係荊州降軍，本來冇服務曹操幾耐，所以佢哋嘅戰鬥意志唔會高，兼且當時入咗冬天，北方嘅曹軍亦唔合水土，易病，撐唔到幾耐。

孫權聽從周瑜，揀咗主戰派，決意開戰，孫權攞刀㓟（pai1）咗面前放置上奏文嘅檯嘅一角，話：「今後你哋當中再同我講降服者，個命運就同呢張檯一樣。」表明咗佢決斷嘅意志。孫權派周瑜、程普共魯肅引三萬兵馬出陣，同劉備聯盟打曹軍。同年嘅赤壁之戰中，戰況上，由於唔慣江南嘅氣候同地勢，曹操陣營疫病流行，而通過黃蓋詐降曹操，孫劉聯軍展開咗優勢，周瑜用計火攻打散曹操水軍。最後喺赤壁完全擊破曹操軍，曹操悟到不利，唯有走返鄴郡，留徐晃同曹仁守江陵，樂進守襄陽，滿寵守當陽。

嫁妹畀劉備

戰後，劉備上表劉表嘅長子劉琦做荊州刺史，併合咗荊州南部嘅武陵、長沙、桂陽、零陵呢四郡。然後208年12月，孫權自己親身打由劉馥鎮守嘅合肥，又派張昭去進攻喺九江嘅當塗，但唔成功。曹操派張喜（中文：張喜）解圍合肥。孫權軍包圍合肥已經幾耐，但仲未破到城。劉馥嘅副將蔣濟勸劉馥派三個守將帶信詐話張喜援兵已經到咗城外。孫權捉到當中兩個守將，中咗蔣濟計謀，於是決定撤退。

209年，孫權派周瑜帶軍攻打江陵，同劉備一齊攻取南郡，一年間嘅攻防後，逼到曹仁棄城退卻，走返去襄陽，平定咗南郡呢個地域，孫權任命周瑜做南郡太守。按劉備嘅上奏，孫權就任爲徐州牧、行車騎將軍。之後冇耐，劉琦死去，左將軍劉備就自己做咗荊州牧。孫權同劉備喺京口會見，結成咗個人友誼。喺赤壁嘅荊州爭奪戰中獲得嘅領地，商量佢哋嘅領有權嘅結果係，由於魯肅嘅提案，同劉備協調來對抗曹操，孫權就借畀劉備荊州數郡，劉備就領有咗南郡、武陵、長沙、桂陽、零陵呢荊州南部五郡，構築咗公安呢個根據地。

但係孫權逐漸怕咗劉備擴大緊嘅勢力，於是將佢嘅妹孫氏同劉備聯姻，來加深友好關係。

爭奪荊州、交州

210年（建安十五年），佢派遣交州刺史步騭，士燮就服屬咗佢，又謀殺咗吳巨。於是孫權就領有咗交州九郡：南海、鬱林、交趾、日南、珠崖、儋耳、蒼梧、九真、合浦。211年孫權將自身嘅大本營搬去秣陵，又改佢名做建業。

212年（建安十七年）開始，直到第年正月，曹操親自引水陸聯軍攻打孫權嘅江西營，孫權阻止咗佢，兩邊喺濡須口交戰對峙咗好耐，但不分勝敗。當時孫權自己坐船去視察曹操嘅陣營，親自出陣，孫權嘅視察團無論武器定隊伍等都喺完成整頓嘅狀態。曹操見到噉，亦歎服孫權嘅天才，稱讚話「生仔就要似孫權噉」（生子當如孫仲謀），於是軍事上退卻咗，就噉擊退咗佢哋。呢場仗叫濡須口之戰。

213年，因爲嗰陣劉備打西川，孫權就派人到荊州接孫夫人返。孫夫人諗定帶埋先七歲嘅劉禪（劉備嘅仔）走。劉備屬將趙雲共張飛帶軍出去截住佢哋，勸孫夫人留低，但孫夫人唔聽。二將就畀孫夫人走，但押住咗劉禪響度。

