耶路撒冷

耶路撒冷 希伯來文：יְרוּשָׁלַיִם‎ 阿拉伯文：القُدس‎
城市
上至下，左至右：耶路撒冷古城、大衛塔、錫安廣場、弦橋、瑪米拉商場、哭牆、聖經之龕、聖墓大殿、古城鳥瞰圖
徽章
綽號：聖城
實際控制	以色列
宣稱控制	以色列、 巴勒斯坦國
最先人類居住	3000–2800 BCE
大衛之城	c. 1000 BCE
城牆最後翻起	1541
耶路撒冷分治	1948
以色列完全吞并	1967
成爲以色列首都	1980
政府
• 類型	市長議會
• 行政機構	耶路撒冷市議會
• 市長	Moshe Lion（利庫德）
面積
• 城市	125,156 平方公里（48,323 平方英里）
• 都會區	652,000 平方公里（252,000 平方英里）
海拔	754 米（2,474 英尺）
人口（2022）
• 城市	971,800
• 密度	7.8/平方公里（20/平方英里）
• 都會區	1,253,900
時區	標準時區（UTC+02）
• 夏令時間	夏令時區（UTC+03）
郵政編碼	9XXXXXX
電話號碼	+972-2
網站	jerusalem.muni.il

耶路撒冷 (希伯來文：יְרוּשָׁלַיִם‎，羅馬拼音：Yerushaláyim、阿拉伯文：القُدس‎，羅馬拼音：al-Quds ) ，唐朝景教期間譯做烏梨師斂 (敘利亞文：ܐܘܪܫܠܡ‎，羅馬拼音：Ūrišlem，意思係  ｢Shalem 嘅城市｣)，係一座位於西亞巴勒斯坦地區嘅城市，喺地中海同埋死海之間。耶路撒冷係其中世界上最古老嘅城市之一。耶路撒冷同時係猶太教、基督教同埋伊斯蘭教三大宗教嘅聖地。以色列同巴勒斯坦兩邊都宣稱耶路撒冷係自己嘅首都，但係佢哋兩個都冇得到國際上嘅廣泛認同。

公認

喺耶路撒冷悠久嘅歷史之中，耶路撒冷被毀滅2次、被圍城23次、曾經44次轉過手、同埋受過攻擊52次。耶路撒冷古城自從公元前3,000年已經有人類住嘅跡象。喺迦南時期 (公元前14世紀)，呢座城為迦南嘅神靈 Shalem 而改名。喺古以色列人嘅時期，耶路撒冷成爲咗猶大王國嘅行政同宗教中心。到1538年，喺鄂圖曼帝國嘅統治之下，耶路撒冷嘅城牆再一次翻起，一直到依家。呢埲牆畫出咗古城嘅範圍，入面包含咗亞美尼亞、基督教、猶太教、同回教區。耶路撒冷古城喺1981年成爲咗世界遺產。

根據宗教

根據《塔納赫》，大衛王帶領古以色列人打贏耶路撒冷，建立咗以色列聯合王國。佢嘅仔所羅門王開始咗起耶路撒冷聖殿。自此之後，耶路撒冷對猶太人成爲咗非常重要嘅城市，到流散之後更加成爲咗聖城 (希伯來文：עיר הקודש‎，羅馬拼音：'Ir ha-Qodesh)。

喺基督教，因爲希伯來聖經對信徒係等同《舊約聖經》，所以耶路撒冷嘅地位同樣唔低。加上耶穌嘅受死同復活都係喺耶路撒冷範圍，所以就更加特別。

喺回教方面，耶路撒冷係第三大聖城，其次於麥加同麥地那。耶路撒冷係最初回教徒向住嚟祈禱嘅方向。除此之外，根據《可蘭經》同回教傳統，模罕默德喺621年嘅夜行去咗耶路撒冷，跟住升天同阿拉對話。

因爲呢啲宗教對耶路撒冷嘅重視，所以耶路撒冷古城雖然面積只係得0.9平方公里，但係都佈滿住宗教建築，包括聖殿山嘅哭牆、圓頂清真寺、阿克薩清真寺、同埋聖墓大殿。

到依家，耶路撒冷嘅政治地位仍然係一件非常有爭議性嘅題材，同時係以巴衝突嘅主要議題之一。喺第一次中東戰爭期間，西耶路撒冷成爲咗以色列一部分，而東耶路撒冷，包括耶路撒冷古城，就俾約旦吞并咗。到1967年六日戰爭之後，以色列完全控制同埋吞并耶路撒冷。

喺以色列基本法嘅14條法例之中，包括咗承認全個耶路撒冷做以色列首都，而以色列嘅所有主要政治建築都係喺耶路撒冷。大部分國家嘅領事館都係喺特拉維夫嘅範圍。

喺巴勒斯坦方面，巴勒斯坦基本法同樣視耶路撒冷為首都。但係，巴勒斯坦解放組織嘅文件通常都只係叫東耶路撒冷做首都。喺2010年嘅一份文件入面，佢哋形容咗巴勒斯坦嘅願景：“東耶路撒冷將會係巴勒斯坦國嘅首都，而西耶路撒冷就會係以色列嘅首都”。喺2013年嘅一份文件之中，提及到“巴勒斯坦首都——東耶路撒冷”，同時聲稱：“被佔領嘅東耶路撒冷係巴勒斯坦嘅自然社會、經濟、同政治中心，耶路撒冷一直同永遠都會係巴勒斯坦嘅中心”。除此之外，文件亦提到：“巴勒斯坦對1967年嘅邊界嘅承認，包括東耶路撒冷，已經係一個心痛嘅讓步。

國際社會一般都拒絕承認耶路撒冷係任何一個國家嘅首都，通常立場係：耶路撒冷嘅地位，係需要以色列同巴勒斯坦自治政府直接談判之後，先至能夠得出結果。同時，大部分國家都認爲，以色列對東耶路撒冷嘅控制同吞并係屬於非法。

自從1860年以嚟，耶路撒冷不斷發展。到2022年，市内嘅人口已經達到 971,800人，其中6成係猶太人，4成係巴勒斯坦人。喺2020年，耶路撒冷嘅宗教分配係：57萬（60%）信猶太教、35萬（37%）信回教、1.6萬（1.7%）信基督教、另外仲有1.2萬（1.3%）係信其他。

耶路撒冷緯度喺北回歸線北面，靠近地中海，同以色列多數地區一樣，屬地中海氣候。耶路撒冷喺亞熱帶，喺冬季都算暖，但落雪都唔算罕見，通常每年至少會落雪一次。一月係一年中最凍嘅月份，平均高溫係12攝氏度（53華氏度），而一年中最熱嘅月份係七月同八月，平均高溫29攝氏度（84華氏度）。年平均降水量接近590毫米（23英寸），由5月到9月嘅夏季好少落雨。