芭蕾舞蹈員

男女都可以做芭蕾舞蹈員。傳統上，

• 男嘅芭蕾舞蹈員喺英文會叫做 ballerino（意大利文）或者 danseur（法文），
• 而女嘅芭蕾舞蹈員就會叫做 ballerina（意大利文）或者 danseuse（法文）；

喺廿一世紀嘅芭蕾舞界，男女舞蹈員一般會用一樣嘅分級法，最高嘅叫首席舞蹈員等等；不過，男女舞蹈員喺使用嘅技巧上有啲唔同，例如男舞蹈員因為普遍上身肌肉力量強過女舞蹈員，所以會擔當「捧起自己舞伴」嘅工作，而呢樣嘢女舞蹈員基本上唔會做。

專業嘅芭蕾舞蹈員要受嚴格嘅訓練：如果想成為專業嘅舞蹈員，一個人要由 2 至 4 歲（女仔）或者 5 至 7 歲（男仔）開始學芭蕾舞；就算一個舞蹈員喺一個專業芭蕾舞團搵到工之後，佢哋都仲會繼續接受訓練；一般嚟講，一個專業嘅芭蕾舞蹈員一個禮拜當中有六日都會同舞團嘅同事（喺舞團嘅老師帶領下）一齊上堂，保持自己熟識各種芭蕾舞技巧之餘，又透過練習各種－好多都好講求體力嘅－舞步令身體保持最佳狀態。

一堂芭蕾舞堂嘅流程如下：課堂會喺練功扶手（barre）嗰度開始；舞蹈員會用一隻手掹住條扶手做支撐嚟練－好多時好要求平衡力嘅－各種芭蕾舞舞步，一開始做一啲簡單嘅初階舞步，等到做到噉上下，個身有返噉上下熱，就會開始做啲複雜啲嘅舞步，然後去到中後段就會收埋條扶手，開始喺課室中間嗰度唔靠扶手跳舞，初頭做啲相對慢同簡單嘅舞步，之後愈做就愈大同快，到咗最尾就會練大快板（grande allegro；又大又快嘅跳躍舞步）或者練習男女舞蹈員拍擋跳舞呢啲最高難度嘅舞步。

 

Ballerina

意大利文入面「女芭蕾舞蹈員」噉解。

Prima ballerina

意大利文入面「首席女芭蕾舞蹈員」噉解。

Prima ballerina assoluta

絕對一級女芭蕾舞蹈員（prima ballerina assoluta）係一個少見嘅頭銜，淨係會加俾絕對最頂尖嘅女芭蕾舞蹈員。到咗 2020 年，芭蕾舞史上得嗰 13 個舞蹈員攞到呢個頭銜。

Ballerino

意大利文入面「男芭蕾舞蹈員」噉解。

Primo ballerino

意大利文入面「首席男芭蕾舞蹈員」噉解。

Danseuse

「Danseuse」（法文讀音：[dɑ̃søz]）係法文「女芭蕾舞蹈員」噉解。

Première danseuse

「Première danseuse」（法文讀音：[pʁəmjɛʁ dɑ̃søz]）係法文「一級女芭蕾舞蹈員」噉解。

Danseuse en travesti

「Danseuse en travesti」（法文讀音：[dɑ̃søz ɑ̃ tʁa.vɛs.ti]）係指女扮男裝嘅芭蕾舞蹈員：喺古典芭蕾舞當中，一個排舞師喺編一齣芭蕾舞劇嘅舞段嗰陣，有陣時會想要一段舞有一個男性角色俾身邊嘅舞蹈員抬起，但男舞蹈員嘅身體好多時比較重，於是個排舞師就可能會選擇將呢個角色安排俾一個身體輕啲嘅女舞蹈員嚟演－要呢個女舞蹈員著男裝上台跳呢個角色。