214年（建安十九年），劉備平定到益州，益州刺史劉璋畀佢打到投曬降，於是劉備就領有咗益州，所以孫權就要求劉備返還荊州嘅長沙、桂陽、零陵呢三郡。呢個係劉備喺揚州時就答過話得咗手會還嘅，但呢陣劉備就唔制，而且劉備又要入手涼州，所以就算返還荊州全部領地，個承諾履行都要延期。開頭孫權爲咗支配呢三郡，送咗啲官入去，但被趕返出來，所以孫權嬲嘞，派遣呂蒙哋用軍隊武力奪取長沙、零陵、桂陽三郡，因而喺荊州同鎮守當地嘅關羽對立。呢陣時劉備亦準備送大軍入去打，想發展成全面戰爭，但曹操入侵漢中，劉備驚冇咗益州，於是同孫權和解。結果東西分割咗荊州，東面歸孫權，西面歸劉備，長沙、桂陽返還畀孫權，回復返表面上嘅同盟友好關係。實際上喺呢年，孫權採用咗呂蒙嘅意見，準備緊對荊州嘅征討戰爭。

5月，呂蒙、甘寧率領軍隊，去攻擊曹操佔領嘅皖城，攻城戰喺朝頭早之內終結。捕捉咗廬江太守朱光（中文：朱光 (三国)）同埋數萬人嘅男女。當年曹操輸咗第一次濡須之戰，之後走返去京城，派張遼、樂進、李典守合肥。之後曹操帶軍打張魯，歷時幾耐，孫權睇曹操喺漢中，就引十萬大軍進駐祿口，準備打合肥。

215年（建安二十年）8月，孫權率領10萬軍勢，經過百餘日去攻擊合肥城，叫做第二次合肥之戰。張遼同李典呢二將之間不和。張遼收到曹操使者帶嘅密函。曹操叫張遼、李典出去打，而留樂進守城。張遼話要趁孫權軍勢未集結完，先出軍襲擊打孫權。李典亦同意，拋開同張遼嘅嫌隙。張遼選咗800人嘅軍，騎馬打頭衝入敵陣，斬死孫權嘅兩員大將，然後突圍迷惑敵方。

當時喺戰場之中，攻擊時孫權親自企喺陣頭，喺退卻時係直到最後都留喺戰場，來執行退卻指揮，所以佢幾勇猛果敢，但某啲時候又過於輕率，幾度差啲冇命。但佢仲未攻落座城就撤退嘞，因爲孫權軍爆發疫病。撤退時佢哋仲畀張遼奇襲添。張遼秘密整斷逍遙津嘅橋，想生擒孫權，就佈咗埋伏喺嗰度。過逍遙津橋時，孫權軍被埋伏，而橋亦被切斷。

呢陣時雖然孫權班軍士打散咗，情勢危急，好在牙將凌統奮戰之下，亦走出困境，孫權過橋時係策馬飛躍斷橋嘅。呢個過程中陳武戰死，孫權好哀痛，親自舉行葬禮，而陳武嘅愛妾亦殉葬。呢次撤退孫權軍受到重創。

217年（建安二十二年），曹操攻擊濡須，第二次濡須口之戰開打，孫權就任命呂蒙做大將來防佢。山越亦呼應曹操而舉兵，但孫權命令嘅賀齊同陸遜擊破咗佢哋。就喺同曹操嘅戰線膠着時，孫權向曹操降服。孫權派遣徐詳，形式性噉臣從曹操，因爲噉曹操軍撤走，然後又向曹操勸進帝位。見到呢封信後，曹操話：「呢隻衰仔，望個樣係跪低，查實係擺我上炭爐之上烤」（成語典故「踞爐炭上」）。

