宏觀經濟學

顯示中國大陸各地 2017 年 GDP 嘅地圖；數據顯示，廣東嘅 GDP 喺 2017 年全中國大陸第一。

商業週期嘅圖解；幅圖 Y 軸係（例如）GDP，而 X 軸係時間。

美國 1995 年至 2013 年嘅失業率數據

舉個例說明，本地生產總值（gross domestic product；簡稱「GDP」）係宏觀經濟學成日研究嘅一個變數：將某段時間之內一個經濟體裏面嘅最終貨品服務嘅市場價值冚唪唥加埋一齊，得出個數就係嗰個經濟體喺嗰段時間之內嘅 GDP。喺計 GDP 嘅過程之中，個分析者將個經濟體入面一大柞個體物件（貨品服務）嘅屬性（市場價值）以某啲方法結合埋做一個數值（就噉加埋一齊），所以 GDP 呢個課題屬於宏觀經濟學研究嘅範疇。宏觀經濟學亦都會研究一啲影響成個經濟體嘅嘢，好似係個政府嘅政策噉。

喺建立經濟模型嗰陣，微觀經濟學嗰柞概念會俾人用嚟建構宏觀經濟學嘅理論：微觀經濟學研究嘅係一啲個人同公司層面嘅現象，而隨住經濟學家加深理解呢啲嘢點樣運作，佢哋可以用一啲相對簡單嘅數學模型或者方程式表達呢啲嘢嘅運作定律出嚟，再用呢啲定律模擬吓，睇吓（例如）如果個經濟體入面 50% 嘅個體都跟從嗰條定律行事嘅話個經濟體嘅 GDP 會變成點，再睇吓如果個經濟體入面 70% 嘅個體都跟從嗰條定律行事嘅話個 GDP 又會點。

結合數據

例如本地生產總值（gross domestic product；簡稱「GDP」）就係一種常用嘅經濟指標（economic indicator），用嚟量度一個經濟體（「一個經濟體」可以係指一個城市、一個省、以至一個國家）喺某一段時間之間嘅經濟產出。計法如下：

GDP = C + I + G + (X − M)；喺呢條式當中，

• C 代表消費（consumption），指個經濟體當中啲人使咗幾多錢買一啲最終貨品同服務（「最終」即係話件貨品服務唔會俾人再攞嚟做第啲生產），通常都係 GDP 入面最大嚿嗰個成份。
• I 代表投資（investment），包括個經濟體入面嗰啲公司用咗幾多錢嚟買啲生產因素，但唔包現存財物或者金融產品嘅購買。
• G 代表政府使嘅錢（government spending），指個政府使咗幾多錢買一啲最終貨品同服務，包括咗佢哋使嚟請工務人員、幫軍隊買武器、同投資嘅錢呀噉。
• X 代表出口（export），指佢賣咗幾多貨品服務俾第啲經濟體消費。
• M 代表進口（import），指佢由第啲經濟體嗰度買咗幾多貨品服務做消費。呢個數字係要由 GDP 嗰度減出嚟嘅，噉係因為個經濟體嘅消費（C 同 G 等）當中梗會有部份包括咗進口貨品服務嘅消費（例如一個平民買來佬貨），而呢啲進口貨品服務唔應該屬於本地生產嘅價值，所以要由 GDP 嗰度減返出嚟。

除咗 GDP 之外，經濟學界仲有第啲指標用嚟量度經濟表現，而比較唔同指標俾嘅結果能夠提供一啲有用嘅資訊。舉個例說明，人均本地生產總值（GDP per capita）係指一個經濟體嘅 GDP 除以人口，而喺 2018 年，香港雖然 GDP 總值低美國一大截，但人均 GDP 就拍得住美國，表示香港喺生產水準上拍得住美國，但因為人口細一截而令到總體經濟規模唔及美國－比較兩地嘅 GDP 同人均 GDP 幫手推導出一啲有關兩地經濟規模同概況嘅資訊。事實係，喺做經濟分析嗰陣，經濟專家通常會睇嗮唔同嘅經濟表現指標所俾嘅結果，靠噉嚟到判斷一個經濟體內部發生緊啲乜嘢事。

