電影 Ptu

《PTU》係齣港產片,導演杜琪峰,係2003年香港國際電影節嘅開片。

電影 Ptu
由《PTU》電影宣傳海報修改而成嘅介紹圖片

電影資料

制作嘅單位同演員

背景資料

PTU,即係香港警察機動部隊Police Tactical Unit,又叫做「藍帽子」),經過嚴格訓練,負責防暴同反罪惡,喺大量人流嘅地方控制秩序,支援第啲警察部門。

套片嘅背景係現代嘅香港,講警方同黑社會嘅瓜葛,圍繞住駐守尖沙咀一隊 PTU 一晚出勤嘅遭遇。

劇情大綱

啱啱入夜嘅時份,駐守尖沙咀嘅一隊 PTU 坐住俗稱「豬籠車」嘅警車出勤,期間聽收音機知道較早前喺北角嘅一單解款車劫案裏面,一個頭部中咗鎗嘅警員喺醫院經搶救後傷重不治,車裏面嘅所有隊員為此議論紛紛,而佢哋嘅工作就係喺一片哀傷嘅氣氛之下開始。架車停低喺路口,PTU 各隊員就落車分成兩個小隊各自出發巡邏。

同一時間,反黑組沙展(警長)肥沙一個人去到火鍋店度遇到黑社會其中一個大哥馬尾同四個細佬喺度食飯,馬尾因為唔滿意肥沙一路咁盯住佢,於是叫四個細佬出去設計伏擊肥沙;當肥沙離開火鍋店一出門口,就見到其中個古惑仔畫花佢架車,於是肥沙就即刻追住佢,另一個古惑仔就用油漆淋到佢架車花喱碌;呢個時候,重喺火鍋店入面嘅馬尾被偷襲,俾個坐後面嘅後生仔從後一刀貫穿心臟,馬尾負傷衝出去截咗架的士,但係個的士佬因為驚得滯,掉低架車落車走咗去(後來因為嚇親而入咗醫院),於是馬尾自己坐咗喺司機位度諗住駕車去醫院,點知頂唔順死咗,而架車就撞咗埋路邊。

肥沙追住個古惑仔追到去後巷邊,佢估到後巷裏面一定有埋伏,於是拎出支配鎗兜後面路,諗住從另外一邊入口入去巷度制服班古惑仔,點知喺巷口俾堆垃圾跣一跣成個仆低暈咗,班古惑仔因為大佬命令,見肥沙暈咗都照樣打咗佢一餐。由女沙展(警長)阿 KAT 帶隊嘅一隊 PTU 小隊發現咗俾人打到不似人形嘅肥沙,於是通知由沙展(警長)阿展帶隊嘅另一組 PTU 到場支援,並且幫手包紥;後來肥沙發現自己唔見咗支配鎗,懷疑係嗰四個古惑仔拎咗去,當阿 KAT 正想通知上鋒有警員懷疑配鎗俾人搶咗嘅時候,同肥沙好熟嘅阿展立即制止,並且要求畀一晚時間幫肥沙搵返支鎗,阿 KAT 喺唔情願嘅情況之下畀佢哋時間搵失鎗。

阿展嗰組一行四人落到一間遊戲機中心搵馬尾嘅表哥阿 MATT,屈佢藏毒,阿展見 Matt 唔多合作,於是轉移叫馬尾個多咀嘅細佬用自己手指捽甩頸上嘅紋身,重不斷咁兜巴摑到佢頭暈暈,迫佢通知馬尾搵嗰四個細佬出嚟,但係打畀馬尾個電話就打極都打唔通;而喺馬尾撞車嘅現場,指揮嘅反黑組陳幫辦(督察)叫手下收集証物同埋將佢哋分類,再等重案組嚟接手,期間遺留喺現場屬於馬尾嘅電話就唔停咁響。無助嘅肥沙收到陳幫辦電話話有嘢做叫佢快啲趕去,心想呢舖仆街,唯有即刻去模型舖買枝模型鎗,然後趕到現場。佢見馬尾喺証物袋入面個電話係咁響就想去聽,諗住會有支鎗嘅消息,但係俾陳幫辦阻止,不過肥沙就趁收集証物嘅同事唔為意,靜靜雞聽咗個電話;遊戲機中心嗰邊阿展拎咗電話一聽發現原來係肥沙,先知道馬尾已經俾人殺咗,於是離開遊戲機中心,去搵專做假信用咭嘅線人。阿展叫隊員阿泰將個線人打到抖唔到氣,查問到嗰四個古惑仔嘅藏身之所,原來喺一棟舊樓嘅其中一個單位。打緊人嘅途中,大隊入面負責內外務嘅傳令員嚟到搵阿展,想話跟佢學吓嘢,但係幾個人都唔想畀佢知正喺度搵緊失鎗,於是呢個傳令員喺唔知做咩嘅情況下跟住阿展佢哋四圍巡。馬尾死亡現場嗰邊,因為重案組女幫辦(督察)MADAM 張殺到,肥沙臨急臨忙之下竟然將馬尾個電話同自己一樣型號嘅電話掉換咗都唔知。