孫權之所以臣服曹操，噉係由於荊州問題而同劉備不和導致嘅。劉備支配咗益州同半邊荊州，個勢力日漸擴大，到219年，劉備更自命做漢中王，令孫權幾有壓力；當時諸葛瑾再次做使者要求返還荊州，但返還實現唔到，失敗咗。219年（建安二十四年），孫權提出將關羽嘅女嫁畀佢嘅仔，兩家結成婚姻，但關羽斷然拒絕，話「老虎嘅女點會嫁畀狗嘅仔」（吾虎女安肯嫁犬子乎），鬧低孫權。七月時，關羽留低公安同南郡守備程度嘅兵力去看住荊州，然後率大軍北上打曹軍，去包圍曹仁守住嘅襄陽同樊城。孫權見到呢個係個機會搶返荊州，趁住關羽北進，將詐病嘅呂蒙召喚返去，隱密噉準備戰爭。孫權話就話要畀救援畀關羽，但又慢慢進兵。於是關羽就鬧：「禽獸！樊城陷落之時，我仲唔滅咗你！」（鰂子敢爾，如使樊城拔，吾不能滅汝邪！）孫權聽聞咗呢啲說話，知道佢輕視自己，詐寫信來陳謝道歉。

呢陣時，曹操軍驚咗關羽嘅快進攻擊，曹操嘅部下司馬懿同蔣濟見到關羽同孫權之間交惡，就有咗計，提案話將荊州讓渡畀孫權，然後依賴佢討伐關羽。喺之前嘅單刀會談，劉備以湘水做界線割開兩邊，如今，關羽因爲兵糧不足，就襲擊孫權軍境內，強奪軍需物資。孫權上表過漢天子，同時亦上書同曹操講討伐關羽嘅事，表示同意共呂蒙訂立計略，令關羽疏忽大意。於是曹操畀佢領任荊州牧；但又將孫權嘅投降書飛箭射入關羽嘅營寨。不過，關羽唔信，認爲係曹操拋封假信來攏絡佢。

關羽喺度呃咗，動員全軍去樊城，又轉運湘關嘅軍糧。8月，關羽領軍打襄陽同樊城，幾多曹軍將領投降，一時威震華夏。10月，孫權派呂蒙、陸遜率軍討伐關羽、襲擊荊州。麋芳、傅士仁二將唔忿關羽，歸順咗吳軍，獻江陵、公安二城畀孫權，呂蒙作爲先鋒，得到咗江陵呢個關羽嘅大本營。最屘12月，孫權喺背後平定咗荊州，全數奪還劉備領有嘅荊州（樊城之戰）。

關羽落令從樊城撤退返荊州，先知失咗退路、江陵同公安都冇咗，只能走去麥城。219年底，孫權派人誘降關羽。關羽假扮投降，而帶住10個騎兵走去臨沮，就喺嗰度畀吳將朱然、潘璋捕捉。自此孫氏控制全部嘅長江以南，包含荊州同揚州。

孫權處刑咗關羽，派人搦住關羽個頭去洛陽獻畀曹操。曹操厚葬咗關羽，然後根據呢啲功績，曹氏把控嘅漢朝廷昇進孫權做驃騎將軍，任荊州牧，封做南昌侯，想增強劉備對孫權嘅仇恨。孫權派使者梁寓去漢朝廷進貢。之後，孫權招聘咗張承、闞澤、潘濬、劉基。

三國鼎立

220年曹操死咗，佢嘅仔曹丕廢咗東漢嘅獻帝，受咗禪讓自己即位爲皇帝（文帝），建立咗魏國，第年（221年）蜀漢劉備亦昇咗帝位。因爲奪取咗荊州，孫權同劉備敵對，所以孫權就接近咗曹丕，承認曹丕嘅皇帝位。孫權繼續形式上對魏國行臣下嘅禮，文帝就封佢做吳王、大將軍，畀佢督揚、荊、交三州。另外，孫權派遣陳化、馮熙、沈珩（中文：沈珩 (东吴)）、趙咨哋做使者，構築同魏國嘅安定關係。