經濟增長

經濟增長（economic growth）指一個經濟體嘅人均產出（以按通脹調整後嘅 GDP 等嘅經濟指標計算）隨時間嘅提升。經濟增長可以受好多因素影響，包括咗成日有經濟學家研究嘅投資率、人口增長、同埋科技上嘅改變呀噉，例如中國喺廿一世紀初嘅驚人經濟增長噉，一部份就係因為內陸啲鄉下地區嘅人紛紛走去大城市打工，令工人嘅數量突然間升得好緊要（多咗好多人手做生產活動）而引起嘅。世界各地喺呢啲因素上嘅差異令到唔同嘅經濟體有唔同嘅經濟增長率，所以唔同嘅經濟體有啲會有錢啲有啲會窮啲。

商業週期

每一個經濟體嘅 GDP（同埋其他嘅經濟表現指標）長遠嚟講都會週期性噉上上落落，呢啲上上落落就係所謂嘅商業週期（business cycle）。一個商業週期包含一段相對蕭條嘅時期同一段相對興旺嘅時期。對商業週期嘅研究起源喺 1930 年代嘅大蕭條（The Great Depression）時期，當時英國經濟學家凱恩斯（John Maynard Keynes）寫咗佢嗰本名著《The General Theory of Employment, Interest and Money》（粵文：就業、利息同錢嘅廣義理論）嚟提出佢心目中嘅經濟理論，佢認為喺經濟不景嗰陣，對貨品服務嘅需求唔夠，搞到失業率高企同埋可能輸出嘅喪失。佢跟手仲主張要有一啲政策，例如係中央銀行嘅貨幣政策行動或者政府嘅財政政策嚟令到商業週期當中嘅輸出穩定化。凱恩斯嘅理論亦都表明咗，喺某啲情況下，一個經濟體冇乜嘢有效又自動性嘅機制能夠將個經濟體移向全民就業。呢啲文獻最後創出咗商業週期嘅概念。

失業率

一個經濟體入面嘅失業情況係用失業率（unemployment rate）量度嘅。失業率係描述個經濟體嘅勞動力（labor force）當中有幾多工人係冇工返嘅。勞動力包括咗主動噉搵緊工嘅工人－退咗休、仲讀緊書、或者因為個市場冇職位所以冇心機搵工嘅人都唔包括喺勞動力之內。失業嘅成因可以有好多：最簡單嘅情況係個經濟體入面職位唔夠，喺古典嘅經濟學理論當中，失業發生嘅主因在於人工高得滯，搞到啲老細冇誘因請多啲工人（即係工人供過於求），而人工高得滯嘅原因可能係因為最低工資法律或者工會嘅活動，而就算個經濟體冇工人供應量多得滯嘅問題，一個工人依然可能會經歷摩擦性失業（frictional unemployment）－例如一個工人辭職去搵第份工，就算個經濟體冇職位太少嘅問題，佢喺開始搵工到搵到嗰段時間都算係處於暫時失業嘅狀態。

結構性失業（structural unemployment）包括咗一大柞可能引致失業嘅原因，例如係工人嘅技能同現存職位所需嘅技能唔夾噉，呢種情況可能會喺個經濟體轉型嗰陣時發生。結構性失業同摩擦性失業相似嘅係，兩者都反映咗將工人安配落去職位空缺上有問題，而結構性失業反映咗工人需要時間學新技能嚟適應新嘅經濟環境。

無論個經濟體情況係點，佢當中梗會或多或少噉發生失業嘅情況。當一個經濟體嘅增長放緩嗰陣時，好多時會發生週期性失業（cyclical unemployment）嘅情況。奧肯法則（Okun's law）代表咗喺實證研究上搵到嘅失業率同經濟增長之間嘅關係，原版嘅奧肯法則話，經濟輸出每升 3% 失業率就會跌 1%。打後嘅研究有按照實證觀察調較條定律入面嗰兩個數值。

貨幣政策

 