肥沙去搵其中一個江湖中嘅老叔父肥祥叔打聽,點知肥祥叔話佢知做龍頭大哥嘅大眼喺度搵緊佢,想佢通知O記同其他手足提供保護;原來馬尾嘅龍頭老豆禿頭一口咬定佢個仔係俾大眼搵人殺死,大眼怕會掀起江湖嘅一場腥風血雨,所以想暫時暱埋避一避風頭。同一時間喺同一條街嘅另外一邊,MADAM 張亦都喺度向做臥底嘅貓仔攞料,但貓仔做得太耐臥底沉淪咗,於是俾 Madam 省咗一輪,要佢積極咁搵大眼出嚟查清楚件事。

阿展一行五人一路行到懷疑搶鎗嗰四個古惑仔嘅藏身唐樓,幾個人破門而入,剩係見到有三個女仔喺度喊,原來喺阿展嚟到之前,嗰四個古惑仔俾佢哋頂爺禿頭派人捉走咗,三個女仔重俾個班打手執咗一劑。離開單位之後,阿展即刻諗住打畀肥沙,但係接電話嘅竟然係重案組 MADAM 張嘅手下,阿展一聽唔對路就即刻收線;MADAM 張聽到裝喺物証袋裏面嘅電話居然係搵肥沙,於是懷疑之下叫手下去查吓個電話嘅物主同埋有咩號碼記錄。而肥沙嗰邊,佢手機不斷有好多人打嚟搵馬尾,直至馬尾個老豆禿頭打嚟,肥沙先醒覺到個電話唔係自己嘅,於是肥沙乘機約禿頭會面希望打聽失鎗下落,去到禿頭間貨倉時見到嗰四個古惑仔俾禿頭執行緊家法,將佢哋剝晒衫褲剃光晒頭,分別困喺四個細鐵籠入面;禿頭知道肥沙同大眼有連絡,於是要肥沙搵阿大眼出嚟講數,作為交換失鎗嘅條件,令到肥沙好難做。

天空忽然落起雨上嚟,PTU 嘅隊員紛紛去到指定地點等豬籠車嚟派雨褸;等緊嘅時候,肥沙打畀阿展要搵佢斟斟,阿展就約肥沙兩點鐘去中國冰室度會合。警方每次巡邏嘅時候,都要去到某啲巡邏路線嘅簽到箱攞本簽到簿報到,警員係要喺指定時間到達,如果有誤時就一定要向上頭解釋。肥沙喺茶餐廳度要求阿展唔好喺原定嘅四點去廣東道簽到,想佢四點半先簽,阿展左右為難,但係因為一早拍咗心口要幫手,所以默許咗;MADAM 張喺茶餐廳門口認得肥沙架佈滿黃色漆油嘅車,於是走咗入去,點知撞到正想走嘅肥沙,MADAM 張即刻質問點解佢個電話會裝咗喺証物袋裏面,肥沙一聽到即刻掉頭走咗去;MADAM 嘅手下追唔到肥沙,於是 MADAM 張就警告班在場嘅 PTU 隊員唔好幫肥沙隱瞞,唔係就會有麻煩。

喺廣東道口,有個成身行裝拎住旅行袋嘅黃衫後生仔企喺碼頭仔邊向黑漆漆嘅大海張望,等緊嚟接載嘅舢舨;肥沙就喺碼頭側邊嘅公眾電話亭打畀禿頭,話畀佢知大眼四點會喺廣東道呢度出現,於是禿頭即刻揸車出發。另一方面,MADAM 張由貓仔口中得知禿頭會去搵大眼,叫佢跟住禿頭就可以搵到大眼。呢個時候,阿 KAT 一隊人正喺廣東道附近發現咗好多架俾人惡意破壞嘅車,啲車嘅車門玻璃都俾人整到爛晒,重響晒防盜警鐘,不過就唔見有人,於是幾個人就埋伏喺路邊度等待犯人嘅出現。呢個時候,跟住阿展一隊人四圍遊嘅傳令員發現阿展佢哋冇跟住原定嘅路線前往簽到地點,於是就向阿展提出。阿展立即命令手下慢慢查清楚對面一個路人嘅身份證,同時記得要Call 翻電台留低紀錄。傳令員知道阿展咁做係同肥沙有關,雖然佢唔知咩事,但佢就勸告阿展唔好因為肥沙單嘢而令到成隊人有麻煩;阿展諗諗吓亦覺得有道理,於是帶住隊人往原定路線廣東道進發。

以下落嚟嘅一連串劇情係喺好短嘅時間內發生:

  • 又再有汽車防盜響起警號,阿 KAT 等幾個慢慢咁向住聲音進發,當暱喺廣東道右邊一架泊好嘅車後面觀察時,見到個刑事毀壞者原來係一個踩單車嘅細路!佢掟爛啲車門玻璃,跟住開門偷晒啲擺喺櫃桶仔嘅碎銀;
  • 呢個時候,大眼架車喺廣東道街尾轉入,停低喺廣東道左邊停車位;
  • 肥沙喺T字路口電話亭前面望入廣東道見到大眼落車,跟住又見到禿頭架車由佢右邊而嚟轉入廣東道,一直去到大眼架車迎面冇幾遠停低;大眼見到前面架車落車嘅竟然係禿頭,先知道肥沙呃咗佢,於是好嬲咁遠遠望住呆企喺路口嘅肥沙;
  • 肥沙望住街裏面兩大龍頭對峙,跟住又一架車由佢右邊駛過嚟,經過佢身邊時見到 MADAM 張同手足喺車度;架車停喺肥沙左手邊冇幾遠,MADAM 張就喺車裏面靜靜咁監視廣東道裏面嘅動靜。
  • MADAM 架車呢頭停低,佢迎面就嚟咗架的士,的士打橫正正停喺廣東道口肥沙前面冇幾遠,放低咗三個又係滿身行裝嘅男人,跟住嗰個等船嘅黃衫後生仔就跑上嚟迎接佢哋;
  • 阿展一班人跑到嚟廣東道,由街尾一轉入嚟就見到咁嘅情況:
    肥沙 □MADAM 架車 ▽禿頭 ▲大眼
    旅行袋男人 ◎阿展一隊人 ⊙阿KAT一隊人
      ────────────────
           ●●●● ⊕
                  □
      ────┐     ┌─────
          │     │
          │▽ 廣  │
          │  東  │
          │▲ 道  │
          │    ⊙│⊙
          │    ⊙│⊙
          │  ◎  │
          │ ◎◎◎◎│
          │     │

四個週身旅行袋嘅男子企喺路口,見到街尾阿展一班警員正慢慢咁行緊過嚟,於是各自喺旅行袋裏頭拎出重火力嘅鎗械準備向街裏面開火,而兩組 PTU 因為一早已經按住鎗袋戒備,一見勢色唔對,就即刻掹鎗向四個男人開火嚟個先發制人;原來佢哋就係較早時候係北角持械行劫嘅四個賊。同一時間,大眼同禿頭亦各自拎出短鎗向對方開火攻擊,直至雙雙倒地。肥沙因為冇咗支警鎗,袋住支係膠鎗,唯有即刻搵地方暱埋;而 MADAM 張本來想同班賊駁火,點知一開車門支鎗就跌咗落地,嗰個黃衫賊人見到佢想執鎗就即刻向佢開火,嚇到佢縮返入架車度唔敢出嚟;個黃衫賊見到肥沙經過 MADAM 架車走咗去,於是喺後面窮追不捨,一路追到去肥沙先前俾人襲擊嘅後巷,點知肥沙跑跑吓又喺呢條後巷度跣親仆喺度,不過今次冇暈底,重喺垃圾堆度摸返自己把失鎗!佢回身一鎗,就將緊追到巷口嘅黃衫賊打死咗;至於另外嗰三個賊人亦都因為突擊失敗而全部死晒。

四個械劫賊人死晒,兩大黑社會龍頭又死埋,而肥沙搵返支配鎗成個人輕鬆晒;臨尾肥沙重寸Madam 張,教佢向天開兩鎗叫做參與咗鎗戰,到時寫份靚Report博吓獎賞。事後各警員夾埋口供講自己點樣神勇開火擊斃悍匪,之前所有嘢如過眼雲煙。呢單因為搵失鎗而引發嘅一連串事件,喺個細路踩住單車嘅吱吱聲之中告一段落。

主要出場人物同埋演出者

  • PTU 警長何文展(阿展):任達華
  • PTU 女警長阿 Kat:邵美琪
  • 反黑組警長盧沙(肥沙):林雪
  • 重案組女督察張麗君(Madam 張):黃卓玲
  • 大眼:高雄
  • 秃頭:盧海鵬
  • 肥祥叔:王天林

Tags:

電影 Ptu 電影資料電影 Ptu2003年導演杜琪峰港產片香港國際電影節

🔥 Trending searches on Wiki 粵語:

電池吳尊劉鑾雄日文黃劍文朝鮮民主主義人民共和國土瓜灣牟路思怡圖書館鍾江海馬貝利駱駝施焯日岸谷五朗王心兒李秀恒明治天皇千門八將方位王昊被虐待致死案九龍孫文葉芷樺香港商場一覽劉宇寧蘇雅琳林家熙國家人口密度一覽湯文亮楊殷彤善衡書院八爪魚頓號胡瀞詩羅子溢熊貓田井虹日本標準時間苗族山仔尹致暎楊冪公升吳海昕黃浚銘2005年高雄標童命案宮崎駿馬琳李芑奢侈品慶餘年十誡黎明最低合法性交年齡畢氏定理枇杷秦始皇兵馬俑哥士的鹹片容可兒朱祁鎮我想身體健康湯加文出pool莫竣名拿破崙COLLAR演算法仙人掌傻屄香港中文大學文學院蠄蟧龍珠易健兒上海🡆 More