Danseur

「Danseur」（法文讀音：[dɑ̃sœʁ]）係法文「男芭蕾舞蹈員」噉解。

Premier danseur

「Premier danseur」（法文讀音：[pʁəmje dɑ̃sœʁ]）係法文「一級男芭蕾舞蹈員」噉解。

Danseur noble

「Danseur noble」（法文讀音：[dɑ̃sœʁ nɔbl]，字面上解係「高貴嘅男芭蕾舞蹈員」）喺古典芭蕾舞上係指舞技極之精湛、專門飾演王子等貴族角色嘅男芭蕾舞蹈員。

Cavalier

騎士（cavalier）係指一個負責做女主角舞伴、但本身並冇故仔角色嘅男舞蹈員。舉個例說明，《合桃鉗》（The Nutcracker）呢一齣芭蕾舞劇當中嘅糖梅仙子（Sugar Plum Fairy）係一個好重要嘅女主角，而喺佢要跳舞嗰陣，通常都梗要有個男舞蹈員傍住佢、做佢舞伴（例如係跳舞嗰陣幫手舉起佢噉），但呢個男舞蹈員喺合桃鉗個故仔當中並冇相應嘅角色。呢類冇故仔角色、但舞技上不可或缺嘅男舞蹈員就係所謂嘅騎士。

Corps de ballet

伴舞隊（corps de ballet；讀音：[kɔʁ də balɛ]，法文「芭蕾舞嘅身體」噉解）係舞蹈員嘅一種，屬個芭蕾舞團當中嘅永久性成員。一個芭蕾舞團嘅伴舞隊組成主要舞蹈員嘅骨幹，佢哋通常會一個團隊噉跳舞－而唔似得王子同公主等嘅主角噉，會單獨噉跳做觀眾注意力嘅中心。雖然伴舞隊好多時都俾人覺得佢哋冇主角咁樣眼，但做伴舞隊查實好講求默契，喺舞台上要曉互相配合同步噉做出舞步，係芭蕾舞表演當中不可或缺嘅一部份。

Coryphée

伴舞隊長（coryphée；法文讀音：[kɔʁife]）係指伴舞隊嘅領導者，喺某啲門派（尤其係法國派）當中係一個略高過伴舞隊嘅舞蹈員等級。伴舞隊長負責控制伴舞隊嘅節奏：喺表演嗰陣，伴舞隊長要企喺其他伴舞隊成員前面，俾其他伴舞隊成員睇住佢嘅動作嚟跳舞，所以伴舞隊長嘅動作控制住成個伴舞隊嘅節奏。伴舞隊長通常唔會生得太高（費事遮住喺佢後面嘅舞蹈員），亦都唔一定係伴舞隊當中舞技最好嗰個，但就要好識按照音樂控制自己跳舞嘅節奏，如果佢哋跟唔到節奏，就會搞亂嗮成隊伴舞隊嘅舞。

Étoile

明星（étoile；法文讀音：[e.twal]，法文入面「星星」噉解）係指成個芭蕾舞團入面最有料到嗰位舞蹈員。呢個詞通常係法國派芭蕾舞先會用嘅。

Virtuoso

名家（virtuoso）係指一個舞技好了得嘅芭蕾舞蹈員。

 

英國皇家舞蹈學院（RAD）將專業芭蕾舞蹈員分做以下幾個等級：

Artist

藝術家（artist）係最初階嘅舞蹈員，通常啲芭蕾舞學生啱啱畢咗業都係喺呢個級開始跳嘅。藝術家級嘅舞蹈員多數會俾人分派做伴舞隊。

First artist

一級藝術家（first artist）係高藝術家一級嘅舞蹈員，多數會繼續做伴舞隊嘅工作，但因為佢哋舞技高過藝術家級嘅舞蹈員，佢哋比較有機會擔當伴舞隊當中一啲樣眼啲嘅角色，例如係《天鵝湖》入面嘅小天鵝噉。如果個一級藝術家舞技夠好，個舞團諗住升佢職嘅話，佢有機會做變奏舞（variation）。