同年七月，劉備率領軍士東進去侵攻吳地，一係想奪還荊州，二係爲關羽報仇，雖則幾多將領勸阻佢，但劉備唔聽，決意引萬軍東征。孫權就任命陸遜做大都督，指揮吳軍去防禦迎擊。同時爲咗因住魏國趁呢陣侵略，就派遣咗使者過去。呢陣時文帝要求獻上象牙、珍珠、孔雀等珍貴嘅貢品，一班家臣就好憤慨，要求拒絕。然而孫權話「百姓嘅性命取決喺一個人嘅決定」，就將要求嘅物品全部獻上，噉來確保北方嘅安全。

喺蜀吳開戰前，張飛畀部下殺害，佢個首級送咗畀孫權。初頭吳軍接連失敗，之後兩軍相持。222年（黃初三年），當時啲吳國老將都想同蜀軍直面交戰，但陸遜唔准。劉備就派軍去挑釁佢，但陸遜唔睬佢啲挑戰。直到佢知道蜀軍有咗疫病跡象，陸遜先派軍裝假進攻入敵方當中一個營寨，來打散蜀將嘅注意，然後叫軍士用火攻打入淨低啲營寨，接住出兵總進攻，蜀軍大敗，近乎全軍覆沒。之後劉備撤退西歸，最後死喺白帝城。陸遜擊退咗劉備軍，打破蜀漢軍嘅侵略，令孫權確實噉領有荊州，是爲夷陵之戰。

 

但從呢陣時起，同魏國嘅關係惡化。噉係因爲文帝攞畀孫權嘅仔就任朝廷官職嘅名份來要求交人質，而孫權拒絕咗呢樣嘢。於是魏國派曹真同夏侯尚做指揮官，分三路進攻吳地，場仗喺222年到223年間打，但一番苦戰後，畀潘璋火燒浮橋擋住咗，因爲呢個功勞孫權晉級潘璋做右將軍；最後朱桓攻破曹仁，加之魏軍流行緊疫病，於是退卻。夷陵大戰結束以後，孫權聽聞劉備留咗喺白帝，就派遣咗使者鄭泉去請求和睦，修復返個友好關係。劉備同意咗呢樣，幾次派遣宗瑋、費禕哋去做答禮。由此，三國嘅地域就此確定。

既打破咗蜀漢嘅入侵，又同佢和睦返，而同魏國又冇必要同盟，孫權就唔再喺形式上臣從魏國，自此分離，開始使用獨自嘅年號黃武。呢一年就係吳國嘅建國年。劉備失意而死，諸葛亮好擔心孫權聽聞劉備死去，會抱有異心，就派遣咗鄧芝去整好同孫權嘅友好關係。於是第年嘅223年（黃武二年），東吳同蜀漢再次同盟。以後，吳國同蜀漢結成一對，一齊對抗魏國，諸葛亮北伐等蜀漢有動作時，吳國亦會呼應佢去攻打魏國。就噉，孫權用巧妙嘅外交來維持乃至擴大勢力。

224年（黃武三年），魏國再次攻打埋來，徐盛喺長江沿岸築起啲假嘅城牆，嚇親嘅魏軍冇戰鬥就退卻咗。

226年（黃武五年），孫權派遣呂岱，鎮壓士徽嘅叛亂，強化對交州嘅控制。同年，孫權派孫奐、鮮于丹攻打江夏，派諸葛瑾攻打襄陽，雖然孫奐、鮮于丹攻落咗高城，但諸葛瑾畀司馬懿哋打敗，於是孫權哋撤退。

228年（黃武七年），周魴詐降以便入魏國，來引誘魏國嘅曹休出兵去石亭。陸遜率領朱桓、全琮同曹休打過，大獲全勝（石亭之戰）。

即位做皇帝

 