喺廿一世紀嘅各大經濟體當中，錢都係交易嘅基礎，而啲貨品服務嘅價格基本上冚唪唥都係以「要幾多錢」嚟量度嘅。各大經濟體會攞襟用、易攜、供應有彈性、又唔易爛嘅物件嚟做錢－好似銀仔同銀紙等都符合呢啲條件。銀仔同銀紙本身並冇能力滿足人類嘅慾望，佢哋有價值只不過係因為個經濟體內部嘅人普偏都信佢哋有價值，令到啲人可以放心攞佢哋嚟買滿足到慾望嘅貨品服務。所以每一個經濟體都要做啲嘢，確保佢嘅貨幣係俾到信心人嘅，而管理得唔好嘅就會好似頭先提到嘅津巴布韋噉搞出禍。貨幣政策（monetary policy）指緊一個經濟體內嘅某啲權威性組織－即係中央銀行等－透過控制（例如）利息等嘅因素嚟到確保個經濟體內部嘅錢價值穩定同埋有公信力。

通脹（inflation）同通縮（deflation）係貨幣政策最常要應付嘅兩種情況，前者指個經濟體內部啲貨品服務嘅價格持續係噉升，而後者指個經濟體內部啲貨品服務嘅價格持續係噉跌，兩者都反映咗個經濟體嘅貨幣價值唔穩定：例如係通脹噉，想像有個人佢銀行戶口有 100,000 文，而喺個經濟體經過一個月嘅持續通脹之後，佢個銀行戶口入面錢嘅量冇變，但因為成個經濟體啲貨品服務嘅價格都升咗，佢攞住佢嗰 100,000 文實質上可以買到嘅嘢就少咗－佢啲錢嘅實際價值跌咗。無論通脹定通縮都會搞到啲錢嘅實際價值唔穩定，變相會損害啲人對隻貨幣嘅信心－而正如頭先提及，啲人對隻貨幣嘅信心係錢有價值嘅根本原因。

財政政策

財政政策（fiscal policy）涉及一個經濟體嘅政府用佢嘅收入同支出嚟影響個經濟體嘅宏觀情況：當一個經濟體嘅總需求跌到有返咁上下低嗰陣，就會出現有一部份生產能力冇用盡嘅情況；喺呢個情況下，政府可以使錢同減稅令個總需求升返，而用淨嘅資源可以俾政府攞去用。舉個例說明，想像家吓有一個經濟體經濟不景，搞到有好多唔同行業嘅人失業，喺呢個時候，政府可以減稅，等啲消費者多啲多餘錢，令佢哋使多啲錢，啲生產者感覺到消費者對貨品服務嘅需求上升，就會做多啲生產，就要請多啲人做嘢－減稅間接舒緩失業嘅問題；同時，政府又可以索性（例如）請一啲因為經濟不景而冇嘢做嘅建築工人同埋工程師幫政府手起基建－直接噉舒緩失業嘅問題。

公共事業

公共財政學（public finance）係涉及處理公共事業（public sector）嘅收支預算嘅經濟子領域，通常係處理返政府方面嘅嘢。呢個範疇內嘅事宜會含有比如稅收負擔（tax incidence，由邊個實際承擔個別嘅稅項）、分析政府主導啲項目嘅成效、唔同嘅稅收、同埋開支對經濟效率同收入分配嘅影響，仲有係經濟政策呀噉。後者係屬於公共選擇理論（public choice theory）嘅一部分，類似微觀經濟學噉研究公共事業啲活動，譬如（設想係）自私嘅選民、政客、同生意佬之間嘅啲互動。

多數經濟學科屬於實證經濟學，意圖預測同解讀啲經濟現象，而規範經濟學係以鑑證經濟表現理應係乜樣嚟做目標。福利經濟學（welfare economics）就屬於後種類型嘅分支經濟學科，佢會用微觀經濟學嘅理論技巧，去同時確定一個經濟體入邊嘅分配效率同埋相關嘅收入分配。呢個學科係會嘗試檢視構成咗社會嘅個體嘅經濟行為去研判社會福利。

• 微觀經濟學
• 複雜系統

 

維基同享有多媒體嘅嘢：
Macroeconomics

• Macroeconomics. Investopedia.
• Macroeconomics. Encyclopedia Britannica.