全球變暖

喺20世紀，全球平均接近地面嘅大氣層溫度升咗攝氏 0.74 度。普遍嚟講，科學界認為過去五十年可觀察嘅氣候改變係由人類活動所推動。

二氧化碳同其他溫室氣體嘅含量不斷增加，正係全球變暖嘅人為因素中主要部分。燃燒化石燃料、清理林木同耕作等等都增強咗溫室效應。第一次懷疑溫室效應會發生嘅觀測係瑞典化學家阿累尼烏斯喺1897年所做嘅。雖然當時冇引發公眾討論，但係事隔 90 年，終於變成公眾關注嘅問題。

美國加利福尼亞大學嘅科學家喺太平洋中央夏威夷嘅莫勞島上設立 4 個 7 米高同一個 27 米高嘅採樣塔，每個鐘採樣 4 次，分析二氧化碳嘅變化情況。

目前全球平均溫度嘅變化，幾乎同二氧化碳含量嘅變化係同步上升嘅，工業革命開始嗰陣，二氧化碳嘅含量急劇增加。雖然植物嘅光合作用吸收了好大一部分二氧化碳，海洋亦溶解一部分二氧化碳並固定成碳酸鈣，但係空氣裏面二氧化碳嘅含量重係漸漸增加緊。根據美國維珍尼亞大學同英國東英格蘭大學聯合研究嘅結果，喺20世紀後半葉，全球溫度上升嘅趨勢非常明顯，溫度變化情況睇下面幅圖。

全球變暖係比氣候改變更明確嘅名。原則上，「全球變暖」一詞對成因持中立觀點，但係根據大眾嘅用法，「全球變暖」意味著人類嘅影響。但係，聯合國氣候變化框架公約使用「氣候改變」代表人為因素導致嘅改變，「氣候變化」代表第啲嘢導致嘅改變。其他組織就用「人為嘅氣候改變」（Anthropogenic climate change）代表人為因素導致嘅改變。

 

根據儀器記錄，相對於1860年至1900年期間，全球陸地同海洋溫度上升咗攝氏 0.75 度。自1979年，陸地溫度上升速度比海洋溫度快一倍（陸地溫度上升咗攝氏 0.25 度，而海洋溫度上升咗攝氏 0.13 度）。根據衛星溫度探測，對流層嘅溫度每十年上升攝氏 0.12 度至 0.22 度。喺1850年前嘅一兩千年，雖然曾經出現中世紀溫暖時期同小冰河時期，但係大眾相信全球溫度係相對穩定嘅。

根據美國太空總署戈達德太空研究所嘅研究報告估計，自1800年代有測量儀器被廣泛應用開始，2005年係最溫暖嘅年份，比1998年嘅記錄高咗攝氏百分之幾度。

世界氣象組織同英國氣候研究單位都有類似嘅估計，曾經預計2005年係僅次於1998年第二溫暖嘅年份 。