Soloist

獨舞員（soloist）係再高一級嘅舞蹈員，顧名思義係指一啲正式開始可以做變奏舞嘅舞蹈員。喺一齣芭蕾舞劇當中，獨舞員主要係負責飾演一啲有名、有機會做變奏舞嘅配角，例如係《睡公主》當中嗰啲仙子噉。一個芭蕾舞團一般會有 15 到 20 個獨舞員。

First soloist

一級獨舞員（first soloist）再高一級嘅舞蹈員，仲係負責飾演一啲有名、有機會做變奏舞嘅配角，但會擔當呢類配角當中樣眼啲嗰啲。一級獨舞員會有機會升做首席舞蹈員，而當個首席舞蹈員因為受咗傷或者點而跳唔到舞嗰陣，通常就會由一級獨舞員負責頂佢個位。

Principal character artist

首席角色藝術家（principal character artist）係高級嘅舞蹈員，會喺芭蕾舞劇當中演重要嘅角色，但唔會做太多變奏舞。舉個例說明，《天鵝湖》入面嗰個角色邪惡魔法師羅夫巴特（Von Rothbart）多數會由首席角色藝術家飾演：羅夫巴特係《天鵝湖》嘅大奸角，係一個不可或缺嘅角色，但因為《天鵝湖》始終係以王子同公主做主角，所以羅夫巴特做變奏舞嘅機會通常都冇王子同公主咁多。首席角色藝術家多數係年紀比較大嘅前首席舞蹈員－體力唔夠好，做唔到要係噉勁跳變奏舞嘅主角，於是就憑住精湛嘅技術同演技擔當重要、但唔係主角嘅角色。

Principal

首席舞蹈員（principal）係一個芭蕾舞團入面最高級嘅專業芭蕾舞蹈員，會喺芭蕾舞劇當中飾演主角，並且做大量嘅變奏舞，例如係《天鵝湖》當中嘅王子同公主或者《合桃鉗》當中嘅女主角卡拉娜（Clara）同胡桃鉗等等多數會由個芭蕾舞團嘅首席嚟擔任。首席舞蹈員往往係成個芭蕾舞團當中最引人注目嘅舞蹈員，而喺一個芭蕾舞團為佢哋要演嘅芭蕾舞劇做宣傳嗰陣，好多時都會以「佢哋嘅首席舞蹈員會親自上台，表演精湛舞技」嚟做賣點。

呢個 RAD 舞蹈員等級等同於法國派入面嘅「明星舞蹈員」（Danseur Étoile［男］/ Danseuse Étoile［女］）或者意大利派入面嘅「一級舞蹈員」（Primo ballerino［男］/ prima ballerina［女］）。

芭蕾舞蹈員呢份工一啲都唔易做：芭蕾舞用嘅舞步好多都要求極強嘅平衡力，而且好多時要舞蹈員－尤其係男舞蹈員－做啲大幅度嘅跳躍，所以芭蕾舞蹈員好容易因為跳舞跳得激得滯而跌親扭親。

因為噉，有好多芭蕾舞技巧都旨在要有美感得嚟降低舞蹈員整親嘅機會率，例如係髀屈曲（plié）呢個初階技巧噉，就涉及舞蹈員雙髀喺個膝頭嗰度向外彎曲、同時上半身維持垂直－呢種技巧就噉睇好似好簡單，但喺芭蕾舞蹈員做咗大跳躍要落力嗰時，佢哋往往會喺落力嗰吓做一個髀屈曲，令雙髀好似彈弓噉吸收落力嗰嘢股衝擊力，降低整親膝頭嘅機會率。而芭蕾舞初班往往會要學生勁做髀屈曲，做到熟先教做大跳躍。

• 芭蕾
• 演員
• 古典芭蕾

•   維基同享中有關芭蕾舞蹈員嘅資源類