229年（黃龍元年）喺班臣下嘅一同勸告下，孫權最後即位做皇帝。於是佢成咗吳國第一代皇帝（太祖大皇帝），同時改年號做黃龍。呢陣時就追尊孫堅做武烈皇帝，喺嗰陣時因爲「堅」嘅發音同「甄」同音，就改咗「甄」嘅字音，畀後世繼承。另外，蜀漢決定維持同吳國嘅同盟關係，就派陳震做祝賀使者趕赴吳國。然後喺武昌同孫權會盟，誓約一齊瓜分天下。之後，孫權遷都去建業。

230年（黃龍二年），孫權因爲多次戰爭，吳國嘅住民已經不足，於是派衞温、諸葛直帶精兵一萬名，落指示去臺灣等地（古書中話係去夷洲、亶洲）探索、兼徵發居民。但係衞溫、諸葛直佢哋遇到風浪，又因爲亶洲太過遠，到達唔到，又流行起疫病，孫權畀佢哋嘅兵力大部分都冇咗，就噉佢哋到咗臺灣（古書中嘅夷洲），喺嗰度徵發咗大約上千名南島系原住民（高山族），帶佢哋返建業，約時隔一年後（231年）歸國，呢時兵員冇咗八成到九成。因爲呢個成果，孫權大怒，話諸葛直同衞温背棄咗詔令，冇實現到當初嘅目的，就將衞溫同諸葛直絞首。同年，孫權命令孫布向魏國假投降，魏國嘅對吳司令官王凌爲咗迎接孫布而出兵，結果王凌大敗。

233年（嘉禾二年），遼東嘅公孫淵供給戰馬畀吳國。於是喺三月，孫權向佢派遣使者，畀佢敕書，以藩國嘅禮對佢。作爲答禮，孫權派兵士一萬名帶住金銀寶貨（九錫禮物）送畀公孫淵，於是啲人就坐船向遼東進發。張昭認爲公孫淵係咪值得信賴嘅人物呢點未知，所以反對件事；仲有顧雍、陸遜呢啲重臣都勸諫佢，但孫權唔聽佢哋講，反而聽信咗公孫淵啲內通，仲係派遣咗張彌（中文：張彌）、許晏（中文：許晏）、賀達哋去做使者。結果同家臣預想嘅一樣，公孫淵果然殺咗孫權嘅使者，斬低使者嘅頭交畀魏國，又奪取埋吳國嘅軍隊同賞賜財物。激憤嘅孫權想親自征伐公孫淵，但薛綜哋勸諫低佢。

孫權去張昭嘅屋企，去勸鬥緊氣嘅佢出返來，但張昭對孫權無視自身嘅話呢件事覺得傷咗心，死都唔出來。嬲咗嘅孫權喺大門外封咗埲泥牆，鬥氣作對嘅張昭亦喺入面用泥封死咗內門。孫權爲咗逼張昭出屋企，就放火燒佢間屋，但佢噉都唔出來，於是慌急噉冚熄火，最後先至請到張昭出來，畀佢坐車做貴賓。

末年

到241年時，皇太子孫登死咗，於是引發後繼選定嘅內部紛爭。孫權喺初頭想揀孫和做第個皇太子，但對孫霸亦好啱心水，就封佢做魯王，用皇太子嘅同等身份去對佢。於是班臣下就分裂成孫和派同孫霸派。喺顧雍之後繼承做丞相嘅陸遜經常上訴話「嫡子同庶子喺待遇上係要有差別」。於是孫霸派就捏造罪名，打擊對手。孫權派咗問責使者追究陸遜，搞佢一大鑊，後來陸遜死咗。於是後繼嘅爭鬥更加激化。

250年，孫權以兩邊都罰嘅形式，廢咗孫和嘅皇太子位，命令孫霸自決，然後將佢呢一黨冚唪唥處刑。結果最後孫亮做咗皇太子。呢個過程中，諫言關於孫和廢位嘅數十名臣下唔係處刑就係流配。孫權喺252年四月，同諸葛恪託付咗後事，以七十一歲嘅年紀逝去。